59
1 إِ ؤُمقّْرَانْ ن إِمغْنَاجنْ. ’وَارْ ث تَّاردّدْجْ!‘ ن ذَاوُوذْ. ثِيرَا إِنقْشنْ.
ؤُمِي شَاوُولْ إِجَّا أَذْ حْضَانْ ثَادَّارْثْ ن ذَاوُوذْ حِيمَا أَذْ ث نْغنْ. ▪
2 فكّْ أَيِي زِي ڒْعذْيَانْ إِنُو، أَ أَربِّي،
سْڭعّذْ أَيِي سنّجْ غَارْ ؤُحطُّو زڭْ إِنِّي خَافِي إِتّكَّارنْ.
3 فكّْ أَيِي زڭْ إِنِّي إِتّڭّنْ ڒْغشّْ،
سنْجمْ أَيِي زڭْ إِرْيَازنْ ن إِذَامّنْ.
4 أَقَا، خْزَارْ، نِيثْنِي ڭِّينْ إِشْثْ ن ثخْشفْثْ إِ ڒعْمَارْ إِنُو،
نِيثْنِي مُوننْ خَافِي.
وَارْ ذِينْ أَخطُّو ؤُڒَا ذ دّنْبْ غَارِي، أَ سِيذِي!
5 وَاخَّا وَارْ ڭِّيغْ لْجَارِيمَا،
أَقَا نِيثْنِي زعْمَا ؤُسِينْ-د تَّازّْڒنْ-د غَارِي ؤُ سّْوجَّاذنْ إِخفْ نْسنْ.
فَاقْ، أَسْ-د غَارْ ؤُمْسَاڭَارْ أَكِيذِي ؤُ خْزَارْ.
6 شكْ، أَ سِيذِي، أَربِّي ن ڒْعسْكَارَاثْ، أَربِّي ن إِسْرَائِيل،
فَاقْ حِيمَا أَذْ ثْڒقْفذْ مَارَّا ڒڭْنُوسْ.
وَارْ تّْحِينِّي خْ ؤُڒَا ذ إِجّْ زِي مَارَّا إِغدَّارنْ إِنِّي إِتّڭّنْ ڒْغشّْ. سِيلَاهْ.
7 أَقَا تّْعقْبنْ غَارْ ثْمذِّيثْ،
تّْزُونْ أَمشْنَاوْ أَقْزِينْ،
ؤُ تّنّْضنْ إِ ثنْذِينْثْ.
8 خْزَارْ، س ؤُقمُّومْ نْسنْ سُّوسُوفنْ قَاعْ،
ڒسْيُوفْ نْسنْ أَقَا أَثنْ خْ إِينْشِيشنْ نْسنْ،
مِينْزِي مَانْ ونْ إِ غَا إِسْڒنْ؟ ▪
9 شكْ مَاشَا، أَ سِيذِي، أَذْ خَاسنْ ثْضحْشذْ،
شكْ أَذْ ثْحشّذْ خْ مَارَّا ڒڭْنُوسْ. ▪
10 أَ جّهْذْ نّسْ، نشّْ أَذْ ث رَاجِيغْ،
مَاغَارْ أَربِّي ذ لْپُورْجْ إِنُو يُوعْڒَانْ.
11 ثَامخْسِيوْثْ إِشوَّارنْ ن أَربِّي إِنُو أَذْ أَيِي ثِيزْوَارْ،
أَربِّي أَذْ أَيِي يَارّْ أَذْ ژَترغْ إِنِّي ذ أَيِي إِحصَّارنْ.
12 وَارْ ثنْ نقّْ شَا، مَاحنْذْ ڒْڭنْسْ إِنُو وَارْ ث إِتّتُّو.
أجّْ إِ-ثنْ أَذْ ودَّارنْ زِي ثْزمَّارْ نّكْ
منْضَارْ إِ-ثنْ سْوَادَّايْ، مَاغَارْ شكْ ذ ثَاسدَّارْثْ نّغْ إِ ؤُسڒْقِي، أَ سِيذِي إِنُو.
13 خْ دّْنُوبْ ن ؤُقمُّومْ نْسنْ،
خْ وَاوَاڒنْ إِ د-إِتّفّْغنْ زڭْ إِينْشِيشنْ نْسنْ،
خْ ؤُيَا أجّْ إِ-ثنْ أَذْ تّْوَاحبّْسنْ ذِي نّْفَاخثْ نْسنْ،
ؤُڒَا خْ نّعْڒثْ ؤُ خْ ؤُخَارِّيقْ نِّي خفْ تّْحَارْذنْ.
14 كحّضْ إِ-ثنْ ذڭْ وسْعَارْ نّكْ،
كحّضْ إِ-ثنْ أَڒَامِي وَارْ دْجِينْ عَاذْ،
ؤُ أَرّْ إِ-ثنْ أَذْ سّْننْ، أَقَا أَربِّي ذ ڒْحَاكمْ ذِي يَاعْقُوبْ،
غَارسْ أَڒْ ثِينڭُّورَا ن ثمُّورْثْ. سِيلَاهْ.
15 أَقَا أَذْ عقْبنْ غَارْ ثْمذِّيثْ،
تّْزُونْ أَمشْنَاوْ أَقْزِينْ،
ؤُ تّنّْضنْ إِ ثنْذِينْثْ.
16 أجّْ إِ-ثنْ تّمْهَافَانْ ذَا ذ ذِيهَا خْ مَاشَّا،
أجّْ إِ-ثنْ خنِّي أَذْ ذِينْ سّنْسنْ بَارَّا، مَاڒَا وَارْ جِّيوْننْ،
17 نشّْ أَذْ غنّْجغْ خْ جّْهذْ نّكْ،
غَارْ ثفُّوثْ أَذْ سْڒِيوڒْوغْ خْ ثْمخْسِيوْثْ نّكْ إِشوَّارنْ،
مَاغَارْ ثُوغَا شكْ ذ إِجّْ ن لْپُورْجْ يُوعْڒَانْ إِ نشّْ،
ذ أَمْشَانْ ن ثَاروْڒَا ذڭْ وَاسّْ ن ڒحْصَارثْ إِنُو.
18 جّهْذْ إِنُو، نشّْ أَذْ خَاكْ زهّْذغْ،
مَاغَارْ شكْ أَربِّي ذ لْپُورْجْ يُوعْڒَانْ إِنُو،
أَربِّي ن ثْمخْسِيوْثْ إِنُو إِشوَّارنْ.