‏1 ن ذَاوُوذْ. أَخمِّي.

سّعْذْ ن ونِّي ؤُمِي ثتّْوَاغْفَارْ ثْعذِّيثْ نّسْ،

ونِّي ؤُمِي إِذْڒِينْ خْ دّْنُوبْ نّسْ. ^▪  

‏2 سّعْذْ ن ورْيَازْ ونِّي ؤُمِي وَارْ إِحصّبْ سِيذِي ڒْمُوعْصِييّثْ نّسْ،

ونِّي غَارْ إِدْجْ بُوحْبڒْ وَارْ ذَايسْ بُو ڒْغشّْ.

‏3 ؤُمِي سْقَارغْ، أَرْشَانْ إِخْسَانْ إِنُو،

س ؤُزهَّارْ إِنُو، أَسّْ مَارَّا.

‏4 مَاغَارْ أَسّْ ذ دْجِيڒثْ إِسّذْقڒْ أَيِي ؤُفُوسْ نّكْ ،

إِذَامّنْ ن ثُوذَارْثْ إِنُو ذوْڒنْ أَمْ ڒَاژَاغْ ن ؤُنبْذُو. سِيلَاهْ.

‏5 سَّارڭْبغْ أَشْ دّنْبْ إِنُو،

وَارْ سّْذُورْيغْ ڒْمُوعْصِييّثْ إِنُو.

نشّْ نِّيغْ: ”أَذْ نعْمغْ زڭْ إِخطَّانْ إِنُو غَارْ سِيذِي!“،

خنِّي شكْ ثغْفَارذْ أَيِي ڒْمُوعْصِييّثْ ن دّنْبْ إِنُو. سِيلَاهْ. ^▪  

‏6 س ؤُينِّي مَارَّا أَمْثِيقِّي أَذْ أَشْ إِسْجذْ ذِي ڒْوقْثْ ؤُمِي غَا ثجّذْ بْنَاذمْ أَذْ شكْ يُوفَا.

خْمِي ذِينْ إِشْثْ ن سّحْڒثْ ن وَامَانْ أَطَّاسْ، وَارْ ث ثْڒقّفْ قَاعْ.

‏7 شكْ ذ أَمْشَانْ ن ؤُذُورِّي إِ نشّْ،

ثسَّارذْ أَيِي زِي ڒحْصَارثْ،

ثْقُووَّارذْ أَيِي س إِغُويَّانْ ن ڒفْرَاحثْ ن ؤُفكِّي. سِيلَاهْ. ^▪  

‏8 نشّْ أَذْ شكْ سّْغَارغْ ؤُشَا أَذْ أَشْ سّْڒمْذغْ أَبْرِيذْ إِتّْخصَّا أَذْ ذَايسْ ثُويُورذْ.

نشّْ أَذْ شكْ وصِّيغْ، أَذْ خَاكْ ثِيڒِي ثِيطّْ إِنُو.

‏9 وَارْ تِّيڒِي أَمشْنَاوْ أَيِيسْ،

أَمشْنَاوْ أَسَارْذُونْ بْڒَا ڒعْقڒْ،

إِنِّي إِتّْخصَّا أَذْ ثنْ قمّْعنْ س سّْرِيمثْ ذ ورْيَامْ،

نِيغْ وَارْ إِزمَّارْ أَذْ غَاركْ د-إِقَارّبْ. ^▪  

‏10 أَطَّاسْ دْجَانْثْ ثَامَارَا ن ؤُعفَّانْ،

مَاشَا ونِّي إِتّْشَاڒنْ خْ سِيذِي،

أَذْ أَسْ إِقُووَّارْ نتَّا س ثْمخْسِيوْثْ نّسْ إِشوَّارنْ.

‏11 فَارْحمْ ذِي سِيذِي، أَرشْقمْ، أَ إِمْسڭَّاذنْ،

سْڒِيوڒْومْ، أَ مَارَّا إِنِّي غَارْ إِدْجْ وُوڒْ إِسڭّْمنْ!