‏1 إِ ؤُمقّْرَانْ ن إِمغْنَاجنْ. ’وَارْ ث تَّاردّدْجْ!‘ ن ذَاوُوذْ.

ثِيرَا إِنقْشنْ.

‏2 مَا ثسَّاوَاڒمْ س ثِيذتّْ ثَاسڭْذَا ذڭْ ؤُسغْذِي؟

مَا ثْحكّْممْ ثَارْوَا ن بْنَاذمْ س ڒْحقّْ؟

‏3 لَّ، مَاشَا ذڭْ وُوڒْ نْومْ ثتّڭّمْ ڒْغشّْ،

خْ ثمُّورْثْ ثْوزّْنمْ لْعُونْفْ ن إِفَاسّنْ نْومْ.

‏4 زڭْ وَامِي دْجَانْ ذِي ڒمْڒَاوثْ فّْغنْ إِعفَّاننْ زڭْ وبْرِيذْ،

زڭْ ؤُعذِّيسْ ن يمَّاثْسنْ ودَّارنْ أَيْثْ ن بُو-إِخَارِّيقنْ.

‏5 أَقَا ذَايْسنْ سّمْ أَمْ سمّْ ن ؤُفِيغَارْ.

نِيثْنِي أَمشْنَاوْ إِشْثْ ن ثْڒفْسَا ثَاذهْشُورْثْ ثنِّي إِقّْننْ أَمزُّوغْ نّسْ، ^▪  

‏6 ثنِّي وَارْ إِتّسْڒِينْ غَارْ ثْمِيجَّا ن إِعزَّامنْ،

ؤُڒَا غَارْ ثْمِيجَّا ن ؤُسحَّارْ نِّي إِتّْحَاكَانْ أَطَّاسْ ذِي ثْسحَّارْثْ.

‏7 أَ أَربِّي، أَرْژْ أَسنْ ثِيغْمَاسْ ذڭْ ؤُقمُّومْ نْسنْ،

أَرْژْ ثِيغْمَاسْ ن ثغْمَارْثْ ن إِيْرَاذنْ إِمژْيَاننْ، أَ سِيذِي!

‏8 أجّْ إِ-ثنْ أَذْ فسْينْ، أَڒَامِي أَذْ فّْغنْ أَمْ وَامَانْ.

مَاڒَا إِمحّضْ ڒْقوْسْ س فْڒِيثْشَاثْ نّسْ، أجّْ إِ-ثنْ وَارْ قْضِيعنْ.

‏9 أجّْ إِ-ث أَذْ إِفْنَا أَمْ ؤُپُوشّڒْ إِرِيزّنْ.

أجّْ إِ-ثنْ وَارْ ژَترّنْ ثْفُوشْثْ، أَمشْنَاوْ وطُّو ن ؤُعذِّيسْ ن ثْمطُّوثْ. ^▫  

‏10 قْبڒْ  إِ غَا أَشَانْثْ مَارْمِيثَاثْ نْومْ أَكْ-ذ ڒحْمُو ن شْبَارْقْ أَكْ-ذ إِسنَّاننْ،

أَذْ ذَايسْ إِصُوضْ أَڒَامِي أَذْ يَاژّڒْ خْ ويْسُومْ ذ أَزِيزَا نِيغْ خْ ويْسُومْ إِتّحْذُوذُوقنْ.

‏11 أَمْسڭّذْ أَذْ إِفَارْحْ خْمِي إِ غَا إِژَارْ أَنْثَاقمْ.

نتَّا أَذْ إِسِّيرْذْ إِضَارنْ نّسْ ذڭْ إِذَامّنْ ن إِعفَّاننْ.

‏12 أَذْ يِينِي بْنَاذمْ: ”خنِّي أَقَا ذِينْ ڒْغِيدْجثْ إِ ؤُمْسڭّذْ،

أَقَا ذِينْ إِجّْ ن أَربِّي نِّي إِحكّْمنْ ذِي ثمُّورْثْ.“