‏1 إِجّْ ن ؤُزهّذْ ن أَسَافْ. أَربِّي خْ مَارَّا إِربِّيثنْ، سِيذِي إِسَّاوَاڒْ.

نتَّا إِتّْڒَاغَا إِ ثمُّورْثْ زِي مَانِي د-ثنْقَارْ ثْفُوشْثْ غَارسْ أَڒْ مَانِي ثغْڒِي.

‏2 زِي صِيهْيُونْ، أَژْرِي إِكمّْڒنْ،

إِتّْبَانْ أَربِّي إِتِّيسِّيقْ.

‏3 أَربِّي نّغْ أَذْ د-يَاسْ، وَارْ إِسّغْذْ شَا.

ثِيمسِّي زَّاثسْ أَذْ ثشّْ،

ثَاحَارْيَاضْثْ إِ ذ أَسْ د-إِتّنّْضنْ أَذْ ثْصُوضْ أَطَّاسْ.

‏4 نتَّا أَذْ إِڒَاغَا إِ إِجنْوَانْ سنّجْ،

ؤُ إِ ثمُّورْثْ حِيمَا أَذْ إِحْكمْ خْ ڒْڭنْسْ نّسْ:

‏5 ”سْمُونمْ-د غَارِي إِمْثِيقَّانْ إِنُو،

إِنِّي كِيذِي إِتّڭّنْ ڒْعَاهْذْ س ثْغَارْصْثْ.“

‏6 إِجنْوَانْ تّْبَارّْحنْ ثَاسڭْذَا نّسْ،

مَاغَارْ أَربِّي سِيمَانْثْ نّسْ أَقَا-ث ذ ڒْقَاضِي. سِيلَاهْ. ^▫  

‏7 ”سڒْ، أَ ڒْڭنْسْ إِنُو، ؤُ نشّْ أَذْ سِّيوْڒغْ، إِسْرَائِيل،

نشّْ أَذْ شهْذغْ ضِيدّْ نّكْ: أَقَا نشّْ، أَربِّي، ذ أَربِّي نّكْ!

‏8 وَارْ إِدْجِي خْ ثْغَارْصَا نّكْ أَذْ شكْ وبّْخغْ،

مَاغَارْ ثِيغَارْصَا نّكْ أَقَا أَثنْثْ ڒبْذَا زَّاثِي.

‏9 وَارْ كسِّيغْ شَا أَينْذُوزْ زِي ثَادَّارْثْ نّكْ،

ؤُڒَا ذ إِغَايْضنْ زِي ثقْوِيرِينْ نّكْ.

‏10 مَاغَارْ مَارَّا إِمُودَّارْ ن وزْغَارْ أَقَا إِنُو،

ڒْمَاڒْ خْ وَاڒفْ إِذُورَارْ. ^▫  

‏11 نشّْ سّْنغْ مَارَّا إِجْضَاضْ ن إِذُورَارْ،

مُومُّو ن ييَّارْ، أَقَا-ث إِنُو.

‏12 مْڒِي ثُوغَا ذَايِي ڒَاژْ، مَا وَارْ ذ أَشْ ث قَّارغْ،

مَاغَارْ إِنُو دُّونشْثْ ذ ؤُعمَّارْ نّسْ. ^▪  

‏13 مَا أَذْ شّغْ خنِّي أَيْسُومْ ن إِفُونَاسنْ،

نِيغْ إِذَامّنْ ن إِغَايْضنْ؟

‏14 أَوِي-د إِ أَربِّي ثَاغَارْصْثْ ن ؤُقَاذِي،

ؤُ كمّڒْ لْوُوعُوذْ نّكْ إِ ؤُمْعُودْجِي خْ كُوڒْشِي. ^▪  

‏15 ڒَاغَا أَيِي-د ذڭْ وَاسّْ ن ڒحْصَارثْ،

خنِّي أَذْ شكْ سّْنجْمغْ ؤُشَا شكْ أَذْ أَيِي ثڭّذْ شَّانْ.“

‏16 مَاشَا إِ ؤُعفَّانْ إِقَّارْ أَربِّي:

”مَايمِّي ثْبَارّْحذْ ثِيوصَّا إِنُو،

ؤُ ثڭِّيذْ ڒْعَاهْذْ إِنُو ذڭْ ؤُقمُّومْ نّكْ،

‏17 ؤُمِي ثْشَارّْهذْ تَّارْبِييّثْ إِنُو،

ؤُ ثنْضَارذْ أَوَاڒنْ إِنُو أَوَارْنِي أَشْ.

‏18 مَاڒَا ثژْرِيضْ إِجّْ ن ؤُخوَّانْ، أَمُّو إِ ثڭُّورذْ أَكِيذسْ،

ؤُ ثتّْصُورِيذْ أَكْ-ذ ينِّي إِزنَّانْ.

‏19 أَقمُّومْ نّكْ ثتَّارِّيذْ إِ-ث إِ ڒْغَارْ،

إِڒسْ نّكْ إِتّْخَارّصْ ذڭْ وشْمَاثْ.

‏20 ثتّْغِيمِيذْ ذِينِّي ثسَّاوَاڒذْ خْ ؤُمَاشْ،

ثسّفْذَاحضْ زِي مِّيسْ ن يمَّاسْ.

‏21 أَيَا ثتّڭّذْ ؤُ نشّْ سّغْذِيغْ.

تّْغِيڒْ أَشْ، أَقَا أَيِي أَمْ شكْ.

نشّْ أَذْ شكْ وبّْخغْ ؤُ أَذْ سَّارْسغْ دّْنُوبْ نّكْ زَّاثْ إِ ثِيطَّاوِينْ نّكْ.

‏22 فْهمْ أَيَا خنِّي، أَ شكْ إِ إِتُّونْ أَربِّي،

حِيمَا وَارْ شكْ ثْمزّْقغْ أَمْ وَارْ ذِينْ إِتِّيڒِي ؤُفكِّي.“

‏23 ونِّي د-إِتَّاوْينْ ثَاغَارْصْثْ ن ؤُقَاذِي، إِتّڭّْ أَيِي شَّانْ،

ؤُ إِسّوْجَاذْ أَبْرِيذْ حِيمَا أَذْ أَسْ سّشْنغْ أَسنْجمْ ن أَربِّي.