55
1 إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ. أَخمِّي ن ذَاوُوذْ.
2 أَ أَربِّي، سڒْ إِ ثْژَادْجِيثْ إِنُو،
وَارْ سّْنُوفَّارَا شَا إِخفْ نّكْ زَّاثْ إِ ؤُزَاوڭْ إِنُو.
3 حْضَا أَيِي ؤُ أَرّْ-د خَافِي.
نشّْ تّْرَاحغْ تَّاسغْ-د غَارْ زَّاثْ ذ ضفَّارْ أَمْ تّْشثْشِيغْ ؤُ سّْغُونْفِيغْ.
4 زِي سِّيبّثْ ن ڒْحسّْ ن ڒعْذُو، زڭْ ؤُهُوذِّي ن إِعفَّاننْ،
مَاغَارْ نِيثْنِي هجْمنْ-د خَافِي س ڒْمُوعْصِييّثْ
ؤُ ضفَّارنْ أَيِي س ؤُخيّقْ.
5 ؤُڒْ إِنُو إِتّقّسْ أَيِي ذَاخڒْ،
إِنخْڒِيعنْ ن ڒْموْثْ وْضَانْ-د خَافِي.
6 ثِيڭّْوُوذِي ذ ثَارْجِيجِيثْ طّْفنْثْ أَيِي،
ؤُڒَا ذ أَرْجفْ إِحْصَارْ أَيِي.
7 نشّْ نِّيغْ: ”مْڒِي ذ أَيِي وْشِينْ أَفْرِيونْ أَمْ ثذْبِيرْثْ،
خنِّي إِڒِي ضْوِيغْ، أَذْ زذْغغْ ذِي شَا ن ومْشَانْ.“
8 خْزَارْ، أَذْ أَروْڒغْ غَارْ ڒَاڭّْوَاجْ قَاعْ،
أَذْ سّنْسغْ ذِي ڒخْڒَا. سِيلَاهْ.
9 أَذْ ذغْيغْ حِيمَا أَذْ تّْوَافكّغْ زڭْ ؤُسمِّيضْ، زِي ثْحَارْيَاضْثْ.
10 صَارْضْ إِ-ثنْ، أَ سِيذِي إِنُو، سبْضَا إِڒسْ نْسنْ،
مِينْزِي تّْوَاڒِيغْ لْعُونْفْ ذ ؤُمنْغِي ذِي ثنْذِينْثْ.
11 أَسّْ ذ دْجِيڒثْ ڭُّورنْ ذڭْ ونّضْ نّسْ خْ ڒحْيُوضْ،
ؤُ غَارْ ذَاخڒْ نّسْ أَقَا ذِينْ ڒغْبنْ ذ ثَامَارَا.
12 ڒْغَارْ أَقَا-ث ذَاخڒْ نّسْ،
أَزَّايْ نّسْ وَارْ زَّايسْ إِتّْحيِّيذْ شَا دّدْجْ ذ وشْمَاثْ.
13 مَاغَارْ وَارْ إِدْجِي ذ ڒعْذُو ونِّي ذ أَيِي إِسّحْقَارَانْ،
مِينْزِي أَيَا زمَّارغْ أَذْ ث كْسِيغْ.
وَارْ إِدْجِي ؤُڒَا ذ ونِّي ذ أَيِي إِشَارّْهنْ ذ ونِّي إِسّمْغَارنْ إِخفْ نّسْ س وَاوَاڒْ خَافِي،
مِينْزِي زَّايسْ زمَّارغْ أَذْ نُّوفَّارغْ!
14 مَاشَا أَقَا ذ شكْ، أَ بْنَاذمْ، شكْ ذ أَقْرِينْ إِنُو،
أَمدُّوكّڒْ إِنُو ذ ؤُمْقَارّبْ إِنُو!
15 نشِّينْ، إِنِّي إِڭُّورنْ أَكْ-ذ وَايَاوْيَا ذِي تِّيقّثْ،
نڭُّورْ غَارْ ثَادَّارْثْ ن أَربِّي ذڭْ ؤُهِيمُورْ.
16 أَذْ خَاسنْ ثوْضَا ڒْموْثْ أَڒَامِي د-هْوَانْ أَمْ دَّارنْ ذِي ڒَاخَارْثْ،
مَاغَارْ أَقَا ذِينْ ڒْغَارْ ذِي ثُوذْرِينْ نْسنْ، ذڭْ وُوڒَاونْ نْسنْ. ▫
17 نشّْ، وَاهْ نشّْ أَذْ ڒَاغِيغْ خْ أَربِّي،
سِيذِي أَذْ أَيِي إِسّنْجمْ.
18 غَارْ ثْمذِّيثْ ؤُ غَارْ ثُوفُّوثْ ؤُ س ؤُزِيڒْ أَذْ شثْشِيغْ، أَذْ سّْغُونْفغْ،
ؤُ نتَّا أَذْ إِسڒْ إِ ثْمِيجَّا إِنُو.
19 نتَّا إِفْذِي ڒعْمَارْ إِنُو ذِي ڒهْنَا زڭْ إِنِّي خَافِي إِهجْمنْ،
مِينْزِي ثُوغَا أَثنْ ذڭْ وَاطَّاسْ ضِيدّْ إِنُو. ▫
20 أَربِّي أَذْ إِسڒْ، أَذْ ثنْ د-إِسّهْوَا.
نتَّا إِتّْغِيمَا زڭْ وشْحَاڒْ ؤُيَا. سِيلَاهْ.
أَقَا نِيثْنِي وَارْ تّْبذِّيڒنْ،
وَارْ تّڭّْوذنْ شَا أَربِّي.
21 نتَّا إِنطَّارْ أَفُوسْ ذڭْ إِنِّي أَكْ-ذ وِي إِڭَّا ڒهْنَا،
نتَّا إِسَّارُوصُّوضْ ڒْعَاهْذْ نّسْ.
22 أَقمُّومْ نّسْ يَارْضبْ حْسنْ زِي ثْرُوسِّي،
مَاشَا ذڭْ وُوڒْ نّسْ إِتُّورْجَا أَمنْغِي.
أَوَاڒنْ نّسْ ذ إِڒقَّاغنْ خْ زّشْثْ،
مَاشَا أَقَا أَثنْ أَمْ ڒسْيُوفْ تّْوَاجبْذنْ.
23 نْضَارْ أَمْنُوسْ نّكْ خْ سِيذِي ؤُ نتَّا أَذْ ذَايكْ إِتّْهِيلَّا.
عمَّارْصْ وَارْ إِتّجِّي أَمْسڭّذْ أَذْ إِفَارْغْ.
24 شكْ مَاشَا، أَ أَربِّي، أَذْ ثنْ ثسّهْوِيذْ ذڭْ وَانُو ن ؤُهلّكْ.
إِرْيَازنْ ن إِذَامّنْ ذ ڒْغشّْ وَارْ تّْكمّْڒنْ أَزْينْ ن وُوسَّانْ نْسنْ.
مَاشَا نشّْ تّشْڒغْ خَاكْ.