31
1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ. 2 نشّْ تّشْڒغْ خَاكْ، أَ سِيذِي،
وَارْ تّجِّي أَذْ سضْحِيغْ إِ ڒبْذَا،
فكّْ أَيِي س ثْسڭْذَا نّكْ. ▪
3 أوْشْ أَيِي أَمزُّوغْ نّكْ، فكّْ أَيِي ذغْيَا.
إِڒِي ذ ثَاصْضَارْثْ إِجهْذنْ إِ نشّْ،
إِجّْ ن لْپُورْجْ حِيمَا أَذْ أَيِي ثسّْنجْمذْ.
4 مَاغَارْ شكْ ذ ثَاصْضَارْثْ إِنُو ذ لْپُورْجْ إِنُو.
نْذهْ أَيِي، ثْهِيلَّا ذَايِي ذِي طّْوعْ ن يِيسمْ نّكْ.
5 فكّْ أَيِي زِي ثْرَاشَّا نِّي خَافِي ڭِّينْ س ثْنُوفّْرَا،
مَاغَارْ شكْ ذ جّهْذْ إِنُو.
6 ذڭْ ؤُفُوسْ نّكْ إِ ڭِّيغْ بُوحْبڒْ إِنُو.
شكْ ثفْذِيذْ أَيِي، أَ سِيذِي، أَربِّي ذ أَمْثِيقِّي شكْ. ▪
7 نشّْ شَارّْهغْ إِنِّي إِتّْشغْڒنْ إِخفْ نْسنْ س ڒخْيَاڒَاثْ إِبطِّيڒنْ.
نشّْ تّشْڒغْ خْ سِيذِي.
8 نشّْ أَذْ أَرشْقغْ ؤُ أَذْ فَارْحغْ زِي ثْمخْسِيوْثْ نّكْ إِشوَّارنْ،
مِينْزِي شكْ ثتّْوَاڒِيذْ ڒغْبنْ إِنُو ؤُ ثَارڭّْبذْ خْ ڒحْصَارَاثْ إِنُو،
9 مِينْزِي وَارْ ذ أَيِي ثَارِّيذْ غَارْ ؤُفُوسْ ن ڒعْذُو إِنُو،
مَاشَا ثڭِّيذْ أَيِي تَّاسِيعْ غَارْ إِضَارنْ إِنُو.
10 حِينّْ خَافِي، أَ سِيذِي، مَاغَارْ تّْوَاحصَّارغْ،
ثِيطّْ إِنُو ذ ڒعْمَارْ إِنُو ذ ؤُعذِّيسْ إِنُو أَقَا فشْڒنْ.
11 مَاغَارْ ثُوذَارْثْ إِنُو ثْكمّڒْ س وشْضَانْ،
إِسڭّْوُوسَا إِنُو س ؤُزهَّارْ.
جّْهذْ إِنُو إِهيّفْ زِي ڒْمُوعْصِييّثْ إِنُو،
إِخْسَانْ إِنُو أَقَا أَرْشَانْ.
12 إِ مَارَّا إِنِّي ذ أَيِي إِحصَّارنْ ذوْڒغْ ذ أَسْثهْزِي،
إِ جِّيرَانْ إِنُو قَاعْ أَطَّاسْ،
إِ إِمْقَارَّابنْ إِنُو ذوْڒغْ ذ إِجّنْ إِ إِسّْنخْڒِيعنْ.
إِنِّي ذ أَيِي إِتّْوَاڒِينْ ذڭْ وبْرِيذْ، تّْرَاكّْوَاڒنْ زَّايِي. ▪
13 تُّونْ أَيِي س وُوڒْ أَمْ يِيجّْ ن ؤُمتِّينْ،
ذوْڒغْ أَمشْنَاوْ إِشقْفَانْ ن وقْذِيحْ،
14 مَاغَارْ سْڒِيغْ أَقَا أَطَّاسْ شقّْفنْ ذَايكْ،
أَسِّيڭّْوذْ ثُوغَا إِثنّضْ أَيِي-د ؤُمِي خَافِي ڭِّينْ ثَامعْمُوتْشْ.
ثُوغَا أَرزُّونْ أَذْ كّْسنْ ثُوذَارْثْ إِنُو.
15 مَاشَا نشّْ تّشْڒغْ خَاكْ، أَ سِيذِي،
قَّارغْ: ’شكْ ذ أَربِّي إِنُو!‘
16 إِكُوذنْ إِنُو أَقَا أَثنْ ذڭْ ؤُفُوسْ نّكْ.
سنْجمْ أَيِي زڭْ ؤُفُوسْ ن ڒْعذْيَانْ إِنُو ؤُ زڭْ إِنِّي ذ أَيِي إِضفَّارنْ،
17 أجّْ ؤُذمْ نّكْ أَذْ يڭّْ ثَافَاوْثْ خْ إِمْسخَّارنْ نّكْ،
سنْجمْ أَيِي س ثْمخْسِيوْثْ نّكْ إِشوَّارنْ.
18 أَ سِيذِي، وَارْ تّجِّي أَذْ ذوْڒغْ تّْسضْحِيغْ،
مَاغَارْ خَاكْ إِ تّْڒَاغِيغْ.
أَرّْ إِعفَّاننْ أَذْ ذوْڒنْ تّْسضْحَانْ،
أَرّْ إِ-ثنْ أَذْ سُّوسْمنْ ذِي ڒَاخَارْثْ.
19 أجّْ أَذْ سْقَارنْ إِينْشِيشنْ إِسّْخَارِّيقنْ،
إِنِّي إِسَّاوَاڒنْ س نّْفَاخثْ ضِيدّْ إِ ؤُمْسڭّذْ،
س ؤُعفَّارْ ذ ؤُسحْقَارْ.
20 مشْحَاڒْ إِمقَّارْ ڒْخَارْ نّكْ إِ ثْخمّْڒذْ إِ ينِّي شكْ إِتّڭّْوذنْ،
ونِّي ثسّْوجْذذْ إِ ينِّي غَاركْ د-يَاركّْوَاڒنْ زِي ثَارْوَا ن بْنَاذمْ! ▪
21 شكْ ثسّْدُّورْيذْ إِ-ثنْ س ؤُڒحَّافْ ن وُوذمْ نّكْ،
زِي نّْفَاخثْ ن بْنَاذمْ.
شكْ ثسّْنُوفَّارذْ إِ-ثنْ ذِي ثخْزَانْثْ،
زڭْ ؤُمْشُوبّشْ ن إِينْشِيشنْ.
22 أَذْ إِتّْوَابَاركْ سِيذِي،
مَاغَارْ نتَّا يَارَّا أَيِي-د ثَامخْسِيوْثْ نّسْ إِشوَّارنْ ذ ڒعْجبْ،
ذڭْ إِشْثْ ن ثنْذِينْثْ إِفَارْينْ.
23 نشّْ ذغْيَا نِّيغْ: ”نشّْ تّْوَاقسّغْ زِي زَّاثْ إِ ثِيطَّاوِينْ نّكْ!‘
مَاشَا عَاذْ شكْ ثسْڒِيذْ إِ ثْمِيجَّا ن ؤُحشّمْ إِنُو ؤُمِي د خَاكْ ڒَاغِيغْ.
24 سْعِيزّمْ سِيذِي، مَارَّا إِمْثِيقَّانْ نّسْ،
مَاغَارْ سِيذِي إِحطَّا خْ ينِّي إِتَّامْننْ،
ؤُ ونِّي إِتّڭّنْ س نّْفَاخثْ، إِتّْخدْجصْ إِ-ث س ؤُفيّضْ.
25 إِڒِيمْ ذ إِرْيَازنْ ؤُ نتَّا أَذْ ذَايْومْ يڭّْ ؤُڒْ،
وَاهْ، مَارَّا إِنِّي إِتّْرَاجَانْ سِيذِي. ▪