40
1 إِ ؤُمقّْرَانْ ن إِمغْنَاجنْ. ن ذَاوُوذْ. أَزهّذْ. 2 سِّيثِيمغْ قَاعْ خْ سِيذِي.
نتَّا يَارَّا-د غَارِي س ؤُزدْجِيفْ،
إِسّْحسّْ غَارْ ؤُغُويِّي إِنُو.
3 نتَّا إِسّْڭعّذْ أَيِي-د زڭْ إِجّْ ن وَانُو إِنقّنْ،
زڭْ ؤُبدْجَاعْ ذ ؤُبَارْيُوضْ،
نتَّا إِسَّارْسْ إِضَارنْ إِنُو خْ ثصْضَارْثْ،
إِسّمْثنْ إِصُورَافْ إِنُو.
4 نتَّا إِڭَّا أَيِي إِجّْ ن يزْڒِي ذ أَمَايْنُو ذڭْ ؤُقمُّومْ إِنُو،
إِجّْ ن إِزْڒِي ن ؤُصبّحْ إِ أَربِّي.
أَطَّاسْ أَذْ ث ژَترنْ، أَذْ ثشْڒنْ خْ سِيذِي.
5 سّعْذْ ن ورْيَازْ إِجهْذنْ ونِّي إِتّشْڒنْ خْ سِيذِي،
ونِّي وَارْ إِتّْميّْڒنْ غَارْ أَيْثْ ن بُو-نّْفَاخثْ،
ؤُڒَا غَارْ ينِّي إِودَّارنْ غَارْ ؤُخَارِّيقْ.
6 أَطَّاسْ، أَ سِيذِي، أَربِّي إِنُو، ذ لْمُوعْجِيزَاثْ نِّي ثڭِّيذْ،
ؤُڒَا ذ مِينْ ثنْوِيذْ خَانغْ.
ؤُڒَا ذ إِجّْ إِزمَّارْ أَذْ إِعْبَارْ إِخفْ نّسْ أَكِيذكْ.
نشّْ أَذْ ثنْثْ هَاجِيغْ، أَذْ زَّايْسنْثْ سِّيوْڒغْ.
أَقَا نِيثنْثِي ذڭْ وَاطَّاسْ وَارْ زمَّارنْ أَذْ تّْوَاحسْبنْ.
7 وَارْ ثخْسذْ ثَاغَارْصْثْ ذ ثوْهِيبْثْ ن ڒْغِيدْجثْ.
شكْ ثَارْزْمذْ إِمزُّوغنْ إِنُو.
ثَاغَارْصْثْ ن وشْمَاضْ ذ ثْغَارْصْثْ ن دّنْبْ وَارْ ثنْثْ ثتَّارذْ. ▪
8 خنِّي نِّيغْ: ”خْزَارْ، نشّْ أَذْ د-أَسغْ،
ذڭْ وذْلِيسْ إِتّْوَانّْضنْ يُورَا خَافِي.
9 نشّْ غَارِي مژْرِي، أَ أَربِّي، حِيمَا أَذْ ڭّغْ مِينْ ثخْسذْ شكْ.
شَّارِيعَا نّكْ أَقَا-ت ذِي ذَاخڒْ ن إِنُو.“ ▪
10 نشّْ تّْبَارّْحغْ ڒخْبَارْ أَصبْحَانْ ن ثْسڭْذَا نّكْ
ذڭْ وڭْرَاوْ ن ڒْڭنْسْ أَمقّْرَانْ.
خْزَارْ، وَارْ تّقّْنغْ إِينْشِيشنْ إِنُو، أَ سِيذِي، شكْ ثسّْنذْ ث. ▪
11 وَارْ تّْخمّْڒغْ ثَاسڭْذَا نّكْ ذَاخڒْ ذڭْ وُوڒْ إِنُو،
سَّاوَاڒغْ خْ ثِيذتّْ نّكْ ؤُ خْ ؤُسنْجمْ نّكْ.
ثَامخْسِيوْثْ نّكْ إِشوَّارنْ ذ ڒَامَانْ إِ ذَايكْ
وَارْ ثنْ سّْنُوفَّارغْ ذڭْ وڭْرَاوْ ن ڒْڭنْسْ أَمقّْرَانْ.
12 شكْ، أَ سِيذِي، وَارْ خَافِي ثسّْبذِّيذْ أَرّحْمثْ نّكْ.
أجّْ ثَامخْسِيوْثْ نّكْ إِشوَّارنْ ذ ڒَامَانْ إِ ذَايكْ أَذْ أَيِي حْضَانْثْ ڒبْذَا.
13 مَاغَارْ وَارْ إِزمَّارْ أَذْ إِتّْوَاحصّبْ ڒْغَارْ إِ ذ أَيِي إِقُووَّارنْ،
ڒْمُوعْصِييَّاثْ إِنُو تّْمنْعنْ أَيِي-د،
ذوْڒغْ وَارْ تّْوِيڒِيغْ عَاذْ س مَانْ أَيَا.
أَقَا-ثنْثْ ذ أَطَّاسْ خْ ؤُشوَّافْ ن ؤُزدْجِيفْ إِنُو،
ؤُڒْ إِنُو إِتّفْشِيڒْ.
14 أَ سِيذِي، أَذْ أَشْ يَارْضَا حِيمَا أَذْ أَيِي ثسّْنجْمذْ،
أَ سِيذِي، ذغْيَاثْ حِيمَا أَذْ أَيِي ثوْشذْ أَفُوسْ.
15 أجّْ إِنِّي يَارزُّونْ ڒعْمَارْ إِنُو حِيمَا أَذْ ث ثحَّانْ،
أَذْ تّْوَاخَارْوضنْ، أَذْ سّْنُوفَارنْ إِخفْ نْسنْ جْمِيعْ،
أجّْ إِنِّي إِفَارّْحنْ ذڭْ ؤُعدّبْ إِنُو
أَذْ ذوْڒنْ غَارْ ضفَّارْ ؤُ أَذْ تّْوَاسْبهْذْڒنْ. ▪
16 أجّْ إِ-ثنْ أَذْ تّْوَاردّْدْجنْ أَمْ ؤُخدْجصْ إِ ڒفْضِيحثْ نْسنْ إِ إِڭِّينْ،
إِنِّي ذِينْ إِقَّارنْ: ”هَا، هَا!“
17 أجّْ مَارَّا إِنِّي خَاكْ يَارزُّونْ أَذْ أَرّنْ مژْرِي، أَذْ زَّايكْ فَارْحنْ.
أجّْ إِنِّي إِتّخْسنْ أَسنْجمْ نّكْ أَذْ إِنِينْ ڒبْذَا: ”سِيذِي ذ أَمقّْرَانْ!“
18 نشّْ ذِي ڒغْبنْ ؤُ زڒْضغْ، مَاشَا سِيذِي إِنُو إِعْقڒْ خَافِي.
شكْ ذ ونِّي ذ أَيِي إِوْشِينْ أَفُوسْ ذ ونِّي ذ أَيِي إِسّْنجْمنْ.
أَ أَربِّي إِنُو، وَارْ تّْعطَّاڒْ شَا.