41
1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 سّعْذْ ن ونِّي إِفهّْمنْ إِ ؤُمَارْخُو.
سِيذِي أَذْ ث إِفكّْ ذڭْ وَاسّْ ن ڒْغَارْ.
3 سِيذِي ڭُّورْ أَذْ ث إِحْضَا ؤُ أَذْ ث يجّْ أَذْ إِدَّارْ،
ؤُشَا نتَّا أَذْ يَارّْ مژْرِي ذِي ثمُّورْثْ.
وَارْ ث تّْسلَّامْ شَا غَارْ مِينْ ذِينْ إِدْجَانْ ذِي ڒعْمَارْ ن ڒْعذْيَانْ نّسْ.
4 سِيذِي أَذْ كِيذسْ إِبدّْ ذِي ثَاسُّوثْ ن ڒهْڒَاشْ.
شكْ ثتّْبدّْڒذْ مَارَّا رشْثُو نّسْ ؤُمِي إِهدْجشْ.
5 نشّْ نِّيغْ: ”أَ سِيذِي، حِينّْ خَافِي، سْڭنْفَا ڒعْمَارْ إِنُو،
مَاغَارْ خْضِيغْ أَكِيشْ.“
6 ڒْعذْيَانْ إِنُو سَّاوَاڒنْ خَافِي س ڒْغَارْ:
”مڒْمِي إِ غَا إِمّثْ ؤُ أَذْ إِتّْوَاكّسْ إِسمْ نّسْ؟“
7 مَاڒَا يُوسَا-د حذْ مَاحنْذْ أَذْ إِژَارْ، إِسَّاوَاڒْ ذِي ڒْبَاطڒْ.
ؤُڒْ نّسْ إِسّْمُونْ غَارسْ ڒْغشّْ،
خنِّي إِتّفّغْ غَارْ بَارَّا، إِسَّاوَاڒْ.
8 مَارَّا إِنِّي ذ أَيِي إِشَارّْهنْ ثمْثَامْننْ خَافِي جْمِيعْ،
أَقَا-ثنْ تّْخَارِّيصنْ ذَايِي مَاحنْذْ أَذْ أَيِي ڭّنْ ڒْغَارْ.
9 إِڒْقفْ إِ-ث أَشْثَابْ أَبَارْشَانْ،
ؤُ ونِّي د-إِوْضَانْ أَمُّو، وَارْ د-إِتّكَّارْ عَاذْ.
10 ؤُڒَا ذ أَرْيَازْ نِّي وِي أَكْ-ذ دَّارغْ ذِي ڒهْنَا،
ونِّي ذِي تِّيقِّيغْ، ونِّي إِشّنْ أَغْرُومْ إِنُو،
أَقَا إِسّمْغَارْ خَافِي أَنِيرْزْ نّسْ. ▪
11 شكْ مَاشَا، أَ سِيذِي، حِينّْ خَافِي ؤُ سْنكَّارْ أَيِي-د،
خنِّي نشّْ أَذْ ثنْ خدْجْصغْ.
12 س مَانْ أَيَا أَذْ سّْنغْ أَقَا ؤُسِيغْ أَشْ-د إِ شكْ خْ ڒْخَاضَارْ،
مَاحنْذْ ڒعْذُو إِنُو وَارْ زَّايِي إِفَارّحْ س ؤُسْڒِيوْڒوْ.
13 ؤُ خَافِي، أَقَا شكْ تِّيشذْ أَيِي أَفُوسْ ذِي سِّيبّثْ ن ڒكْمَارثْ إِنُو،
ثسّْبدّذْ أَيِي زَّاثْ إِ وُوذمْ نّكْ إِ ڒبْذَا.
14 أَذْ إِتّْوَابَاركْ سِيذِي، أَربِّي ن إِسْرَائِيل،
زِي ڒبْذَا أَڒْ إِ ڒبْذَا! أَمِينْ، وَاهْ أَمِينْ!