‏1 إِ ؤُمقّْرَانْ ن إِمغْنَاجنْ. أَخمِّي ن ذَاوُوذْ.

‏2 ڒَامِي د-يُوسَا ذُووَاعْ، زِي إِذُومْ،

إِخبَّارْ شَاوُولْ، إِنَّا أَسْ:

”أَقَا ذَاوُوذْ يُوسَا-د غَارْ ثَادَّارْثْ ن أَخِيمَالِيكْ.“ ^▪  

‏3 مَامّشْ ثْفيّْشذْ زِي ثْعفَّانْثْ، أَ جِّيهڒْ؟

ثَامخْسِيوْثْ إِشوَّارنْ ن أَربِّي ثتّكّْ أَسّْ إِمُونْ.

‏4 إِڒسْ نّكْ إِتّْخَارّصْ ذِي ڒْغَارْ،

أَمشْنَاوْ إِجّْ ن ڒْمُوسْ إِقضْعنْ إِ ؤُحفِّي إِسُّوفُّوغْ أَشْمَاثْ.

‏5 شكْ تّخْسذْ ثَاعفَّانْثْ أَطَّاسْ خْ ثْصبْحَانْثْ،

ڒْهَارْذْ س إِخَارِّيقنْ كْثَارْ أَطَّاسْ خْ ڒْهَارْذْ ن ثْسڭْذَا. سِيلَاهْ.

‏6 شكْ ثتّخْسذْ أَوَاڒنْ إِهلّْكنْ،

ؤُڒَا ذ إِڒسْ إِشُّورْ س وشْمَاثْ.

‏7 مَاشَا أَربِّي أَذْ شكْ يَاردّدْجْ إِ ڒبْذَا،

نتَّا أَذْ شكْ إِطّفْ، أَذْ شكْ إِكّسْ زِي ثْزذِّيغْثْ.

نتَّا أَذْ شكْ إِقْڒعْ زڭْ إِژوْرَانْ نّكْ زِي ثمُّورْثْ ن يِينِّي إِدَّارنْ. سِيلَاهْ.

‏8 إِمْسڭَّاذنْ أَذْ ث ژَترنْ أَذْ ڭّْوذنْ.

أَذْ خَاسْ ضحْشنْ، أَذْ إِنِينْ:

‏9 ”خْزَارْ أَرْيَازْ إِجهْذنْ ونِّي ؤُمِي وَارْ إِڭِّي أَربِّي جّهْذْ نّسْ،

مَاشَا ثُوغَا إِتّْشڒْ خْ وَاڭْڒَا نّسْ أَمقّْرَانْ.

ثُوغَا إِذْوڒْ إِجْهذْ س ڒْغَارْ نّسْ.“

‏10 نشّْ أَذْ إِڒِيغْ أَمشْنَاوْ إِشْثْ ن ثْزِيثُونْثْ ثَازيْزَاوْثْ ذِي ثَادَّارْثْ ن أَربِّي.

نشّْ تِّيقّغْ ذِي ثْمخْسِيوْثْ إِشوَّارنْ ن أَربِّي إِ ڒبْذَا قَاعْ.

‏11 نشّْ أَذْ شكْ قَاذِيغْ إِ ڒبْذَا قَاعْ،

مَاغَارْ شكْ ثڭِّيذْ ث.

أَذْ سِّيثِيمغْ ذڭْ يِيسمْ نّكْ،

مَاغَارْ نتَّا ذ أَصبْحَانْ إِ إِمْثِيقَّانْ نّكْ.