‏1 إِ ؤُمقّْرَانْ ن إِمغْنَاجنْ. زڭْ ؤُمْسخَّارْ ن سِيذِي. ن ذَاوُوذْ.

‏2 أَخطُّو ن ؤُعفَّانْ إِسَّاوَاڒْ ذَاخڒْ ذڭْ وُوڒْ إِنُو:

”وَارْ غَارسْ ثِيڭّْوُوذِي ن أَربِّي زَّاثْ إِ ثِيطَّاوِينْ نّسْ.“

‏3 مِينْزِي أَخطُّو أَيَا إِسّْحِينَّابْ إِ-ث ذِي ثِيطَّاوِينْ نّسْ،

أَڒَامِي يُوفَا أَقَا ڒْمُوعْصِييّثْ نّسْ ثَارَّا إِ-ث-إِ-د غَارْ وشْرَاهْ.

‏4 أَوَاڒنْ ن ؤُقمُّومْ نّسْ أَقَا أَثنْ ذ ڒْغشّْ ذ وشْمَاثْ،

نتَّا إِسّْبدّْ أَذْ يَارْزُو ڒفْهَامثْ حِيمَا أَذْ إِڭّْ ڒْخَارْ.

‏5 إِتّْخمّمْ ذِي ڒْغشّْ ذِي قَامَا نّسْ،

إِڭُّورْ أَذْ إِبدّْ ذڭْ إِجّْ ن وبْرِيذْ وَارْ إِصبْحنْ.

ڒْغَارْ وَارْ ث إِتّْمنْضِيرْ.

‏6 أَ سِيذِي، ثَامخْسِيوْثْ نّكْ إِشوَّارنْ ثِيوضْ أَڒْ إِجنْوَانْ،

ڒَامَانْ نّكْ أَڒْ إِسيْنُوثنْ. ^▪  

‏7 ثَاسڭْذَا نّكْ ثڭَّا أَمْ إِذُورَارْ ن أَربِّي،

ڒحْكَامَاثْ نّكْ أَمْ وَامَانْ يُودْجْغنْ.

سِيذِي إِسّنْجَامْ بْنَاذمْ ذ ڒْمَاڒْ.

‏8 مشْحَاڒْ ثِيغْڒَا ثْمخْسِيوْثْ نّكْ إِشوَّارنْ، أَ أَربِّي،

أَڒَامِي ثَارْوَا ن بْنَاذمْ ثَاركّْوَاڒنْ غَارْ ثِيڒِي ن وَافْرِيونْ نّكْ.

‏9 تّْوَاسْجَاوْننْ س ؤُفيّضْ س ثَاذُونْثْ ن ثَادَّارْثْ نّكْ،

إِجّْ ن يغْزَارْ س نّْعَامِي نّكْ ثوْشذْ أَسنْ مَاحنْذْ أَذْ زَّايسْ سْونْ.

‏10 مَاغَارْ غَاركْ إِ إِدْجْ ڒْعُونْصَارْ ن ثُوذَارْثْ،

ذِي ثْفَاوْثْ نّكْ أَقَا نتّْوَاڒَا ثَافَاوْثْ.

‏11 سْوِيژّضْ ثَامخْسِيوْثْ نّكْ إِشوَّارنْ خْ ينِّي إِ شكْ إِسّْننْ،

ثَاسڭْذَا نّكْ خْ ينِّي إِ غَارْ إِدْجْ وُوڒْ إِسڭّْمنْ.

‏12 وَارْ تّجِّي أَذْ خَافِي د-يَاسْ ؤُضَارْ ن أَيْثْ ن بُو-نّْفَاخثْ،

وَارْ تّجِّي أَفُوسْ ن إِعفَّاننْ أَذْ أَيِي د-يَارّْ أَذْ ثلّْعغْ مَانِي مَّا.

‏13 أَقَا ذِينْ إِ وْضَانْ إِنِّي إِتّڭّنْ ڒْمُوعْصِييّثْ،

تّْوَاغضْڒنْ غَارْ ثمُّورْثْ ؤُ وَارْ زمَّارنْ عَاذْ أَذْ كَّارنْ عَاوذْ.