22
1 إِ ؤُمقّْرَانْ ن إِمغْنَاجنْ، س ثغْنِينْثْ ن ’ثُوذَاذْثْ ن ثُوفُّوثْ‘. أَزهّذْ ن ذَاوُوذْ. 2 أَربِّي إِنُو، أَربِّي إِنُو، مَايمِّي إِ ذ أَيِي ثجِّيذْ؟
زِي ڒَاڭّْوَاجْ إِ ثدْجِيذْ زڭْ ؤُسنْجمْ إِنُو،
زڭْ وَاوَاڒنْ إِ سْغُويُّوغْ أَمْ ويْرَاذْ. ▪
3 أَ أَربِّي إِنُو، ڒَاغِيغْ ذڭْ وَاسّْ، مَاشَا شكْ وَارْ خَافِي د-ثَارِّيذْ شَا،
س دْجِيڒثْ، مَاشَا نشّْ وَارْ ؤُفِيغْ أَرَّاحثْ.
4 شكْ ذ أَمْقدّسْ إِ ثدْجِيذْ، ثْزدّْغذْ ذِي ڒْوسْثْ ن إِزْڒَانْ ن ؤُصبّحْ ن إِسْرَائِيل.
5 تّشْڒنْ خَاكْ ڒجْذُوذْ نّغْ،
ثُوغَا تّشْڒنْ ؤُ شكْ ثَارِّيذْ ثنْ أَذْ نجْمنْ.
6 نِيثْنِي سْغُويّنْ-د غَاركْ ؤُشَا تّْوَاسْنجْمنْ،
ثُوغَا تّشْڒنْ خَاكْ ؤُ وَارْ نّْحشْمنْ شَا. ▪
7 نشّْ ذ إِشْثْ ن ثْكشَّا، وَارْ إِدْجِي ذ أَرْيَازْ،
نشّْ ذ ڒْحڭْرَا ن إِوْذَانْ، تّْوَاسحْقَارغْ جَارْ ڒْڭنْسْ. ▫
8 مَارَّا إِنِّي ذ أَيِي إِژْرِينْ، سْثهْزَانْ زَّايِي،
أَرْزْمنْ إِينْشِيشنْ نْسنْ، سّنْهزَّانْ أَزدْجِيفْ. ▪
9 قَّارنْ: ”سعْذُو ث خْ سِيذِي،
أجّْ وَانِيثَا أَذْ ث إِفكّْ، أَذْ ث إِسّنْجمْ،
مَاغَارْ نتَّا يَارْضَا خَاسْ.“ ▪
10 مِينْزِي شكْ ثْجبّْذذْ أَيِي-د زڭْ ؤُعذِّيسْ ن يمَّا،
شكْ ثَارِّيذْ أَيِي ذِي ڒَامَانْ خْ وَابُّوشنْ ن يمَّا.
11 زِي ڒمْرَاوثْ تّْوَامّنْضَارغْ خَاكْ،
زڭْ ؤُعذِّيسْ ن يمَّا أَقَا شكْ ذ أَربِّي إِنُو.
12 وَارْ تّْغِيمِي بُو غَارْ ڒَاڭّْوَاجْ زَّايِي،
مَاغَارْ ڒحْصَارثْ ثُوذسْ ؤُ وَارْ ذِينْ شَا أَمْعَاوَانْ.
13 أَطَّاسْ ن إِينْذُوزنْ نّْضنْ أَيِي-د،
إِفُونَاسنْ ن ڒخْڒَا إِجهْذنْ زِي بَاشَانْ قُووَّارنْ أَيِي-د، ▫
14 أَرْزْمنْ-د غَارِي أَقمُّومْ نْسنْ
أَمشْنَاوْ إِجّْ ن ويْرَاذْ إِتّْمزَّاقنْ، إِزهَّارنْ.
15 نشّْ تّْوَافَارّْغغْ أَمْ وَامَانْ ؤُ مَارَّا إِخْسَانْ إِنُو تّْوَامّْسبْضَانْ.
ؤُڒْ إِنُو أَمْ شّْمعْ، أَقَا إِفْسِي ذَاخڒْ إِنُو.
16 جّهْذْ إِنُو يُوژغْ أَمْ إِجّْ ن ؤُشدْجِيقْ ن إِشْثْ ن ثْقدُّوحْثْ،
إِڒسْ إِنُو إِڒْصقْ غَارْ وَانغْ إِنُو.
شكْ ثسَّارْسذْ أَيِي ذِي ثْعجَّاجْثْ ن ڒْموْثْ.
17 مَاغَارْ إِطَانْ نّْضنْ أَيِي-د،
إِشْثْ ن بَانْذِييَّا ن ثَارْوَا ن ڒحْرَامْ قُووَّارنْ أَيِي-د،
أَقَا أَمشْنَاوْ أَيْرَاذْ إِفَاسّنْ ذ إِضَارنْ إِنُو. ▫ ▪
18 زمَّارغْ أَذْ حسْبغْ مَارَّا إِخْسَانْ إِنُو،
تّْوَاڒَانْ أَيِي نِيثْنِي، خزَّارنْ-د غَارِي.
19 نِيثْنِي بْضَانْ أَرُّوضْ إِنُو جَارْ أَسنْ،
ؤُشَا نْضَارنْ ثَاقدُّوحْثْ خْ ڒعْبَايثْ إِنُو. ▪
20 شكْ، أَ سِيذِي، وَارْ تِّيڒِي غَارْ ڒَاڭّْوَاجْ، أَ جّهْذْ إِنُو،
أَسْ-د ذغْيَا حِيمَا أَذْ أَيِي ثْعَاوْنذْ.
21 فكّْ ڒعْمَارْ إِنُو زِي سِّيفْ،
أَينِّي زڭْ ؤُقطّسْ ن وقْزِينْ.
22 فكّْ أَيِي زڭْ ؤُقمُّومْ ن ويْرَاذْ،
فكّْ أَيِي زڭْ وَاشَّاونْ ن إِفُونَاسنْ نْ ڒخْڒَا! أَقَا شكْ ثسْڒِيذْ أَيِي.
23 أَذْ بَارّْحغْ إِسمْ نّكْ إِ وَاوْمَاثنْ إِنُو،
أَذْ خَاكْ صبْحغْ ذِي ڒْوسْثْ ن وڭْرَاوْ نْ ڒْڭنْسْ. ▪
24 كنِّيوْ، إِنِّي إِتّڭّْوْذنْ سِيذِي، سمْغَارمْ ث،
أَ كنِّيوْ، مَارَّا زَّارِيعثْ ن يَاعْقُوبْ،
سْعُودْجمْ ث ؤُ وقَّارمْ ث،
أَ كنِّيوْ، مَارَّا زَّارِيعثْ ن إِسْرَائِيل،
25 مَاغَارْ نتَّا وَارْ إِسّحْقِيرْ شَا ڒحْصَارثْ ن ونِّي إِتّْوَاحْصَارنْ، وَارْ ت إِعِيفّْ شَا،
وَارْ خَاسْ إِسّْنُوفَّارْ شَا ؤُذمْ نّسْ،
مَاشَا نتَّا إِسْڒَا أَسْ مَاڒَا إِڒَاغَا أَسْ-د.
26 زَّايكْ أَذْ د-يَاسْ ؤُقَاذِي إِنُو ذڭْ إِجّْ ن وڭْرَاوْ ن ڒْڭنْسْ أَمقّْرَانْ،
أَذْ كمّْڒغْ لْوُوعُوذْ إِنُو زَّاثْ إِ ينِّي زَّايسْ إِتّڭّْوذنْ.
27 إِمْوَاضْعنْ أَذْ شّنْ ؤُ أَذْ جِّيوْننْ،
إِنِّي أَرزُّونْ خْ سِيذِي أَذْ أَسْ صبّْحنْ،
ؤُڒَاونْ نْسنْ أَذْ دَّارنْ إِ ڒبْذَا.
28 مَارَّا ثِينڭُّورَا ن ثمُّورْثْ أَذْ ث إِذَارنْثْ،
أَذْ د-ذوْڒنْ غَارْ سِيذِي،
مَارَّا ڒَادْجَاثْ ن دُّونشْثْ أَذْ أَضَارنْثْ زَّاثْ إِ وُوذمْ نّكْ، ▪
29 مِينْزِي ثَاڭلْذِيثْ إِ سِيذِي إِ ثدْجْ،
نتَّا إِحكّمْ جَارْ ڒڭْنُوسْ.
30 مَارَّا إِنِّي إِصحّنْ ذِي ثمُّورْثْ أَذْ شّنْ أَذْ سجْذنْ،
مَارَّا إِنِّي د-إِهكّْوَانْ ذِي ثْعجَّاجْثْ أَذْ أَضَارنْ زَّاثْ إِ وُوذمْ نّسْ،
كُوڒْ إِجّنْ إِ وَارْ إِزمَّارنْ أَذْ إِحْضَا ڒعْمَارْ نّسْ.
31 زَّارِيعثْ أَذْ أَسْ ثْسخَّارْ،
أَذْ ثتّْوَازمّْ ذ أَرَّاوْ إِ سِيذِي إِنُو.
32 أَذْ د-أَسنْ، أَذْ بَارّْحنْ ثَاسڭْذَا نّسْ إِ يِيجّْ ن ڒْڭنْسْ،
ونِّي إِ غَا د-إِتّْوَاخڒْقنْ مَاغَارْ نتَّا أَقَا إِڭَّا إِ-ت. ▪