60
1 إِ ؤُمقّْرَانْ ن إِمغْنَاجنْ. س ثغْنِينْثْ ن ’ثَالِيلّشْثْ ذ أَشهَّاذْ‘. ثِيرَا إِنقْشنْ ن ذَاوُوذْ إِ ؤُسڒْمذْ. ▫
2 أَوَارْنِي ڒَامِي ثُوغَا إِتّْمّنْغَا أَكْ-ذ إِرَامِييّنْ زِي مِيسُوپُوثَامْيَا،
ؤُ أَكْ-ذ إِرَامِييّنْ زِي صُوبَا، إِذْوڒْ-د يُووَابْ
ؤُشَا إِوْثَا أَيْثْ ن إِذُومْ ذِي ثغْزُورْثْ ن ثْمدْجَاحْثْ، عشْرَا أَڒَافْ ن يرْيَازنْ. ▪
3 أَ أَربِّي، شكْ ثنْضَارضْ أَنغْ، ثَارْژِيذْ أَنغْ.
ثُوغَا ثسْعَارذْ أَطَّاسْ! سْبدّْ أَنغْ عَاوذْ! ▪
4 شكْ ثسّنْهزّذْ ثَامُّورْثْ، ثْفدْجْقذْ ت.
سْڭنْفَا ثِيرژَّا نّسْ، مَاغَارْ أَقَا تّنْهزَّا.
5 شكْ ثسّشْنذْ إِخفْ نّكْ إِ ڒْڭنْسْ نّكْ س ڒقْسَاحثْ.
شكْ ثوْشِيذْ أَنغْ أَذْ نْسُو شّْرَابْ إِسّْذوَّاخنْ.
6 إِنِّي شكْ إِتّڭّْوذنْ، ثڭِّيذْ أَسنْ ثَاعدْجَانْثْ
إِ غَارْ تّْرَاكّْوَاڒنْ زِي فْڒِيثْشَاثْ ن ڒْقوْسْ. سِيلَاهْ.
7 حِيمَا إِمْعِيزّنْ نّكْ أَذْ تّْوَافكّنْ،
أَوِي أَسنْجمْ س ؤُفُوسْ أَفُوسِي نّكْ ؤُ أَرّْ-د خَانغْ. ▪
8 أَربِّي ثُوغَا إِسَّاوَاڒْ ذِي زَّاوشْثْ نّسْ إِقدّْسنْ،
س ؤُينِّي أَذْ نڭْزغْ س ڒفْرَاحثْ.
نشّْ أَذْ بْضِيغْ شَاكِيمْ ؤُ أَذْ عبَّارغْ ثَاغْزُورْثْ ن سُوكُّوثْ.
9 جِيلْعَاذْ إِنُو، مَانَاسَّا إِنُو،
إِفْرَايِيمْ ذ أَسڒْقِي إِجهْذنْ ن ؤُزدْجِيفْ إِنُو،
يَاهُوذَا ذ أَمْڭوّذْ إِنُو.
10 مُوآبَ ذ سَّارِيجْ إِنُو إِ ؤُسِيرْذْ،
خْ إِذُومْ أَذْ نْضَارغْ ثِيسِيڒَا إِنُو،
نشّْ أَذْ دُّوقْزغْ س ؤُسْڒِيوْڒوْ خْ ثمُّورْثْ ن فِيلِيشِيثْ.
11 وِي ذ أَيِي إِ غَا إِنذْهنْ ذِي ثنْذِينْثْ إِفَارْينْ؟
وِي ذ أَيِي غَا إِڭوّْذنْ غَارْ إِذُومْ؟
12 مَا وَارْ ذ أَنغْ ثنْضَارذْ، أَيَا، أَربِّي،
ؤُ أَكْ-ذ ڒْعسْكَارَاثْ نّغْ مَا وَارْ أَكِيذْسنْ د-ثفِّيغذْ عَاذْ، أَ أَربِّي؟
13 أوْشْ أَنغْ أَفُوسْ حِيمَا أَذْ أَنغْ ثسّْنجْمذْ زِي ڒحْصَارثْ،
مَاغَارْ أَسنْجمْ س ؤُفُوسْ ن يِيجّْ ن بْنَاذمْ أَقَا-ث بَاطڒْ.
14 أَكْ-ذ أَربِّي أَذْ نڭّْ س ومْحَاذْ،
نتَّا أَذْ إِعْفسْ خْ ينِّي ذ أَنغْ إِحصَّارنْ.