‏1 أَزهّذْ ن ذَاوُوذْ. إِ ڒِيذَارثْ.

‏2 أَ سِيذِي، وَارْ ذ أَيِي تّْعَاقَابْ ذڭْ ؤُذُوقّزْ ن وغْضَابْ نّكْ،

وَارْ ذ أَيِي تّْودَّابْ س وسْعَارْ نّكْ. ^▪  

‏3 مَاغَارْ فْڒِيثْشَاثْ نْ ڒْقوْسْ نّكْ ؤُذْفنْثْ ذَايِي،

أَفُوسْ نّكْ إِتّْزيَّارْ خَافِي.

‏4 وَارْ ذِينْ إِقِّيمْ مِينْ إِدْجَانْ إِكمّْڒنْ ذِي أَرِّيمثْ إِنُو زڭْ وسْخضْ نّكْ،

وَارْ إِقِّيمْ مِينْ إِصحّنْ ذڭْ إِخْسَانْ إِنُو زِي سِّيبّثْ ن دّنْبْ إِنُو. ^▫  

‏5 مَاغَارْ ڒْمُوعْصِييَّاثْ إِنُو ڭعّْذنْثْ أَيِي غَارْ ؤُزدْجِيفْ إِنُو،

ذقّْڒنْثْ خَافِي أَمْ إِجّْ ن دّْقڒْ إِمْغَارْ أَطَّاسْ.

‏6 إِيزِّيمنْ إِنُو ذَايْسنْ أَرِّيحثْ ؤُ ڭيّْحنْ س ثُوبُّوهڒْيَا إِنُو.

‏7 ذوْڒغْ قوْسغْ، ذوْڒغْ غنْسغْ أَڒْ طَّارْفْ.

أَسّْ مَارَّا ڭُّورغْ ذڭْ وَارُّوضْ ن وشْضَانْ ذ أَبَارْشَانْ.

‏8 مَاغَارْ تَّاشِيغْ ثِيجْعِينَّاثِينْ إِنُو أَرْغِينْثْ س ثْمسِّي مَارَّا،

وَارْ ذِينْ إِقِّيمْ مِينْ إِدْجَانْ إِكمّْڒنْ ذِي أَرِّيمثْ إِنُو.

‏9 نشّْ جمّْذغْ ؤُ تّْوَاغضْڒغْ قَاعْ،

سْغُويُّوغْ س زّْهِيرْ ن وُوڒْ إِنُو.

‏10 أَ سِيذِي إِنُو، مَارَّا مِينْ ذِي غَارِي مژْرِي أَقَا-ث زَّاثكْ،

أَسْقِينْفِي إِنُو وَارْ زَّايكْ إِتّْنُوفَّارْ.

‏11 ؤُڒْ إِنُو إِدّنْذُونْ، مَارَّا جّهْذْ إِفّغْ أَيِي،

ؤُڒَا ذ ثَافَاوْثْ ثفّغْ زِي ثِيطَّاوِينْ إِنُو،

وَاهْ ؤُڒَا ذ نِيثنْثِي وَارْ غَارِي بدّنْثْ عَاذْ.

‏12 إِمْعِيزّنْ إِنُو ذ إِمدُّوكَّاڒْ إِنُو بدّنْ أَرنْذَاذْ إِنُو غَارْ جّْرِيحشْثْ إِنُو،

ؤُڒَا ذ إِنِّي إِ د أَيِي يُوذْسنْ تَّاڭّْوجنْ خَافِي.

‏13 إِنِّي يَارزُّونْ أَذْ كّْسنْ ثُوذَارْثْ إِنُو،

نذْينْ أَيِي ثِيخشْفِينْ،

إِنِّي يَارزُّونْ أَذْ أَيِي ڭّنْ ڒْغَارْ،

سَّاوَاڒنْ أَمْ مّژْرنْ أَذْ أَردّْدْجنْ،

نِيثْنِي شڒْغنْ س ڒْغشّْ أَسّْ مَارَّا.

‏14 نشّْ مَاشَا تّڭّغْ إِخفْ إِنُو أَخْمِي ذ أَذهْشُورْ،

أَمْ ويْنَاوْ نِّي وَارْ يَارزّْمنْ أَقمُّومْ نّسْ.

‏15 نشّْ أَمْ ورْيَازْ وَارْ إِتّسْڒِينْ،

ونِّي وَارْ غَارْ إِدْجِي ثْوَارِّيثْ زڭْ ؤُقمُّومْ نّسْ.

‏16 مَاغَارْ تّْرَاجِيغْ شكْ، أَ سِيذِي،

شكْ أَذْ د-ثَارِّيذْ، أَ سِيذِي إِنُو، أَ أَربِّي إِنُو!

‏17 مَاغَارْ نِّيغْ: ”أجّْ إِ-ثنْ وَارْ خَافِي فَارّْحنْ،

خْمِي إِ غَا فَارْغنْ إِضَارنْ إِنُو،

أجّْ إِ-ثنْ وَارْ سّمْغَارَانْ إِخفْ نْسنْ خَافِي.

‏18 مَاغَارْ نشّْ أَقَا ڭُّورْ أَذْ نْقَارْضغْ،

ڒحْرِيقْ إِنُو أَقَا-ث ڒبْذَا زَّاثِي.

‏19 مَاغَارْ سَّارْڭْبغْ أَشْ ڒْمُوعْصِييّثْ إِنُو،

أَقَا تّْوَاحصَّارغْ زِي دّنْبْ إِنُو. ^▪  

‏20 ڒْعذْيَانْ إِنُو دَّارنْ، أَقَا أَثنْ س ثْزمَّارْ،

أَطَّاسْ إِدْجَانْ إِنِّي ذ أَيِي إِشَارّْهنْ بْڒَا سِّيبّثْ.

‏21 إِنِّي إِثَارَّانْ ڒْخَارْ س ڒْغَارْ سّْبدّنْ إِخفْ نْسنْ ضِيدّْ إِنُو،

ؤُمِي نشّْ أَرزُّوغْ خْ مِينْ إِصبْحنْ.

‏22 وَارْ ذَايِي سمّحْ، أَ سِيذِي، أَربِّي إِنُو،

وَارْ خَافِي تَّاڭّْوجْ.

‏23 ذغْيثْ حِيمَا أَذْ أَيِي ثوْشِيذْ أَفُوسْ،

أَ سِيذِي إِنُو، أَسنْجمْ إِنُو.