‏1 إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ. ن ذَاوُوذْ.

‏2 أَ أَربِّي، سڒْ إِ ؤُڒَاغِي إِنُو،

أوْشْ ثَايْنِيثْ إِ ثْژَادْجِيثْ إِنُو.

‏3 زِي طَّارْفْ أَنڭَّارْ ن ثمُّورْثْ تّْڒَاغِيغْ خَاكْ،

خْمِي إِتّفْشِيڒْ وُوڒْ إِنُو.

نْذهْ أَيِي خْ إِجّْ ن جَّارْفْ يُوعْڒَانْ خَافِي.

‏4 مَاغَارْ ثُوغَا شكْ ذ أَمْشَانْ ن ثَاروْڒَا إِ نشّْ،

ذ لْپُورْجْ إِجهْذنْ ضِيدّْ إِ ڒعْذُو.

‏5 نشّْ أَذْ قِّيمغْ ذڭْ ؤُقِيضُونْ نّكْ إِ ڒبْذَا،

أَذْ دُّورّْيغْ سَاذُو وَافْرِيونْ نّكْ. سِيلَاهْ.

‏6 مَاغَارْ شكْ، أَ أَربِّي، ثسْڒِيذْ غَارْ لْوُوعُوذْ إِنُو.

شكْ ثوْشِيذْ أَيِي ثَاسْغَارْثْ ن يِينِّي إِتّڭّْوذنْ إِسمْ نّكْ.

‏7 أَذْ ثَارْنِيذْ عَاذْ ؤُسَّانْ خْ وُوسَّانْ ن ؤُجدْجِيذْ،

أَڒَامِي إِسڭّْوُوسَا نّسْ أَذْ إِڒِينْ زِي جِّيڒْ أَڒْ جِّيڒْ.

‏8 نتَّا أَذْ إِقِّيمْ زَّاثْ إِ وُوذمْ ن أَربِّي إِ ڒبْذَا.

أَذْ خَاسْ ثحْضَا ثَامخْسِيوْثْ إِشوَّارنْ ذ ڒَامَانْ.

‏9 أَمُّو إِ غَا زهّْذغْ إِ يِيسمْ نّكْ إِ ڒبْذَا،

حِيمَا أَذْ كمّْڒغْ لْوُوعُوذْ إِنُو، أَسّْ أَوَارْنِي ؤُمَاسْ.