‏1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ.

‏2 إِجنْوَانْ بَارّْحنْ س ؤُعُودْجِي ن أَربِّي،

ڒْقُوبّثْ ثسِّيوڒْ خْ ڒْخذْمثْ ن إِفَاسّنْ نّسْ.

‏3 أَسّْ إِسَّازَّاڒْ أَوَاڒنْ إِ وَاسّْ،

دْجِيڒثْ ثسّْشَانْ ثُوسّْنَا غَارْ دْجِيڒثْ.

‏4 وَارْ إِدْجِي ذ ڒْهَارْذْ ؤُ وَارْ دْجِينْ شَا ذ أَوَاڒنْ،

ثْمِيجَّا نْسنْ وَارْ ذ أَسْ إِتّسْڒِي حذْ.

‏5 ڒُومُورْ نْسنْ إِفّغْ خْ ثمُّورْثْ مَارَّا،

أَوَاڒنْ نْسنْ فّْغنْ غَارسْ أَڒْ طَّارْفْ ن دُّونشْثْ.

نتَّا إِڭَّا ذِيهَا إِجّْ ن ؤُقِيضُونْ إِ ثْفُوشْثْ، ^▪  

‏6 أَمشْنَاوْ مُوڒَايْ نِّي د-إِسِّيجّنْ زڭْ وخَّامْ ن ڒمْڒَاشْ،

إِسْڒِيوْڒوْ أَمْ إِجّْ ن بُو-ثرْيَاسْثْ حِيمَا أَذْ إِكْسِي ذِي ثِيشْڒِي نّسْ. ^▪  

‏7 إِفّغْ-د زڭْ إِجّْ ن طَّارْفْ ن ؤُجنَّا،

ؤُشَا يُويُورْ أَڒْ طَّارْفْ نّسْ نّغْنِي،

وَارْ ثنُّوفَّارْ ؤُڒَا ذ إِشْثْ نْ ڒْحَاجثْ إِ ڒْحَاذُوقْ نّسْ.

‏8 أَقَا ثكْمڒْ شَّارِيعَا ن سِيذِي،

ثِيوِي-د أَڭنْفُو إِ بُوحْبڒْ.

شّْهَاذَاثْ ن سِيذِي ذَايْسنْثْ ڒَامَانْ،

تِّيشّنْثْ ثِيغِيثْ إِ ؤُحَافِي. ^▪  

‏9 ڒُومُورَاثْ ن سِيذِي سڭّْذنْ،

سّْفَارّْحنْ ؤُڒْ.

ثَاوْصِييّثْ ن سِيذِي ثصْفَا،

ثسّْشَانْ ثَافَاوْثْ إِ ثِيطَّاوِينْ.

‏10 ثِيڭّْوُوذِي زِي سِيذِي ثصْفَا،

ثقِّيمْ ثْبدّْ إِ ڒبْذَا.

ڒحْكَامَاثْ ن سِيذِي ذ ثِيذتّْ،

أَقَا-ثنْثْ ذ ڒْحقّْ مَارَّا.

‏11 نِيثنْثِي جبّْذنْثْ مژْرِي كْثَارْ خْ وُورغْ،

وَاهْ، كْثَارْ زڭْ وُورغْ إِتّْوَاصفَّانْ،

أَقَا-ثنْثْ ذ ثِيمِيژِيذِينْ خْ ثَامّنْثْ نِيغْ خْ ثَامّنْثْ ن ثغْرَاصْثْ. ^▪  

‏12 ؤُڒَا ذ أَمْسخَّارْ نّكْ إِتّْوَاوبّخْ زَّايْسنْثْ،

ذڭْ ؤُحطُّو نْسنْثْ ثنُّوفَّارْ ذَايسْ ڒْمُونثْ ثَامقّْرَانْثْ.

‏13 أَودَّارْ، وِي زَّايسْ يُوشِينْ؟

سِيزْذڭْ أَيِي زِي مِينْ وَارْ إِتّْبِيننْ.

‏14 حْضَا أَمْسخَّارْ نّكْ عَاوذْ زڭْ ؤُعفَّارْ،

حِيمَا وَارْ خَافِي إِتّْصدْجِيضْ،

حِيمَا أَذْ إِڒِيغْ ذ أَمزْذَاڭْ زڭْ ؤُخطُّو إِمْغَارنْ.

‏15 أَذْ د-أَسنْ وَاوَاڒنْ ن ؤُقمُّومْ إِنُو ذ إِخَارِيصّنْ ن وُوڒْ إِنُو،

خْ ڒْخَاضَارْ نّكْ، أَ سِيذِي، أَ ثَاصْضَارْثْ إِنُو ذ أَمفْذِي إِنُو!