44
1 إِ ؤُمقّْرَانْ ن إِمغْنَاجنْ. زِي أَيْثْ ن قُورَاحْ. أَخمِّي. 2 أَ أَربِّي، نشِّينْ نسْڒَا ت س إِمزُّوغنْ نّغْ،
إِبَابَاثنْ نّغْ حَاجَانْ أَنغْ ت:
شكْ ثڭِّيذْ إِشْثْ ن ثْمڭِّيثْ ذ ثَامقّْرَانْثْ ذڭْ وُوسَّانْ نْسنْ،
ذڭْ وُوسَّانْ ن وشْحَاڒْ ؤُيَا.
3 س ؤُفُوسْ نّكْ أَقَا ثسُّوفّْغذْ ڒڭْنُوسْ زِي ثسْغَارْثْ نْسنْ،
خنِّي ثژُّوذْ ثنْ ذَايسْ.
شكْ ثڭِّيذْ ڒْغَارْ ذِي شُّوعُوبْ،
ثْبزّْعذْ ثنْ. ▪
4 نِيثْنِي مَاشَا وَارْ وَارْثنْ ثَامُّورْثْ س سِّيفْ،
أَغِيڒْ نْسنْ وَارْ ذ أَسنْ د-يِيوِي أَسنْجمْ،
مَاشَا أَفُوسْ نّكْ أَفُوسِي، أَغِيڒْ نّكْ ذ ثْفَاوْثْ ن وُوذمْ نّكْ،
مِينْزِي ؤُفِينْ أَرْضَا ذِي ثِيطَّاوِينْ نّكْ.
5 أَقَا شكْ ذ أَجدْجِيذْ إِنُو، أَ أَربِّي!
أوْشْ عَاذْ ڒخُّو ڒُومُورْ إِ إِسنْجَامنْ ن يَاعْقُوبْ.
6 أَكِيذكْ أَذْ نغْضڒْ إِنِّي ذ أَنغْ إِحصَّارنْ،
س يِيسمْ نّكْ أَذْ نعْفسْ خْ ينِّي خَانغْ إِتّمْعَاڒَانْ.
7 مَاغَارْ وَارْ تّشْڒغْ خْ ڒْقوْسْ إِنُو،
سِّيفْ إِنُو وَارْ ذ أَيِي إِسّنْجَامْ.
8 مَاغَارْ شكْ ثسّنْجَامذْ أَنغْ زڭْ إِنِّي ذ أَنغْ إِحصَّارنْ،
ثسّْبهْذِيڒذْ إِنِّي ذ أَنغْ إِشَارّْهنْ.
9 نْصبّحْ إِ أَربِّي أَسّْ مَارَّا،
أَذْ نْقَاذَا إِسمْ نّكْ إِ ڒبْذَا. سِيلَاهْ.
10 مَاشَا ڒخُّو ثنْضَارذْ أَنغْ ؤُ ثسّْبهْذَاڒذْ أَنغْ،
شكْ وَارْ ثتّفِّيغذْ شَا أَكْ-ذ ڒْعسْكَارَاثْ نّغْ غَارْ ؤُمنْغِي. ▪
11 شكْ ثجِّيذْ أَنغْ نتّْرَاكّْوَاڒْ زَّاثْ إِ ونِّي ذ أَنغْ إِحصَّارنْ،
ؤُ إِنِّي ذ أَنغْ إِشَارّْهنْ تّْكشّْضنْ مِينْ ثخْسنْ إِ يِيخفْ نْسنْ.
12 شكْ ثوْشِيذْ أَنغْ أَمْ وُودْجِي إِ مَاشَّا،
ثزُّوزَّارذْ أَنغْ جَارْ ڒڭْنُوسْ.
13 شكْ ثزّْنُوزِيذْ ڒْڭنْسْ نّكْ س وَالُو،
ؤُ ذڭْ ؤُزّنْزِي نْسنْ وَارْ غَاركْ بُو ڒفْضڒْ.
14 شكْ ثتّڭّذْ أَنغْ ذ ڒْحڭْرَا إِ وَاجَّارنْ نّغْ،
ذ أَسْثهْزِي ذ ؤُبهْذڒْ غَارْ ينِّي ذ أَنغْ-د إِتّنّْضنْ. ▪
15 شكْ ثتّڭّذْ أَنغْ ذ أَمذْيَا جَارْ ڒڭْنُوسْ،
ثتّڭّذْ أَذْ خَانغْ هزّنْ أَزدْجِيفْ جَارْ شُّوعُوبْ.
16 أَسّْ مَارَّا ڒْعَارْ إِنُو أَقَا-ث زَّاثِي جَارْ ثِيطَّاوِينْ إِنُو،
ڒحْيَا إِذْڒَا أَغمْپُوبْ إِنُو،
17 زِي سِّيبّثْ ن ڒْحسّْ ن يِينِّي إِسّحْقَارَانْ ؤُ تّْشقَّافنْ،
زِي سِّيبّثْ ن ڒعْذُو ذ ونِّي يَارزُّونْ أَنْثَاقمْ.
18 أَيَا مَارَّا إِكَّا خَانغْ، مَاشَا وَارْ شكْ نتُّو،
وَارْ نْغشّْ شَا ذِي ڒْعَاهْذْ نّكْ.
19 ؤُڒْ نّغْ وَارْ إِذْوِيڒْ غَارْ ضفَّارْ،
إِصُورَافْ نّغْ وَارْ د-فِّيغنْ شَا زڭْ ؤُمسْرُوقْ نّكْ،
20 وَاخَّا شكْ ثْڒبْزذْ أَنغْ ذڭْ ومْشَانْ ن وُوشَّاننْ ن ڒخْڒَا،
ؤُ ثذْڒِيذْ أَنغْ س ثِيڒِي ن ڒْموْثْ.
21 مْڒِي ثُوغَا نتُّو إِسمْ ن أَربِّي نّغْ،
نسّْوِيژّضْ إِفَاسّنْ نّغْ غَارْ يِيجّْ ن أَربِّي ذ أَغْرِيبْ،
22 مَا إِڒِي أَربِّي وَارْ يَارزُّو ذِي مَانْ أَيَا؟
أَقَا نتَّا يَارڭّبْ خْ مِينْ إِنُّوفَّارنْ ذڭْ وُوڒْ.
23 مَاغَارْ ذِي طّْوعْ نّكْ نقّنْ أَنغْ كُوڒْ أَسّْ،
أَقَا حسّْبنْ أَنغْ أَمْ وُودْجِي ن ثْغَارْصْثْ. ▪
24 فَاقْ، مَايمِّي ثطّْصذْ، سِيذِي إِنُو؟
فَاقْ، وَارْ ذ أَنغْ نطَّارْ إِ ڒبْذَا!
25 مَايمِّي إِ غَا ثفَّارذْ ؤُذمْ نّكْ،
أَذْ ثتُّوذْ ڒغْبنْ ذ دّدْجْ نّغْ؟
26 مَاغَارْ ڒعْمَارْ نّغْ إِتَّاضَارْ غَارْ ثْعجَّاجْثْ،
أَعذِّيسْ نّغْ إِڒصّقْ ذِي ثمُّورْثْ.
27 كَّارْ، أوْشْ أَنغْ أَفُوسْ،
فْذِي خَانغْ ذِي طّْوعْ ن ثْمخْسِيوْثْ نّكْ إِشوَّارنْ. ▫