‏1 إِ ؤُمقّْرَانْ ن إِمغْنَاجنْ. ’وَارْ ث تَّاردّدْجْ!‘ ن ذَاوُوذْ.

ثِيرَا إِنقْشنْ. ؤُمِي يَارْوڒْ زِي شَاوُولْ ذڭْ إِفْرِي. ^▪  

‏2 حِينّْ خَافِي، أَ أَربِّي، حِينّْ خَافِي، مَاغَارْ ڒعْمَارْ إِنُو يَارْوڒْ-د غَاركْ.

نشّْ أَروْڒغْ ذِي ثِيڒِي ن وَافْرِيونْ نّكْ، غَارسْ أَڒْ غَا عْذُونْثْ ڒْمُوصِيبَاثْ.

‏3 نشّْ أَذْ ڒَاغِيغْ غَارْ أَربِّي، أَمْعُودْجِي خْ كُوڒْشِي،

غَارْ أَربِّي ونِّي ذ أَيِي غَا إِنذْهنْ غَارْ ؤُنڭَّارْ إِصبْحنْ.

‏4 نتَّا أَذْ د-إِسّكّْ أَسنْجمْ إِنُو زڭْ ؤُجنَّا،

أَذْ إِسّْبهْذڒْ ونِّي ذ أَيِي د-إِضفَّارنْ. سِيلَاهْ.

أَربِّي أَذْ إِسّكّْ ثَامخْسِيوْثْ نّسْ إِشوَّارنْ ذ ڒَامَانْ نّسْ.

‏5 ڒعْمَارْ إِنُو أَقَا-ث جَارْ إِيْرَاذنْ،

زّْڒغْ جَارْ ثَارْوَا ن بْنَاذمْ، إِنِّي إِدْجَانْ أَمْ إِصفْضَاونْ يَارقّنْ.

ثِيغْمَاسْ نْسنْ أَمْ لَانْسَاثْ ذ فْڒِيثْشَاثْ ن ڒْقوْسْ،

إِڒسْ نْسنْ أَمْ إِجّْ ن سِّيفْ إِقْضعْ.

‏6 أَ أَربِّي، سْڭعّذْ إِخفْ نّكْ ثِيوَا إِ إِجنْوَانْ،

أَرّْ أَعُودْجِي نّكْ سنّجْ إِ مَارَّا ثَامُّورْثْ، ^▪  

‏7 نِيثْنِي ڭِّينْ ثْرَاشَّا إِ إِصُورَافْ إِنُو،

ڒعْمَارْ إِنُو ثُوغَا إِغْنسْ.

نِيثْنِي غْزِينْ أَيِي أَحْفُورْ،

مَاشَا وْضَانْ ذَايسْ سِيمَانْثْ نْسنْ. سِيلَاهْ. ^▪  

‏8 أَ أَربِّي، ؤُڒْ إِنُو يَاركّنْ، ؤُڒْ إِنُو يَاركّنْ.

أَقَا نشّْ أَذْ غنّْجغْ أَذْ زهّْذغْ. ^▪  

‏9 فَاقْ، أَعُودْجِي إِنُو! فَاقْ، لْهَارْبَا ذ ڒْڭَامْبْرِي!

نشّْ تّخْسغْ أَذْ سّْفَاقغْ ثَافَاوْثْ ن ڒفْجَارْ.

‏10 نشّْ أَذْ شكْ قَاذِيغْ جَارْ ڒڭْنُوسْ، أَ سِيذِي إِنُو،

أَذْ زهّْذغْ جَارْ شُّوعُوبْ إِ شكْ. ^▪  

‏11 مَاغَارْ ثَامخْسِيوْثْ نّكْ إِشوَّارنْ ثتَّاكّْوَاضْ أَڒْ إِجنْوَانْ،

ڒَامَانْ نّكْ أَڒْ إِسيْنُوثنْ. ^▪  

‏12 أَ أَربِّي، سْڭعّذْ إِخفْ نّكْ ثِيوَا إِ إِجنْوَانْ،

أَرّْ أَعُودْجِي نّكْ سنّجْ إِ مَارَّا ثَامُّورْثْ.