18
1 إِ ؤُمقّْرَانْ ن إِمغْنَاجنْ. أَزهّذْ ن ذَاوُوذْ، أَمْسخَّارْ ن سِيذِي، ونِّي إِسِّيوْڒنْ أَوَاڒنْ ن يزْڒِي أَيَا إِ سِيذِي،
ذڭْ وَاسّْ ؤُمِي ث إِفكّْ سِيذِي،
زڭْ ؤُفُوسْ ن مَارَّا ڒْعذْيَانْ نّسْ، ؤُ زڭْ ؤُفُوسْ ن شَاوُولْ. ▫
2 نتَّا إِنَّا:
”نشّْ تّخْسغْ شكْ، أَ سِيذِي، جّهْذْ إِنُو ذ شكْ.
3 سِيذِي ذ جَّارْفْ إِنُو ذ لْپُورْجْ إِنُو ذ أَمْفكِّي إِنُو،
أَربِّي إِنُو، ثَاصْضَارْثْ إِنُو، نشّْ غَارسْ إِ غَا أَروْڒغْ.
شكْ ذ ثَاسدَّارْثْ إِنُو ن ؤُسڒْقِي ذ يِيشّْ ن ؤُسنْجمْ إِنُو،
لْپُورْجْ إِنُو يُوعْڒَانْ.
4 نشّْ ڒَاغِيغْ-د خْ سِيذِي، ونِّي إِسْذَاحدْجنْ أَسمْغَارْ،
ؤُ نشّْ أَقَا تّْوَاسْنجْمغْ زِي ڒْعذْيَانْ إِنُو.
5 إِسغْوَانْ ن ڒْموْثْ نّْضنْ أَيِي-د،
سِّيڭّْوذنْثْ أَيِي ڒْحمْڒَاثْ ن وَامَانْ إِهَاجنْ.
6 إِسغْوَانْ ن ڒَاخَارْثْ شَارْفنْ أَيِي،
ثِيخشْفِينْ ن ڒْموْثْ حْصَارنْثْ أَيِي.
7 ذِي ڒحْصَارثْ إِنُو ڒَاغِيغْ-د خْ سِيذِي،
خْ أَربِّي إِنُو إِ خْ د-ڒَاغِيغْ.
زِي زَّاوشْثْ نّسْ ثَامقّْرَانْثْ إِسْڒَا نتَّا إِ ثْمِيجَّا إِنُو،
إِغُويَّانْ إِنُو ؤُذْفنْ غَارْ إِمزُّوغنْ نّسْ.
8 خنِّي ثنْهزّْ ؤُ ثَارْجِيجْ ثمُّورْثْ،
ذْسُوسَا ن إِذُورَارْ تّْرَاحنْ-د تَّاسنْ-د ؤُ نْهزّنْ،
مَاغَارْ إِتّْوَاسَارْغْ وغْضَابْ نّسْ.
9 إِڭعّذْ-د دّخَّانْ زڭْ ونْزَارنْ نّسْ
ؤُ ثِيمسِّي زڭْ ؤُقمُّومْ نّسْ ثْصَارْضْ،
ڒفْحمْ إِتّحْذُوذُوقنْ إِتّْوَاسَارْغْ زَّايسْ.
10 نتَّا إِجَّا أَجنَّا أَذْ يَاضَارْ ؤُشَا خنِّي إِهْوَا-د نتَّا،
أَقَا ذِينْ إِجّْ ن ؤُسيْنُو إِبُّومْبسْ سَاذُو إِضَارنْ نّسْ.
11 إِنْذهْ خْ إِجّْ ن ؤُكِيرُوبْ، وَاهْ إِضْوَا،
ؤُشَا إِحوّمْ خْ وَافْرِيونْ ن ؤُصمِّيضْ. ▫
12 نتَّا إِڭَّا ثَادْجسْثْ أَمْ إِجّْ ن ؤُذُورِّي خْ يِيخفْ نّسْ، أَمْ ؤُعِيشُّو نّسْ،
إِجّْ ن وڭْرَاوْ ن وَامَانْ، إِسيْنُوثنْ إِقلّْجنْ إِبَّارشْننْ.
13 س ثِيسِّيقْثْ قِيبَاتْشْ نّسْ تّْوَاسَارْغنْ ڒفْحمْ إِتّحْذُوذُوقنْ.
14 سِيذِي إِڭَّا أَجَّاجْ أَذْ إِدُّوقّزْ ذڭْ إِجنْوَانْ،
أَمْعُودْجِي خْ كُوڒْشِي إِڭَّا ثْمِيجَّا نّسْ تّْنفْرَارَا.
15 نتَّا إِسّكّْ فْڒِيثْشَاثْ ن ڒْقوْسْ نّسْ ؤُشَا إِبزّعْ إِ-ثنْ،
إِزَّارْيضْ أَسَّامنْ ؤُشَا إِسِّيڭّْوذْ إِ-ثنْ.
16 ثِيسِيوِينْ ن إِغزْرَانْ ذوْڒنْثْ تّْبَاننْثْ،
ذْسُوسَا ن دُّونشْثْ ذوْڒنْ عَارَّانْ،
زڭْ ؤُودّبْ ن سِيذِي،
زڭْ ؤُصُوضِي ن ڒعْوِينْ زڭْ ونْزَارنْ نّسْ.
17 زِي سنّجْ إِسّْوِيژّضْ-د أَفُوسْ نّسْ، يِيوِي أَيِي،
إِجْبذْ أَيِي-د زڭْ وَامَانْ مْغَارنْ.
18 نتَّا إِفكّْ أَيِي-د زِي ڒعْذُو إِنُو إِجهْذنْ،
زڭْ إِنِّي ذ أَيِي إِشَارّْهنْ، مِينْزِي نِيثْنِي ثُوغَا جهّْذنْ خَافِي.
19 نِيثْنِي حْصَارنْ أَيِي ذڭْ وَاسّْ ن أَرْژِييّثْ إِنُو،
مَاشَا سِيذِي ثُوغَا ذ أَمْعمّذْ إِنُو.
20 نتَّا إِنْذهْ أَيِي غَارْ تَّاسِيعْ ؤُشَا إِسّنْجمْ أَيِي،
مَاغَارْ نتَّا ثُوغَا إِسّْعِيزَّا أَيِي.
21 سِيذِي إِخْڒفْ أَيِي عْلَاحْسَابْ ثَاسڭْذَا إِنُو،
عْلَاحْسَابْ ثَازْذُوڭِي ن إِفَاسّنْ إِنُو إِخدْجصْ أَيِي.
22 مَاغَارْ نشّْ طّْفغْ إِبْرِيذنْ ن سِيذِي،
وَارْ حيّْذغْ شَا خْ أَربِّي إِنُو س ؤُخيّبْ.
23 مَاغَارْ مَارَّا ڒْحقّْ نّسْ ثُوغَا جَارْ إِ ثِيطَّاوِينْ إِنُو،
وَارْ حيّْذغْ شَا خْ ثْوصَّا نّسْ.
24 ذوْڒغْ أَكِيذسْ كمْڒغْ،
حْضِيغْ إِخفْ إِنُو زِي ڒْمُوعْصِييّثْ إِنُو.
25 سِيذِي إِخْڒفْ أَيِي أَنشْثْ ن ثْسڭْذَا إِنُو،
أَنشْثْ ن ثَازْذُوڭِي ن إِفَاسّنْ إِنُو زَّاثْ إِ ثِيطَّاوِينْ نّسْ.
26 إِ ؤُمدُّوكّڒْ أَمْثِيقِّي إِ ثدْجِيذْ شكْ ذ أَمدُّوكّڒْ أَمْثِيقِّي،
إِ بُو-ثغْرُوضْثْ إِكمّْڒنْ إِ ثدْجِيذْ شكْ ثْكمّْڒذْ.
27 إِ ونِّي إِتّْوَاسِيزذْڭنْ أَقَا شكْ ذ أَمزْذَاڭْ،
أَكْ-ذ ونِّي إِفَارْغنْ، أَقَا ثْفَارْغذْ.
28 شكْ ثسّْنجْمذْ ڒْڭنْسْ إِتّْوَاحْصَارنْ،
مَاشَا ثِيطَّاوِينْ عفَّارنْثْ أَذْ ثنْثْ ثسّهْوِيذْ.
29 مِينْزِي شكْ ذ ڒفْنَارْ إِنُو، أَ سِيذِي!
أَربِّي إِنُو إِتّڭّْ ثَافَاوْثْ ذِي ثَادْجسْثْ إِنُو.
30 مِينْزِي أَكِيذكْ أَذْ أَزّْڒغْ خْ إِشْثْ ن بَانْذِييَّا،
أَكْ-ذ أَربِّي إِنُو أَذْ نڭْزغْ خْ إِجّْ ن ڒْحِيضْ.
31 أَبْرِيذْ ن أَربِّي إِكْمڒْ، مِينْ إِقَّارْ سِيذِي إِتّْوَاصفَّا ذِي ثْمسِّي.
نتَّا ذ ثَاسدَّارْثْ ن ؤُسڒْقِي إِ مَارَّا إِنِّي ذَايسْ إِتِّيقَّانْ.
32 مَاغَارْ مَانْ ونْ إِ إِدْجَانْ ذ أَربِّي، مْغِيرْ سِيذِي،
ؤُ مَانْ ونْ إِ إِدْجَانْ ذ ثَاصْضَارْثْ، مْغِيرْ أَربِّي نّغْ؟
33 أَربِّي ونِّي ذ أَيِي إِتّْبيْسنْ س جّْهذْ،
ونِّي ذ أَيِي إِتِّيشنْ أَبْرِيذْ إِنُو إِكْمڒْ.
34 نتَّا إِڭَّا إِضَارنْ إِنُو أَمْ ينِّي ن ثُوذَاذِينْ،
نتَّا يَارَّا أَيِي أَذْ بدّغْ خْ ڒڭْعُوذِي إِنُو.
35 إِسّڒْمذْ إِفَاسّنْ إِنُو إِ ؤُمنْغِي،
إِغَادْجنْ إِنُو مَاحنْذْ أَذْ محْضنْ إِجّْ ن ڒْقوْسْ ن نّْحَاسْ.
36 ثوْشِيذْ أَيِي ثَاسدَّارْثْ ن ؤُسڒْقِي ن ؤُسنْجمْ نّكْ،
أَفُوسْ نّكْ أَفُوسِي ذ أَسنّذْ إِنُو،
ؤُ س ؤُوَاضعْ نّكْ ثسّمْغَارذْ أَيِي.
37 أَقَا ثڭِّيذْ تَّاسِيعْ إِ إِصُورِيفنْ إِنُو سَاذُو إِنُو،
ؤُشَا ثِيشعْبِينْ إِنُو وَارْ ميّْڒنْثْ.
38 نشّْ ضْفَارغْ ڒْعذْيَانْ إِنُو ؤُ ثحِّيغْ ثنْ،
وَارْ د-تّْعِيقِيبغْ أَڒْ ثنْ قْضِيغْ.
39 نشّْ سّْنُوقّْبغْ ثنْ
أَڒَامِي وَارْ زمَّارنْ أَذْ كَّارنْ عَاوذْ.
نِيثْنِي وْضَانْ-د سَاذُو إِضَارنْ إِنُو.
40 ثْبيْسذْ أَيِي س جّهْذْ إِ ؤُمنْغِي،
ثَارِّيذْ-د إِنِّي غَارِي د-إِكَّارنْ أَذْ أَضَارنْ سَاذُو إِنُو.
41 شكْ ثوْشِيذْ أَيِي إِرِي ن ڒْعذْيَانْ إِنُو، ن يِينِّي ذ أَيِي إِشَارّْهنْ،
ؤُ نشّْ أَردّْدْجغْ ثنْ.
42 نِيثْنِي ڒَاغَانْ، مَاشَا وَارْ ذِينْ ثُوغِي ؤُمْسنْجمْ،
ڒَاغَانْ خْ سِيذِي، مَاشَا نتَّا وَارْ خَاسنْ د-يَارِّي.
43 نشّْ ودَّارغْ ثنْ أَمْ ثْعجَّاجْثْ زَّاثْ إِ ؤُسمِّيضْ،
أَمْ ؤُبدْجَاعْ خْ إِبْرِيذنْ فَارْضغْ زَّايْسنْ.
44 شكْ ثْفكّذْ أَيِي زڭْ إِمْشُوبّْشنْ ن ڒْڭنْسْ،
ثڭِّيذْ أَيِي ذ أَزدْجِيفْ ن ڒڭْنُوسْ،
إِجّْ ن ويْذُوذْ وَارْ ث سِّينغْ، أَذْ أَيِي إِسخَّارْ.
45 مْغِيرْ ڒَامِي إِسْڒَا ؤُمزُّوغْ وَاهَا، سْڒِينْ-د غَارِي.
إِبَارَّانِييّنْ سّْنِيعْمِيڒنْ سُّوپُوضنْ أَيِي.
46 فشْڒنْ إِبَارَّانِييّنْ،
فّْغنْ-د زِي لْبَارَاجَاثْ نْسنْ، أَرْجِيجنْ.
47 ثُوذَارْثْ إِ سِيذِي! أَذْ ثتّْوَابَاركْ ثصْضَارْثْ إِنُو.
أَذْ إِتّْوَاسْڭعّذْ أَربِّي ن ؤُسنْجمْ إِنُو.
48 أَربِّي ونِّي خَافِي إِتّنْثَاقَامنْ
ونِّي ذ أَيِي إِتّڭّنْ ڒڭْنُوسْ سَاذُو ؤُفُوسْ إِنُو،
49 ونِّي ذ أَيِي إِسُّوفُّوغنْ زڭْ ؤُفُوسْ ن ڒْعذْيَانْ إِنُو،
وَاهْ، شكْ ثسّْڭعَّاذذْ أَيِي ثِيوَا ن يِينِّي ذ أَيِي إِتّْضَادَّانْ،
شكْ ثسّنْجَامذْ أَيِي زڭْ ورْيَازْ ن ڒخْشُونشْثْ.
50 س ؤُينِّي، سِيذِي، خْسغْ أَذْ شكْ قَاذِيغْ،
أَذْ زهّْذغْ إِسمْ نّكْ.
51 نتَّا إِڭَّا إِسنْجِيمنْ ن ؤُجدْجِيذْ نّسْ مْغَارنْ،
ؤُشَا إِسّْشنْ ثَامخْسِيوْثْ نّسْ إِشوَّارنْ إِ ؤُمذْهُونْ نّسْ،
إِ ذَاوُوذْ ؤُ إِ زَّارِيعثْ نّسْ إِ ڒبْذَا.