أَذْلِيسْ وِيسّْ ثْنَاينْ - إِزهِّيذنْ 42-71
42
1 إِ ؤُمقّْرَانْ ن إِمغْنَاجنْ. أَخمِّي ن أَيْثْ ن قُورَاحْ. 2 أَمْ إِغَايْضْ ن وزْغَارْ إِتّْمژْرِي غَارْ ثْغزْرِينْ ن وَامَانْ،
أَمُّو ؤُڒَا ذ ؤُڒْ إِنُو إِتّْمژْرِي غَاركْ، أَ أَربِّي.
3 ڒعْمَارْ إِنُو إِتّْفَاذَا غَارْ أَربِّي، غَارْ أَربِّي إِدَّارنْ.
مڒْمِي إِ غَا أَذْفغْ ؤُ أَذْ بَانغْ زَّاثْ إِ وُوذمْ ن أَربِّي؟ ▪
4 إِمطَّاونْ إِنُو ثُوغَا أَثنْ ذ أَغْرُومْ إِنُو أَسّْ ذ دْجِيڒثْ،
ؤُمِي ذ أَيِي قَّارنْ أَسّْ إِمُونْ:
”مَانِي إِدْجْ أَربِّي نّكْ؟“ ▪
5 نشّْ تِّيذَارغْ ذِي مَانْ أَيَا ؤُ سّْفَارّْغغْ ڒعْمَارْ إِنُو خَافِي،
مَاغَارْ نشّْ تّْنُومغْ ڭّعّْذغْ ذڭْ إِجّْ ن ؤُهِيمُورْ إِقّنْ،
أَمْ ڭُّورغْ أَكِيذْسنْ غَارْ ثَادَّارْثْ ن أَربِّي،
س ڒْحسّْ ن ؤُسْڒِيوْڒوْ ذ ؤُقَاذِي، إِجّْ نْ ڒْغَاشِي إِتّْعيّْذنْ.
6 أَ ڒعْمَارْ إِنُو، مَايمِّي ثْقنْضذْ أَمُّو، ثْهكّْوڒذْ ذَايِي؟
رَاجَا أَربِّي،
مَاغَارْ أَذْ قِّيمغْ أَذْ ث قَاذِيغْ عَاذْ خْ إِسنْجَامنْ إِ د-إِتّفّْغنْ زِي زَّاثْ ن وُوذمْ نّسْ. ▪
7 أَ أَربِّي، ڒعْمَارْ إِنُو إِقْنضْ أَمُّو ذَايِي.
س ؤُينِّي تِّيذَارغْ شكْ زِي ثمُّورْثْ ن لْ'ؤُرْذُونْ ،
زڭْ إِذُورَارْ ن هِيرْمُونْ، زڭْ وذْرَارْ ن مِيصْعَارَا.
8 ڒْحمْڒثْ ن وَامَانْ ثتّْڒَاغَا إِ ڒْحمْڒثْ نّغْنِي غَارْ زّْهِيرْ ن إِشرْشُورنْ نّكْ،
مَارَّا إِغزْرَانْ ذ ڒمْوَاجْ كِّينْ خَافِي.
9 أجّْ سِيذِي أَذْ إِوصَّا ثَامخْسِيوْثْ نّسْ إِشوَّارنْ س وَاسّْ،
ؤُ أَذْ غَارِي يِيڒِي يِيجّْ ن إِزْڒِي ذِي دْجِيڒثْ،
أَقَا-ث ذ ثْژَادْجِيثْ إِ أَربِّي ن ثُوذَارْثْ إِنُو.
10 نشّْ أَذْ إِنِيغْ إِ أَربِّي: ”ثَاصْضَارْثْ إِنُو ذ شكْ، مَايمِّي ذ أَيِي ثتُّوذْ؟
مَايمِّي ڭُّورغْ ذڭْ ورُّوضْ ذ أَبَارْشَانْ زِي سِّيبّثْ ن دّدْجْ ن ڒعْذُو؟“ ▪
11 إِنِّي ذ أَيِي إِحصَّارنْ سّْبهْتّْڒنْ أَيِي س إِشْثْ ن ثَاجِّيثْ إِنقّنْ ذڭْ إِخْسَانْ إِنُو،
ؤُمِي ذ أَيِي قَّارنْ: ”مَانِي إِدْجْ أَربِّي نّكْ؟“
12 أَ ڒعْمَارْ إِنُو، مَايمِّي ثْقنْضذْ أَمُّو، ؤُ ثْهوّْڒذْ ذَايِي؟
رَاجَا أَربِّي، مَاغَارْ أَذْ ث قَاذِيغْ عَاذْ خْ إِسنْجَامنْ زڭْ وُوذمْ نّسْ، أَقَا-ث ذ أَربِّي إِنُو.