‏1 إِ ؤُمقّْرَانْ ن إِمغْنَاجنْ. إِ يَاذُوثُونْ. أَزهّذْ ن ذَاوُوذْ.

‏2 نِّيغْ: ”نشّْ أَذْ كَّارغْ أَذْ حْضِيغْ إِبْرِيذنْ إِنُو زِي دّنْبْ ن يِيڒسْ إِنُو،

أَذْ طّْفغْ أَحطُّو غَارْ ؤُقمُّومْ إِنُو س إِشْثْ ن ثشْمَانْثْ،

مِينْ غَا يكّْ ؤُعفَّانْ زَّاثِي.“

‏3 نشّْ ذوْڒغْ أَمْ ويْنَاوْ ؤُ ڒحّْفغْ إِخفْ إِنُو س ؤُسغْذْ،

بكْمغْ ؤُڒَا خْ ڒْخَارْ،

مَاشَا ڒحْرِيقْ إِنُو ثُوغَا يَارنِّي.

‏4 ؤُڒْ  إِنُو إِذْوڒْ  إِحمَّا ذِي ذَاخڒْ إِنُو،

ثتّْوَاسَارغْ إِشْثْ ن ثْمسِّي غَارْ ؤُنِيخْسسْ إِنُو.

خنِّي سِّيوْڒغْ س يِيڒسْ إِنُو:

‏5 ”أَ سِيذِي، سْشنْ أَيِي أَنڭَّارْ إِنُو،

مَانْ إِدْجْ ڒْقدّْ ن وُوسَّانْ إِنُو،

حِيمَا أَذْ سّْنغْ مَامّشْ أَرْخْفغْ.

‏6 خْزَارْ، شكْ ثَارِّيذْ ؤُسَّانْ إِنُو أَمْ إِشْبَارنْ ن ؤُفُوسْ،

ثَازُّوڭَّارْثْ ن ثُوذَارْثْ إِنُو زَّاثْ إِ شكْ أَخْمِي ذ وَالُو.

كُوڒْ بْنَاذمْ، مَامّشْ مَا إِبدّْ إِمْثنْ،

نِيشَانْ أَمْ إِشْثْ ن ثَايُّوثْ.“ سِيلَاهْ. ^▪  

‏7 إِوَا، بْنَاذمْ إِڭُّورْ أَمْ إِجّْ ن ڒخْيَاڒْ،

وَاهْ، أَمْ إِشْثْ ن ثَايُّوثْ أَمُّو إِ إِتّْرَاحْ إِتَّاسْ-د.

نتَّا إِسّْمُونْ، وَارْ إِسِّينْ مَانْ ونْ ث إِ غَا إِكْسِينْ غَارسْ.

‏8 ؤُ ڒخُّو مِينْ غَا سِّيثْمغْ، أَ سِيذِي إِنُو؟

أَقَا نشّْ تّْرَاجِيغْ شكْ!

‏9 فكّْ أَيِي زِي مَارَّا إِخطَّانْ إِنُو،

وَارْ ذ أَيِي تّڭّْ شَا ذ ثِيسضْحَاشْ إِ ؤُپُوحَاڒِي.

‏10 نشّْ ذوْڒغْ أَمْ ويْنَاوْ، وَارْ أَرزّْمغْ أَقمُّومْ إِنُو،

مَاغَارْ ذ شكْ إِ إِڭِّينْ أَيَا.

‏11 كْسِي زَّايِي جّْرِيحشْثْ نّكْ،

أَقَا فنِّيغْ س ؤُطفُّو إِحصَّارنْ ن ؤُفُوسْ نّكْ.

‏12 مَاڒَا ثْسڭّْذذْ شَا ن ورْيَازْ س ثِييِّيثَا ذِي سِّيبّثْ ن ڒْمُوعْصِييّثْ نّسْ،

خنِّي ثسّْفسْيذْ أَشوَّارْ ن وَادُّوذْ نّسْ أَمْ ثْشِينْذَا.

إِوَا كُوڒْ بْنَاذمْ أَذْ إِفْنَا أَمْ إِشْثْ ن ثَايُّوثْ. سِيلَاهْ.

‏13 سڒْ إِ ثْژَادْجِيثْ إِنُو، أَ سِيذِي، ؤُ سْحسّْ إِ ؤُغُويِّي إِنُو.

وَارْ تّبْكِيمْ غَارْ إِمطَّاونْ إِنُو،

مَاغَارْ أَقَا أَيِي ذ أَبَارَّانِي، ذ أَمْعزّبْ غَاركْ، أَمْ مَارَّا ڒجْذُوذْ إِنُو. ^▪  

‏14 سْحيّذْ خَافِي مَاحنْذْ أَذْ شعْشعغْ عَاذْ س ڒفْرَاحثْ،

قْبڒْ أَذْ رَاحغْ ؤُ وَارْ ذَا تِّيڒِيغْ عَاذْ.