‏1 أَزهّذْ، إِزْڒِي ن ؤُذشّنْ ن ثَادَّارْثْ ن ذَاوُوذْ.

‏2 نشّْ أَذْ شكْ سُّوعْڒِيغْ، أَ سِيذِي،

مَاغَارْ شكْ ثسّْڭعّْذذْ أَيِي،

وَارْ ثجِّيذْ شَا ڒْعذْيَانْ إِنُو أَذْ فَارْحنْ خْ وعْرُورْ إِنُو.

‏3 أَ سِيذِي، أَربِّي إِنُو، نشّْ ڒَاغِيغْ أَشْ،

ؤُشَا شكْ ثسّْڭنْفِيذْ أَيِي.

‏4 أَ سِيذِي، شكْ ثسُّوعْڒِيذْ ڒعْمَارْ إِنُو زِي ڒَاخَارْثْ،

ثَارِّيذْ أَيِي-د غَارْ ثُوذَارْثْ جَارْ ينِّي د-إِهكّْوَانْ ذڭْ وحْفُورْ.

‏5 زهّْذمْ إِ سِيذِي، أَ كنِّيوْ، إِمْثِيقَّانْ نّسْ،

قَاذَامْ مَاحنْذْ أَذْ ثْعقْڒمْ خْ ثْقدَّاسْثْ نّسْ. ^▪  

‏6 مَاغَارْ أَغْضَابْ نّسْ إِتّكّْ ذْرُوسْ وَاهَا،

مَاشَا أَرْضَا نّسْ إِتّْغِيمَا مَارَّا ثُوذَارْثْ.

ذِي ثْمذِّيثْ أَقَا ذِينْ إِمطَّاونْ أَڒْ دْجِيڒثْ،

مَاشَا غَارْ ثُوفُّوثْ أَقَا ذِينْ أَسْڒِيوْڒوْ.

‏7 ذڭْ ؤُفْڒَاحْ إِنُو نِّيغْ:

”وَارْ تّفَارِيغغْ شَا إِ ڒبْذَا!“

‏8 أَ سِيذِي، ذِي ڒْخَاضَارْ نّكْ ثسّْمثْنذْ أَذْرَارْ إِنُو س ؤُمتّنْ إِجهْذنْ،

مَاشَا ؤُمِي ثْڒحّْفذْ ؤُذمْ نّكْ، ذوْڒغْ تّڭّْوذغْ.

‏9 نشّْ ڒَاغِيغْ أَشْ-د، أَ سِيذِي،

تَّارغْ أَرْضَا زِي سِيذِي إِنُو.

‏10 مَانْ ڒفْضڒْ نْ إِذَامّنْ إِنُو، ن ؤُهكّْوُو إِنُو ذڭْ ونْضڒْ؟

مَا أَذْ شكْ ثْقَاذَا ثْعجَّاجْثْ؟

مَا أَذْ ثْبَارّحْ س ڒَامَانْ نّكْ؟

‏11 سڒْ-د غَارِي، أَ سِيذِي، ؤُ حِينّْ خَافِي،

أَ سِيذِي، إِڒِي ذ أَمْعَاونْ إِنُو.

‏12 شكْ أَقَا ثَارِّيذْ ثْغُويِّيثْ إِنُو ن وشْضَانْ ذ شّْضِيحْ س نُّوبْثَاثْ،

ثسَّارْخُوذْ ثْخَانْشثْ إِنُو ن وشْضَانْ،

ثسّْبيْسذْ أَيِي س ڒفْرَاحثْ،

‏13 حِيمَا أَعُودْجِي إِنُو أَذْ أَشْ إِزهّذْ ؤُ وَارْ إِتّْسُوسُومْ.

أَ سِيذِي، أَربِّي إِنُو، نشّْ أَذْ شكْ قَاذِيغْ إِ ڒبْذَا.