‏1 أَزهّذْ ن ذَاوُوذْ.

سِيذِي ذ ثَافَاوْثْ إِنُو ذ ؤُسنْجمْ إِنُو،

وِي زِي غَا ڭّْوذغْ؟

سِيذِي ذ لْقلْعَا إِجهْذنْ إِ ثُوذَارْثْ إِنُو،

وِي زِي غَا نّْخڒْعغْ عَاذْ؟ ^▪  

‏2 ؤُمِي غَارِي د-قَارّْبنْ إِعفَّاننْ حِيمَا أَذْ شّنْ دَّاثْ إِنُو،

نّْقَارْضنْ يِينِّي ذ أَيِي إِحصَّارنْ ذ ڒْعذْيَانْ إِنُو سِيمَانْثْ نْسنْ

ؤُشَا وْضَانْ غَارْ ثمُّورْثْ.

‏3 وَاخَّا أَذْ خَافِي إِحْجمْ إِجّْ ن ڒْعسْكَارْ،

ؤُڒْ إِنُو وَارْ إِتّڭّْوَاذْ شَا.

وَاخَّا أَذْ خَافِي إِكَّارْ ؤُمنْغِي، عَاذْ نشّْ تّْغِيمِيغْ تّشْڒغْ.

‏4 إِشْثْ ن ڒْحَاجّثْ تَّارغْ زِي سِيذِي، ثَا أَذْ خَاسْ أَرْزُوغْ:

مِينْ غَا كّغْ دَّارغْ أَذْ قِّيمغْ أَذْ زذْغغْ ذِي ثَادَّارْثْ ن سِيذِي،

حِيمَا أَذْ ژَترغْ ڒضْرَافثْ ن سِيذِي،

ؤُ حِيمَا أَذْ بقْشغْ ذِي زَّاوشْثْ نّسْ ثَامقّْرَانْثْ.

‏5 مَاغَارْ نتَّا إِسّْذُوڒُويْ أَيِي ذڭْ ؤُذُورِّي نّسْ ذڭْ وَاسّْ ن ڒْغَارْ.

نتَّا إِسّْڒقَّا أَيِي ذڭْ ؤُسڒْقِي ن ؤُقِيضُونْ نّسْ،

نتَّا إِسّْڭعَّاذْ أَيِي خْ إِشْثْ ن ثصْضَارْثْ.

‏6 ڒخُّو أَذْ إِتّْوَاسْڭعّذْ ؤُزدْجِيفْ إِنُو خْ ڒْعذْيَانْ إِنُو إِنِّي ذ أَيِي د-إِنّْضنْ،

ؤُ س ؤُصُوضِي س وسْرُودّحْ ذِي ڒْپُوقْ أَذْ أَوْيغْ ثِيغَارْصَا غَارْ ؤُقِيضُونْ نّسْ،

أَذْ غنّْجغْ، وَاهْ أَذْ زهّْذغْ إِ سِيذِي.

‏7 سڒْ غَارْ ثْمِيجَّا إِنُو، أَ سِيذِي، خْمِي إِ غَا ڒَاغِيغْ،

حِينّْ خَافِي ؤُ أَرّْ-د خَافِي.

‏8 زَّايكْ إِ إِسَّاوَاڒْ وُوڒْ إِنُو: ”أَرْزُو خْ وُوذمْ إِنُو!“

نشّْ أَرزُّوغْ خْ وُوذمْ نّكْ، أَ سِيذِي.

‏9 وَارْ زَّايِي تّفَّارْ ؤُذمْ نّكْ،

وَارْ تّْخِييَّابْ أَمْسخَّارْ نّكْ ذڭْ وغْضَابْ.

ثُوغَا شكْ ذ أَمْعَاونْ إِنُو.

وَارْ ذ أَيِي تّْسمْحذْ ؤُ وَارْ ذ أَيِي تّجِّي، أَ أَربِّي ن ؤُسنْجمْ إِنُو.

‏10 مَاغَارْ بَابَا ذ يمَّا أَقَا سمْحنْ ذَايِي،

مَاشَا سِيذِي أَذْ أَيِي إِكْسِي غَارسْ.

‏11 سْشنْ أَيِي أَبْرِيذْ نّكْ، أَ سِيذِي،

نْذهْ أَيِي غَارْ وبْرِيذْ إِسڭّْمنْ،

ذِي سِّيبّثْ ن يِينِّي ذ أَيِي إِحصَّارنْ. ^▪  

‏12 وَارْ ذ أَيِي تّْسلّمْ غَارْ مژْرِي ذڭْ ڒعْمَارْ ن يِينِّي ذ أَيِي إِحصَّارنْ،

مَاغَارْ ڒشْهُوذْ ن ژُورْ كَّارنْ خَافِي،

إِنِّي إِ خَافِي إِتّْصُوضنْ س ڒخْشُونشْثْ.

‏13 ؤُهْ، مَاڒَا نشّْ زعْمَا وَارْ ؤُمِينغْ أَذْ ژَترغْ ڒْخَارْ ن سِيذِي،

ذِي ثمُّورْثْ ن يِينِّي إِدَّارنْ ...!

‏14 رَاجَا سِيذِي، إِڒِي ذ أَرْيَازْ،

نتَّا أَذْ ذَايكْ يڭّْ ؤُڒْ،

وَاهْ رَاجَا سِيذِي. ^▪