‏1 أَزهّذْ ن ذَاوُوذْ.

أَلِيفْ. أَ سِيذِي، غَاركْ إِ د-سّْڭعَّاذغْ ڒعْمَارْ إِنُو.

‏2 بِيثْ. أَ أَربِّي إِنُو، نشّْ تّشْڒغْ خَاكْ.

أجّْ أَيِي وَارْ تّْسضْحِيغْ،

أجّْ ڒْعذْيَانْ إِنُو وَارْ خَافِي تّسْڒِيوْڒِيونْ س ڒفْرَاحثْ. ^▪  

‏3 ڭِيملْ. وَاهْ، مَارَّا إِنِّي شكْ إِتّْرَاجَانْ

وَارْ تّْسضْحِينْ.

إِنِّي إِڭِّينْ س ڒغْذَارْ بْڒَا سِّيبّثْ،

أَذْ سضْحنْ. ^▪  

‏4 ذَالِيثْ. أَ سِيذِي، سّْشنْ أَيِي إِبْرِيذنْ نّكْ،

سْغَارْ أَيِي إِمسْرَاقْ نّكْ. ^▪  

‏5 هِي. نْذهْ أَيِي ذِي ثِيذتّْ نّكْ ؤُ سْغَارْ أَيِي،

مِينْزِي شكْ ذ أَربِّي ن ؤُسنْجمْ إِنُو،

نشّْ سِّيثِيمغْ خَاكْ أَسّْ مَارَّا.

‏6 زَايِينْ. عْقڒْ، أَ سِيذِي، خْ أَرّحْمثْ نّكْ،

ؤُ خْ ثْمخْسِيوْثْ نّكْ إِشوَّارنْ،

مَاغَارْ أَقَا أَثنْثْ دْجَانْثْ زِي ڒبْذَا. ^▪  

‏7 خِيثْ. وَارْ تِّيذَارْ شَا دّْنُوبْ ن ثمْژِي إِنُو

ؤُڒَا ذ إِخطَّانْ إِنُو.

خمّْ مَاشَا غَارِي ذِي ثْمخْسِيوْثْ نّكْ إِشوَّارنْ،

ذِي طّْوعْ ن ثْشُونِي نّكْ، أَ سِيذِي.

‏8 ثِيث. سِيذِي إِصْبحْ، إِشْنَا،

س ؤُينِّي أَذْ إِسّْغَارْ أَبْرِيذْ إِ إِمذْنَابْ.

‏9 يُوذْ. نتَّا أَذْ إِڭوّذْ إِمْهِيننْ س ڒْحقّْ،

نتَّا أَذْ إِسّڒْمذْ أَبْرِيذْ نّسْ إِ إِمْهِيننْ.

‏10 كَافْ. مَارَّا إِمسْرَاقْ ن سِيذِي أَقَا أَثنْ ذ ثَامخْسِيوْثْ إِشوَّارنْ ذ ڒَامَانْ،

إِ ينِّي إِحطَّانْ ڒْعَاهْذْ نّسْ ذ شَّاهَاذَاثْ نّسْ.

‏11 لَامِيذْ. ذِي طّْوعْ ن يِيسمْ نّكْ، أَ سِيذِي،

غْفَارْ ڒْمُوعْصِييّثْ إِنُو، مَاغَارْ أَقَا-ت ذ أَطَّاسْ.

‏12 مِيمْ. مَانْ ونْ ذ أَرْيَازْ إِ إِتّڭّْوذنْ سِيذِي؟

نتَّا أَذْ أَسْ إِسّڒْمذْ أَبْرِيذْ إِ إِتّْخصَّا أَذْ إِخْضَارْ.

‏13 نُونْ. ڒعْمَارْ نّسْ أَذْ إِسّنْسْ ذِي ڒْخِيرْ،

زَّارِيعثْ نّسْ أَذْ وَارْثنْ ثَامُّورْثْ.

‏14 سَامِيخْ. ڒَامَانْ إِ ذِينْ ن سِيذِي إِ ينِّي زَّايسْ إِتّڭّْوْذنْ،

ؤُ ڒْعَاهْذْ نّسْ مَاحنْذْ أَذْ أَسنْ ث إِسَّارْڭبْ.

‏15 عَايِينْ. ثِيطَّاوِينْ إِنُو ڒبْذَا ذِي سِيذِي،

مِينْزِي نتَّا أَذْ إِفكّْ إِضَارنْ إِنُو زِي ثْرَاشَّا.

‏16 بِي. أَرّْ-د غَارِي س وُوذمْ ؤُ حِينّْ خَافِي،

مَاغَارْ نشّْ أَقَا أَيِي وحّْذِي ؤُ ذِي ڒغْبنْ.

‏17 ثْسَاذِي. ڒحْصَارَاثْ ن وُوڒْ إِنُو أَقَا مَّارْنِينْثْ.

سُوفّغْ أَيِي زِي دِّيقَاثْ إِ ذ أَيِي.

‏18 رِيخْ. خْزَارْ-د غَارْ ڒغْبنْ إِنُو ذ وَارْبرْ إِنُو،

كْسِي خَافِي مَارَّا دّْنُوبْ إِنُو.

‏19 رِيخْ. خْزَارْ غَارْ ڒْعذْيَانْ إِنُو، مِينْزِي تّْوَاكْثَارنْ،

نِيثْنِي شَارّْهنْ أَيِي س يِيجّْ ن وشْرَاهْ إِقسْحنْ.

‏20 شِينْ. حْضَا خْ ڒعْمَارْ إِنُو ؤُ فكّْ أَيِي!

وَارْ ذ أَيِي ثجِّي شَا أَذْ سضْحِيغْ، مِينْزِي خَاكْ إِ تّشْڒغْ.

‏21 ثَاوْ. أَذْ ثحْذَا أَيِي ڒكْمَارثْ ذ ڒصْفَايثْ،

مَاغَارْ سِّيثِيمغْ ذَايكْ.

‏22 أَ أَربِّي، فْذِي إِسْرَائِيل زِي مَارَّا ڒحْصَارَاثْ نّسْ.