‏1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ.

‏2 أَ سِيذِي، أَجدْجِيذْ إِفَارْحْ س جّهْذْ نّكْ،

ؤُ مشْحَاڒْ إِفَارْحْ س ؤُسنْجمْ نّكْ!

‏3 ثوْشِيذْ أَسْ مژْرِي ن وُوڒْ نّسْ،

شكْ وَارْ ثُوڭِيذْ شَا أَزَاوڭْ ن إِينْشِيشنْ نّسْ. سِيلَاهْ.

‏4 مَاغَارْ شكْ ثُوسِيذْ-د إِ ؤُمْسَاڭَارْ أَكِيذسْ س لْبَارَاكَاثْ شُّورنْثْ س ڒْخَارْ،

ثقّْنذْ أَسْ تَّاجْ ن وُورغْ إِتّْوَاصفَّانْ خْ ؤُزدْجِيفْ نّسْ.

‏5 إِتَّارْ أَشْ ثُوذَارْثْ،

ثوْشِيذْ أَسْ ت،

ثُوزّڭَّارْثْ ن وُوسَّانْ إِ ڒبْذَا قَاعْ.

‏6 إِمْغَارْ ؤُعُودْجِي نّسْ س ؤُسنْجمْ نّكْ،

ثمَّارْسذْ خَاسْ ثِيسِّيقْثْ ذ ڒْعزّْ. ^▫  

‏7 مِينْزِي شكْ ثَارِّيذْ ث ذ لْبَارَاكَا ثَامقّْرَانْثْ إِ ڒبْذَا،

شكْ ثشُّورذْ ث س ڒفْرَاحثْ غَارْ وُوذمْ نّكْ.

‏8 مَاغَارْ أَجدْجِيذْ إِتّْشَاڒْ خْ سِيذِي،

س ثْمخْسِيوْثْ إِشوَّارنْ ن ؤُمْعُودْجِي خْ كُوڒْشِي وَارْ إِتّفْرِيغْ.

‏9 أَفُوسْ نّكْ أَذْ يَافْ مَارَّا ڒْعذْيَانْ نّكْ،

أَفُوسْ أَفُوسِي نّكْ أَذْ يَافْ مَارَّا إِنِّي شكْ إِشَارّْهنْ.

‏10 شكْ أَذْ ثنْ ثَارِّيذْ أَمشْنَاوْ ثَافْقُونْثْ إِشمّْضنْ ذِي ڒْوقْثْ ن وضْحَارْ نّكْ،

سِيذِي أَذْ ثنْ إِصَارْضْ س وغْضَابْ نّسْ،

ثِيمسِّي أَذْ ثنْ ثشّْ.

‏11 أَذْ ثمْحِيذْ ڒْغِيدْجثْ نْسنْ زِي ثمُّورْثْ،

زَّارِيعثْ نْسنْ جَارْ ثَارْوَا ن بْنَاذمْ.

‏12 مَاغَارْ نِيثْنِي نذْينْ أَشْ ڒْغَارْ، ڭِّينْ إِشْثْ ن ثْمعْمُوتْشْ،

مَاشَا وَارْ زمَّارنْ وَالُو.

‏13 مَاغَارْ شكْ أَذْ ثنْ ثڭّذْ جَارْ ثِيطَّاوِينْ،

س إِفِيڒَانْ ن ڒْقوْسْ نّكْ أَذْ ثْنيّْشذْ خْ وُوذْمَاونْ نْسنْ.

‏14 سْڭعّذْ إِخفْ نّكْ، أَ سِيذِي، س جّْهذْ نّكْ!

أجّْ أَنغْ أَذْ نْغنّجْ ؤُ أَذْ نْزهّذْ إِ ثْزمَّارْ نّكْ.