‏1 ن ذَاوُوذْ، ؤُمِي إِسّْنِيعْمِيڒْ، إِڭَّا إِخفْ نّسْ ذ أَپُوهَاڒِي زَّاثْ إِ وُوذمْ ن أَبِيمِيلِيكْ،

ونِّي إِ خَاسْ يُوژّْڒنْ أَڒَامِي يُويُورْ نتَّا. ^▪  

‏2 أَلِيفْ. نشّْ خْسغْ أَذْ بَارْكغْ إِ سِيذِي ڒبْذَا،

أَصبِّيحْ نّسْ أَذْ يِيڒِي ذڭْ ؤُقمُّومْ إِنُو بْڒَا قطُّو.

‏3 بِيثْ. ڒعْمَارْ إِنُو أَذْ إِصبّحْ إِ سِيذِي.

إِمْهِيننْ أَذْ أَسْ سْڒنْ ؤُ أَذْ فَارْحنْ.

‏4 ڭِيملْ. سمْغَارمْ أَكِيذِي سِيذِي،

أجّْ أَنغْ أَذْ نسُّوعْڒَا إِسمْ نّسْ جْمِيعْ.

‏5 ذَالِيثْ. نشّْ أَرْزُوغْ خْ سِيذِي ؤُ نتَّا يَارَّا-د خَافِي،

إِفكّْ أَيِي زِي مَارَّا ثِيڭّْوُوذِي إِنُو.

‏6 هِي. نِيثْنِي خزَّارنْ غَارسْ ؤُشَا شعْشعنْ،

إِغمْبَابْ نْسنْ وَارْ ثنْ تّْڒحَّافنْ عمَّارْصْ.

‏7 زَايِينْ. ڒْمسْكِينْ-أَ ذَانِيثَا إِڒَاغَا ؤُ سِيذِي إِسْڒَا غَارسْ،

إِفكّْ إِ-ث زِي مَارَّا ڒحْصَارَاثْ نّسْ.

‏8 خِيثْ. لْمَالَاكْ ن سِيذِي إِقُووَّارْ س ڒْمَارْڭحْ نّسْ خْ ينِّي ث إِتّڭّْوذنْ،

نتَّا إِفكّْ إِ-ثنْ.

‏9 ثِيث. قَاسمْ ذ ثْخزَّارمْ، أَقَا سِيذِي إِشْنَا.

سّعْذْ ن ورْيَازْ إِجهْذنْ ونِّي خَاسْ إِتّْشَاڒَانْ.

‏10 يُوذْ. ڭّْوذمْ سِيذِي، أَ كنِّيوْ، إِمْقدَّاسنْ نّسْ،

مَاغَارْ إِنِّي ث إِتّڭّْوذنْ وَارْ ثنْ إِتّْخصِّي وَالُو.

‏11 كَافْ. إِيْرَاذنْ إِمژْيَاننْ تّحْوَاجنْ ؤُ ذَايْسنْ ڒَاژْ،

مَاشَا إِنِّي يَارزُّونْ خْ سِيذِي، وَارْ ثنْ إِتّْخصِّي وَالُو زِي مَارَّا مِينْ إِدْجَانْ ذ ڒْخَارْ. ^▪  

‏12 لَامِيذْ. أَسمْ-د، كنِّيوْ إِحنْجِيرنْ، سْڒمْ-د غَارِي!

نشّْ أَذْ أَومْ سّْڒمْذغْ ثِيڭّْوُوذِي ن سِيذِي.

‏13 مِيمْ. مَانْ ونْ إِ إِدْجَانْ ذ أَرْيَازْ ونِّي ذِي إِدْجْ مژْرِي ذِي ثُوذَارْثْ،

ونِّي إِتّخْسنْ ؤُسَّانْ ن ثُوذَارْثْ نّسْ حِيمَا أَذْ إِژَارْ ڒْخَارْ؟ ^▪  

‏14 نُونْ. مْنعْ إِڒسْ نّكْ زِي ڒْغَارْ،

ؤُڒَا ذ إِينْشِيشنْ نّكْ زڭْ وَاوَاڒْ نْ ڒْغشّْ.

‏15 سَامِيخْ. حيّذْ خْ ثُوعفّْنَا ؤُ أڭّْ ڒْخَارْ.

أَرْزُو خْ ڒهْنَا ؤُ ضْفَارْ إِ-ث.

‏16 عَايِينْ. ثِيطَّاوِينْ ن سِيذِي خْ إِمْسڭَّاذنْ،

إِمزُّوغنْ نّسْ ميّْڒنْ غَارْ إِغُويَّانْ نْسنْ. ^▪  

‏17 بِي. ؤُذمْ ن سِيذِي ضِيدّْ إِ ينِّي إِتّڭّنْ ڒْغَارْ،

حِيمَا أَذْ إِكّسْ ڒِيذَارثْ ذَايْسنْ زِي ثمُّورْثْ.

‏18 ثْسَاذِي. نِيثْنِي ڒَاغَانْ ؤُ سِيذِي إِسْڒَا-د غَارْسنْ،

نتَّا إِفكّْ إِ-ثنْ زِي مَارَّا ڒحْصَارَاثْ نْسنْ.

‏19 قُوفْ. سِيذِي يُوذسْ إِ مَارَّا إِنِّي ؤُمِي إِتّْوَارْژْ وُوڒْ نْسنْ،

إِسّنْجَامْ إِنِّي ؤُمِي إِتّْوَاڒْبزْ بُوحْبڒْ نْسنْ. ^▪  

‏20 رِيخْ. أَطَّاسْ إِدْجَانْ إِفقُّوسنْ ن إِمْسڭَّاذنْ،

مَاشَا سِيذِي إِفكّْ إِ-ثنْ زَّايْسنْ مَارَّا. ^▪  

‏21 شِينْ. نتَّا إِحطَّا إِخْسَانْ نّسْ مَارَّا،

ؤُڒَا ذ إِجّْ زَّايْسنْ وَارْ إِتَّارژِّي. ^▪  

‏22 ثَاوْ. أَقَا ڒْغَارْ أَذْ إِنغْ أَعفَّانْ،

إِنِّي إِشَارّْهنْ أَمْسڭّذْ أَذْ تّْوَاعَاقْبنْ.

‏23 سِيذِي أَذْ إِفْذِي ڒعْمَارْ ن إِمْسخَّارنْ نّسْ،

مَارَّا إِنِّي خَاسْ إِتّْشَاڒَانْ، وَارْ ڭُّورْ أَذْ تّْوَاعَاقْبنْ. ^▫