‏1 إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ. أَخمِّي ن ذَاوُوذْ.

‏2 ڒَامِي د-ؤُسِينْ إِزِيفِّييّنْ، نَّانْ أَسْ إِ شَاوُولْ:

”مَا وَارْ إِسّْنُوفَّارْ ذَاوُوذْ إِخفْ نّسْ غَارْنغْ؟“ ^▪  

‏3 سنْجمْ أَيِي، أَ أَربِّي، س يِيسمْ نّكْ،

أَغْ أَيِي ثَاسْغَارْثْ س ثْزمَّارْ نّكْ إِجهْذنْ.

‏4 أَ أَربِّي، سڒْ إِ ثْژَادْجِيثْ إِنُو،

سْحسّْ إِ وَاوَاڒنْ ن ؤُقمُّومْ إِنُو.

‏5 مَاغَارْ إِبَارَّانِييّنْ كَّارنْ أَكِيذِي،

أَيْثْ ن بُو-ڒخْشُونثْ أَرزُّونْ أَذْ أَيِي نْغنْ.

وَارْ تّڭّنْ شَا أَربِّي زَّاثْ إِ ثِيطَّاوِينْ نْسنْ. سِيلَاهْ. ^▫  

‏6 خْزَارْ، أَربِّي ذ أَمْعَاونْ إِنُو.

سِيذِي إِنُو أَقَا-ث جَارْ ينِّي ذ أَيِي إِسنّْذنْ.

‏7 نتَّا أَذْ إِخدْجصْ ڒْغَارْ إِ ينِّي ذ أَيِي إِحصَّارنْ.

قْضَا خَاسنْ ذِي ڒَامَانْ نّكْ.

‏8 س ڒْخَاضَارْ أَذْ أَشْ د-أَوْيغْ ثِيغَارْصَا،

أَذْ قَاذِيغْ إِسمْ نّكْ، أَ سِيذِي،

مَاغَارْ نتَّا ذ أَصبْحَانْ.

‏9 مَاغَارْ نتَّا إِسّنْجمْ أَيِي زِي مَارَّا ڒحْصَارثْ،

ؤُشَا يَارَّا أَيِي-د أَذْ خزَّارغْ خْ ڒْعذْيَانْ إِنُو سْوَادَّايْ.