‏1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ.

‏2 أَڒَامِي إِ غَارسْ د-يُوسَا ؤُنَابِي نَاثَانْ،

أَوَارْنِي ڒَامِي يُوذفْ ذَاوُوذْ خْ بَاثْشَابَاعَا. ^▫  ▪  

‏3 حِينّْ خَافِي، أَ أَربِّي، عْلَاحْسَابْ ثَامخْسِيوْثْ نّكْ إِشوَّارنْ.

مْسحْ إِخطَّانْ إِنُو عْلَاحْسَابْ أَفيّضْ ن أَرّحْمثْ نّكْ.

‏4 سِّيرْذْ ڒْمُوعْصِييّثْ إِنُو زَّايِي مَارَّا،

سِيزْذڭْ أَيِي زِي دّنْبْ إِنُو،

‏5 مَاغَارْ نشّْ سّْنغْ إِخطَّانْ إِنُو،

دّنْبْ إِنُو ڒبْذَا إِبدّْ أَيِي-د غَارْ ثِيطَّاوِينْ. ^▫  

‏6 أَكِيذكْ وَاهَا إِ خْضِيغْ،

ڭِّيغْ مِينْ إِدْجَانْ ذ أَعفَّانْ جَارْ ثِيطَّاوِينْ نّكْ،

أَڒَامِي شكْ ثْسڭّْذذْ ذڭْ وَاوَاڒنْ نّكْ،

ثصْفِيذْ ذِي ڒحْكَامَاثْ نّكْ.

‏7 خْزَارْ، تّْوَاخڒْقغْ-د ذِي دّْنُوبْ،

ذِي دّْنُوبْ ثكْسِي أَيِي يمَّا.

‏8 خْزَارْ، شكْ ثتّخْسذْ ثِيذتّْ ذِي ذَاخڒْ،

ذِي ثْنُوفّْرَا ثسّْشَانذْ أَيِي ثِيغِيثْ.

‏9 كْسِي خَافِي دّْنُوبْ س ثْعلْدْجثْ، خنِّي أَذْ ذوْڒغْ قُّورغْ،

سِيرْذْ أَيِي، خنِّي أَذْ ذوْڒغْ ذ أَشمْڒَاڒْ خْ وذْفڒْ. ^▪  

‏10 أَرّْ أَيِي أَذْ سْڒغْ أَرْشُوقْ ذ ڒفْرَاحثْ،

حِيمَا إِخْسَانْ نِّي إِ ثْڒبْزذْ شكْ،

أَذْ أَرْجِيجنْ زِي ڒفْرَاحثْ.

‏11 سْنُوفَّارْ دّْنُوبْ إِنُو زَّاثْ إِ وُوذمْ نّكْ،

مْسحْ إِ مَارَّا ڒْمُوعْصِييّثْ إِنُو.

‏12 خْڒقْ-د ذَايِي ؤُڒْ إِزْذِيڭْ، أَ أَربِّي،

جدّذْ ذِي ذَاخڒْ إِنُو إِجّْ ن أَرُّوحْ إِمثْننْ.

‏13 وَارْ ذ أَيِي نطَّارْ زڭْ وُوذمْ نّكْ،

وَارْ زَّايِي تّكّسْ أَرُّوحْ إِقدّْسنْ نّكْ.

‏14 أوْشْ أَيِي عَاوذْ ڒفْرَاحثْ ن ؤُسنْجمْ نّكْ،

ؤُڒَا ذ إِجّْ ن بُوحْبڒْ إِقدّنْ إِ كِيذِي غَا إِبدّنْ.

‏15 خنِّي أَذْ سّْغَارغْ إِبْرِيذنْ نّكْ إِ ينِّي خَاكْ إِعدَّانْ،

ؤُ ڭُّورْ أَذْ غَاركْ د-عقْبنْ إِمذْنَابْ.

‏16 سنْجمْ أَيِي زڭْ ؤُمَارْوَاسْ ن إِذَامّنْ، أَ أَربِّي، أَربِّي ن ؤُسنْجمْ إِنُو،

خنِّي أَذْ إِسْڒوْڒِيوْ إِڒسْ إِنُو خْ ثْسڭْذَا نّكْ.

‏17 أَرْزمْ أَيِي إِينْشِيشنْ إِنُو، أَ سِيذِي إِنُو،

خنِّي أَذْ إِبَارّحْ ؤُقمُّومْ إِنُو س شَّانْ نّكْ،

‏18 مَاغَارْ وَارْ ذ أَكْ ثشْقِي ثْغَارْصْثْ، إِڒِي وْشِيغْ أَشْ ت،

ثَاغَارْصْثْ ن وشْمَاضْ وَارْ ذ أَشْ د-ثتِّيسْ خْ ڒْخَاضَارْ.

‏19 ثِيغَارْصَا ن أَربِّي أَقَا أَثنْثْ ذ إِجّْ ن بُوحْبڒْ يَارژْ،

إِجّْ ن وُوڒْ إِدّزْ وَارْ ث ثسّحْقَارِيذْ، أَ أَربِّي!

‏20 أڭّْ ڒْخَارْ إِ صِيهْيُونْ عْلَاحْسَابْ أَرْضَا نّكْ،

بْنَا ڒحْيُوضْ ن ؤُرْشَالِيمْ!

‏21 خنِّي أَذْ ثَارْضِيذْ ذِي ثْغَارْصَا ن ڒْمُوعْصِييّثْ،

ذِي ثْغَارْصْثْ ن وشْمَاضْ إِكمّْڒنْ.

خنِّي أَذْ قدّْمنْ إِينْذُوزنْ خْ ؤُعَالْطَارْ نّكْ، خْ ڒْمذْبحْ نّكْ ن وشْمَاضْ.