‏1 إِ ؤُمقّْرَانْ ن إِمغْنَاجنْ. س ثغْنِينْثْ ن ’إِشْثْ ن ثذْبِيرْثْ إِبكّْممْ ذڭْ إِمُوشَانْ إِڭّْوجنْ‘. ن ذَاوُوذْ. ثِيرَا إِنقْشنْ. ڒَامِي ث طّْفنْ إِفِيلِيسْطِينِييّنْ ذِي جَاثْ. ^▪  

‏2 حِينّْ خَافِي، أَ أَربِّي، مَاغَارْ إِجّْ ن بْنَاذمْ يَارزُّو أَذْ أَيِي إِصَارْضْ،

إِحصَّارْ أَيِي إِجّْ ن ؤُمْجَاهذْ أَسّْ مَارَّا.

‏3 إِنِّي ذ أَيِي إِحصَّارنْ خْسنْ أَذْ أَيِي صَارْضنْ أَسّْ مَارَّا،

مَاغَارْ إِنِّي كِيذِي إِتّْمنْغَانْ أَقَا أَثنْ ذڭْ وَاطَّاسْ، أَ أَمْعُودْجِي خْ كُوڒْشِي!

‏4 ذڭْ وَاسّْ إِ ذِي إِ غَا ڭّْوذغْ،

أَذْ خَاكْ تّشْڒغْ.

‏5 خْ أَربِّي، ونِّي ؤُمِي غَا صبْحغْ أَوَاڒْ نّسْ،

خْ أَربِّي إِ تّشْڒغْ، وَارْ تّڭّْوِيذغْ شَا،

مَاغَارْ مِينْ زمَّارنْ أَذْ أَيِي ڭّنْ مِيدّنْ؟ ^▫  

‏6 نِيثْنِي قدْجْبنْ أَوَاڒنْ إِنُو أَسّْ إِكْمڒْ،

مَارَّا ثْنَاوِي نْسنْ أَقَا أَثنْ خَافِي ذ ڒْغَارْ.

‏7 نِيثْنِي مُوننْ، نُوفَّارنْ،

نِيثْنِي حطَّانْ إِنَارْزِيونْ إِنُو،

خْمِي أَرزُّونْ أَذْ نْغنْ ڒعْمَارْ إِنُو.

‏8 مَا زمَّارنْ أَذْ أَروْڒنْ وَاخَّا ڭِّينْ ڒْغشّْ؟

سهْوَا ڒڭْنُوسْ ذڭْ وغْضَابْ نّكْ، أَ أَربِّي!

‏9 شكْ ثْحسّْبذْ ؤُسَّانْ ن وطْلَاعْ إِنُو.

أڭّْ إِمطَّاونْ إِنُو ذِي ثْزيَّاثْ ن وَامَانْ نّكْ،

مَا وَارْ دْجِينْثْ ذڭْ وذْلِيسْ نّكْ؟

‏10 خنِّي أَذْ ذوْڒنْ ڒْعذْيَانْ إِنُو غَارْ ضفَّارْ،

ذڭْ وَاسّْ ؤُمِي غَا ڒَاغِيغْ.

نشّْ سّْنغْ أَيَا: أَربِّي أَقَا-ث أَكِيذِي.

‏11 خْ أَربِّي، ونِّي ؤُمِي غَا سّمْغَارغْ أَوَاڒْ نّسْ،

خْ سِيذِي، ونِّي ؤُمِي غَا سّمْغَارغْ أَوَاڒْ نّسْ،

‏12 خْ أَربِّي إِ خفْ تّشْڒغْ، وَارْ تّڭّْوِيذغْ شَا،

مَاغَارْ مِينْ إِزمَّارْ بْنَاذمْ أَذْ أَيِي يڭّْ؟ ^▪  

‏13 خَافِي، أَ أَربِّي، أَرْسِينْ لْوُوعُوذْ إِ شكْ إِتّْوَاڭّنْ.

أَذْ ثنْ كمّْڒغْ إِ شكْ س ؤُقَاذِي.

‏14 مَاغَارْ شكْ ثسّْنجْمذْ ڒعْمَارْ إِنُو زِي ڒْموْثْ،

ؤُ مَا وَارْ ثحْضِيذْ ؤُڒَا ذ إِضَارنْ إِنُو زڭْ ؤُنقْرَاضْ،

حِيمَا أَذْ ؤُيُورغْ زَّاثْ إِ وُوذمْ ن أَربِّي ذِي ثْفَاوْثْ ن يِينِّي إِدَّارنْ؟