‏1 سْڒِيوڒْومْ إِ سِيذِي، أَ إِمْسڭَّاذنْ،

أَصبَّاحْ ذ إِشْثْ ن ثلْوِيزْثْ إِ ينِّي إِسڭّْمنْ. ^▪  

‏2 قَاذَامْ سِيذِي س ڒْڭَامْبْرِي،

زهّْذمْ أَسْ س لْهَارْبَا ؤُ س لْعُوذْ ن عشْرَا ن إِفِيڒَانْ.

‏3 غنّْجمْ أَسْ س يِيجّْ ن يزْڒِي أَمَايْنُو،

إِرَارمْ مْلِيحْ س ؤُصُوضِي ذِي ڒْپُوقْ. ^▪  

‏4 مِينْزِي أَوَاڒْ ن سِيذِي إِسڭّمْ،

مَارَّا مِينْ إِتّڭّْ، إِتّڭّْ إِ-ث س ڒَامَانْ.

‏5 نتَّا إِتّخْسْ ثَاسڭْذَا ذ ڒْحقّْ.

ثَامُّورْثْ ثشُّورْ س ثْمخْسِيوْثْ إِشوَّارنْ ن سِيذِي. ^▪  

‏6 زڭْ وَاوَاڒْ ن سِيذِي تّْوَاڭّنْ إِجنْوَانْ،

زِي أَرُّوحْ ن ؤُقمُّومْ نّسْ تّْوَاڭّنْثْ مَارَّا ڒْعسْكَارَاثْ نْسنْ. ^▪  

‏7 نتَّا إِسّْمُونْ أَمَانْ ن ڒبْحَارْ أَمشْنَاوْ إِجّْ ن وغْبَارْ.

نتَّا إِخمّڒْ أَمَانْ يُودْجْغنْ ذڭْ إِخَّامنْ ن ڒخْزنْ.

‏8 أَذْ ثڭّْوذْ مَارَّا ثَامُّورْثْ زِي سِيذِي،

أَذْ زَّايسْ ڭّْوذنْ مَارَّا إِمزْذَاغْ ن دُّونشْثْ.

‏9 مَاغَارْ نتَّا إِسَّاوَاڒْ ؤُشَا أَقَا-ث ذِينْ،

نتَّا إِتَّامَارْ ؤُشَا أَذْ يِيڒِي إِبدّْ ذِينْ.

‏10 سِيذِي إِتَّارژَّا شّْوَارْ ن ڒڭْنُوسْ،

إِسّبْضڒْ إِخَارِّيصنْ نْ ڒڭْنُوسْ. ^▪  

‏11 شّْوَارْ ن سِيذِي أَذْ إِقِّيمْ إِبدّْ إِ ڒبْذَا،

إِخَارِّيصنْ ن وُوڒْ نّسْ زِي جِّيڒْ غَارْ جِّيڒْ. ^▪  

‏12 سّعْذْ ن ڒْڭنْسْ إِ غَارْ إِدْجْ أَربِّي نّسْ ذ سِيذِي،

ڒْڭنْسْ نِّي إِخْضَارْ إِ-ث نتَّا ذ ثَاسْغَارْثْ إِ يِيخفْ نّسْ.^▪  

‏13 سِيذِي إِخزَّارْ-د زڭْ ؤُجنَّا،

إِتّْوَاڒَا مَارَّا ثَارْوَا ن بْنَاذمْ.

‏14 زڭْ ومْشَانْ ن ثْزذِّيغْثْ نّسْ إِخزَّارْ

غَارْ مَارَّا إِمزْذَاغْ ن ثمُّورْثْ.

‏15 نتَّا وحّْذسْ ذ ونِّي إِكوّْننْ ؤُڒْ نْسنْ،

نتَّا إِحكَّارْ إِ مَارَّا ثِيمڭَّا نْسنْ.

‏16 أَجدْجِيذْ وَارْ إِتّْوَاسّنْجَامْ س يِيجّْ ن ڒْعسْكَارْ ذ أَمقّْرَانْ،

بُو-ثغْرُوضْثْ وَارْ إِتّْوَافكِّي س جّهْذْ أَطَّاسْ.

‏17 أَقَا ذ أَخَارِّيقْ بلِّي أَيِيسْ أَذْ د-يَاوِي أَسنْجمْ،

عَاذْ س جّهْذْ نّسْ أَمقّْرَانْ وَارْ د-إِتّنْفكِّي.

‏18 خْزَارْ، ثِيطّْ ن سِيذِي خْ ينِّي زَّايسْ إِتّڭّْوذنْ،

خْ ينِّي إِتّْرَاجَانْ ثَامخْسِيوْثْ نّسْ إِشوَّارنْ، ^▪  

‏19 حِيمَا أَذْ إِفكّْ ڒعْمَارْ نْسنْ زِي ڒْموْثْ،

حِيمَا أَذْ ثنْ يجّْ قِّيمنْ دَّارنْ ذِي ڒَاژْ.

‏20 ڒعْمَارْ نّغْ إِتّْرَاجَا سِيذِي،

أَقَا نتَّا ذ أَعَاونْ نّغْ ذ ثَاسدَّارْثْ نّغْ إِ ؤُسڒْقِي.

‏21 مَاغَارْ زَّايسْ إِفَارّحْ وُوڒْ نّغْ،

مِينْزِي نتّْشَاڒْ خْ يِيسمْ نّسْ إِقدّْسنْ.

‏22 أَذْ خَانغْ ثَارْسَا ثْمخْسِيوْثْ نّكْ إِشوَّارنْ، أَ سِيذِي،

عْلَاحْسَابْ مَامّشْ إِ شكْ نتّْرَاجَا.