35
1 ن ذَاوُوذْ. مْشُوبّشْ، أَ سِيذِي، أَكْ-ذ ينِّي أَكِيذِي إِتّمْشُوبُّوشنْ،
مْنغْ أَكْ-ذ ينِّي كِيذِي إِتّْمنْغَانْ.
2 طّفْ ثَاسدَّارْثْ ن ؤُسڒْقِي ذ ثْسدَّارْثْ ثَامقّْرَانْثْ،
ؤُشَا كَّارْ، أوْشْ أَيِي أَفُوسْ.
3 جْبذْ-د لَانْسَا ؤُشَا قّنْ أَبْرِيذْ قْبڒْ إِ ؤُمْسَاڭَارْ أَكْ-ذ ينِّي د أَيِي إِضَافَّارنْ،
إِنِي إِ ڒعْمَارْ إِنُو: ”أَسنْجمْ نّكْ أَقَا ذ نشّْ!“
4 أَرّْ إِنِّي يَارزُّونْ خْ ڒعْمَارْ إِنُو أَذْ تّْوَاخَاروْضنْ ؤُ أَذْ تّْوَافضْحنْ،
أجّْ إِنِّي إِتّْخَارِّيصنْ ذِي ڒْغَارْ خَافِي أَذْ تّْوَاعَارّْننْ غَارْ ضفَّارْ،
أجّْ إِ-ثنْ أَذْ ذوْڒنْ تّْسضْحَانْ. ▪
5 أجّْ إِ-ثنْ أَذْ ذوْڒنْ أَمْ إِشَارْفَا ذڭْ ؤُصمِّيضْ،
أجّْ لْمَالَاكْ ن سِيذِي أَذْ ثنْ إِعَارْنْ. ▪
6 أجّْ أَذْ إِذْوڒْ وبْرِيذْ نْسنْ ذ ثَادْجسْثْ ؤُ أَذْ يِيڒِي إِتّحْڒُودْجُوضْ،
أجّْ لْمَالَاكْ ن سِيذِي أَذْ ثنْ إِضْفَارْ.
7 مَاغَارْ بْڒَا سِّيبّثْ سّْنُوفَّارنْ خَافِي أَحْفُورْ س ثْرَاشَّا نْسنْ،
بْڒَا سِّيبّثْ غْزِينْ ث إِ ڒعْمَارْ إِنُو.
8 أجّْ أَردّدْجْ أَذْ خَاسْ د-يَاسْ بْڒَا مَا إِسّنْ،
أجّْ ثْرَاشَّا نّسْ نِّي إِسّْنُوفَّارْ أَذْ ث ثطّفْ سِيمَانْثْ نّسْ،
أجّْ إِ-ث أَذْ ذَايسْ د-إِوْضَا سِيمَانْثْ نّسْ،
س إِجّْ ن ؤُوطُّو إِ ث إِ غَا يَاردّْدْجنْ.
9 ڒعْمَارْ إِنُو أَذْ إِفَارْحْ زِي سِيذِي،
أَذْ يَارْشقْ ذڭْ ؤُسنْجمْ نّسْ.
10 أَذْ إِنِينْ مَارَّا إِخْسَانْ إِنُو:
”أَ سِيذِي، مَانْ ونْ إِدْجَانْ أَمْ شكْ!
شكْ ذ ونِّي إِسّنْجَامنْ ڒْمسْكِينْ زڭْ ونِّي خَاسْ إِجهّْذنْ،
ڒْمسْكِينْ ذ ؤُمزْڒُوضْ زڭْ إِنِّي ذ أَسنْ إِكشّْضنْ.
11 إِشهَّاذنْ إِقْطَاطْعِييّنْ كَّارنْ.
مِينْ وَارْ سِّينغْ، تّْسقْسَانْ أَيِي.
12 أَرِّينْ أَيِي-د ڒْغَارْ ذِي ڒْخَارْ،
ڒعْمَارْ إِنُو إِتّْمحّنْ س ڒحْوجْ.
13 نشّْ مَاشَا أَرْضغْ ثَاخَانْشثْ ڒَامِي ثُوغَا هدْجْشنْ،
ڭِّيغْ أَذْ إِژُومّْ ڒعْمَارْ إِنُو،
ؤُشَا ثَاژَادْجِيثْ إِنُو ثتّْغِيمَا ثدّكّْوَاڒْ-د غَارِي ذِي ذَاخڒْ إِنُو.
14 أَخْمِي ث ثُوغَا ذ أَمدُّوكّڒْ إِنُو نِيغْ ذ ؤُمَا،
أَمُّو إِ ثُوغَا ڭُّورغْ،
أَمشْنَاوْ شَا ن إِجّْ إِشطّْ خْ يمَّاسْ،
أَمُّو ثُوغَا أَيِي ڭُّورغْ غنّْسغْ ذڭْ وَارُّوضْ ذ أَبَارْشَانْ.
15 خْمِي تّْقجْذِيحغْ، فَارّْحنْ نِيثْنِي ؤُ تّْمُوننْ أَكْ-ذ وَايَاوْيَا.
تّْمُوننْ ضِيدّْ إِنُو إِنِّي ن وَادَّايْ، بْڒَا مَا أَذْ ث سّْنغْ.
شقّْفنْ ذَايِي، وَارْ سُّوسْمنْ.
16 أَمشْنَاوْ إِنِّي إِغطّْصنْ بْنَاذمْ إِ يِيجّْ ن ؤُڒقُّوزْ ن وغْرُومْ،
أَمُّو غزَّانْ-د غَارِي ثِيغْمَاسْ.
17 أَ سِيذِي إِنُو، أَڒْ مشْحَاڒْ إِ غَا ثكّذْ ثْخزَّارذْ وَاهَا؟
سنْجمْ أَيِي زڭْ وَاردّدْجْ نْسنْ إِ إِڭِّينْ،
أَينِّي إِنُو زڭْ ويْرَاذنْ إِمژْيَاننْ.
18 نشّْ أَذْ شكْ قَاذِيغْ ذڭْ يِيجّْ ن وڭْرَاوْ ن ڒْڭنْسْ ذ أَمقّْرَانْ،
أَذْ شكْ صبّْحغْ جَارْ إِجّْ ن ڒْڭنْسْ إِمْغَارْ أَطَّاسْ. ▪
19 إِنِّي إِدْجَانْ ذ ڒْعذْيَانْ إِنُو ذِي ڒْبَاطرْ،
وَارْ ثنْ تّجِّي أَذْ خَافِي فَارْحنْ،
إِنِّي ذ أَيِي إِشَارّْهنْ،
وَارْ ثنْ تّجِّي أَذْ خَافِي مّْسغْمَازنْ بْڒَا سِّيبّثْ. ▪
20 مَاغَارْ نِيثْنِي وَارْ سِّيوِيڒنْ شَا خْ ڒهْنَا،
مَاشَا تّْخَارّْصنْ ذڭْ وَاوَاڒنْ شُّورنْ س ڒْغشّْ
ضِيدّْ إِنِّي يَارزُّونْ ڒْهُوذْنثْ ذِي ثمُّورْثْ.
21 نِيثْنِي أَرزّْمنْ أَقمُّومْ نْسنْ قَاعْ،
قَّارنْ: ”هَا، هَا، ثِيطّْ نّغْ سِيمَانْثْ نّسْ ثژْرَا إِ-ت!“
22 أَ سِيذِي، شكْ ثژْرِيذْ ت، وَارْ تّسْقَارَا، سِيذِي إِنُو،
وَارْ خَافِي تّڭّْوِيجْ شَا.
23 فَاقْ، كَّارْ ذِي طّْوعْ ن ڒْحقّْ إِنُو،
أَ أَربِّي إِنُو ذ سِيذِي إِنُو، ذِي طّْوعْ ن دّعْوثْ إِنُو.
24 حْكمْ خَافِي س ڒْحقّْ عْلَاحْسَابْ ثَاسڭْذَا نّكْ، أَ سِيذِي، أَربِّي إِنُو،
وَارْ ثنْ تّجِّي أَذْ خَافِي فَارْحنْ.
25 وَارْ تّجِّي أَذْ إِنِينْ ذڭْ وُوڒْ نْسنْ: ”هَا، أَقَا أَنغْ مْلِيحْ!“،
وَارْ ثنْ تّجِّي أَذْ إِنِينْ: ”أَقَا نْسَارْضْ إِ-ث!“
26 أجّْ إِنِّي إِفَارّْحنْ خْ أَرْژِييّثْ إِنُو،
أَذْ تّْوَاخَاروْضنْ ؤُ أَذْ سّْنُوفَّارنْ إِخفْ نْسنْ جْمِيعْ،
أجّْ إِنِّي إِڭِّينْ إِخفْ نْسنْ مْغَارنْ زَّاثِي،
أَذْ يَارْضنْ س ؤُسضْحِي ذ ڒفْضِيحثْ.
27 أجّْ إِنِّي يَارْضَانْ ذِي ثْسڭْذَا أَذْ سْڒِيوڒْونْ ؤُ أَذْ فَارْحنْ،
أجّْ إِ-ثنْ أَذْ إِنِينْ:
”ذ أَمقّْرَانْ إِ يدْجْ سِيذِي ونِّي يَارْضَانْ ذِي ڒهْنَا ن ؤُمْسخَّارْ نّسْ.“
28 خنِّي إِڒسْ إِنُو أَذْ إِبَارّحْ ثَاسڭْذَا نّكْ ذ ؤُصبّحْ نّكْ أَسّْ مَارَّا.