17
1 ثَاژَادْجِيثْ ن ذَاوُوذْ. أَ سِيذِي، سڒْ غَارْ مِينْ إِدْجَانْ نِيشَانْ، ڭّمْ ڒْبَاڒْ إِ ؤُغُويِّي إِنُو،
أوْشْ أَمزُّوغْ خْمِي تّْژَادْجِيغْ س إِينْشِيشنْ وَارْ زَّايْسنْ د-إِتّكّْ شَا ڒْغشّْ.
2 أجّْ ڒْحقّْ إِنُو أَذْ إِفّغْ زِي زَّاثْ إِ وُوذمْ نّكْ،
أجّْ ثِيطَّاوِينْ نّكْ أَذْ خزَّارنْثْ غَارْ مِينْ إِدْجَانْ إِسڭّْذنْ.
3 شكْ ثْقدْجْبذْ ؤُڒْ إِنُو، ثَارْزُوذْ ذَايسْ سْ دْجِيڒثْ.
ثْجَارّْبذْ أَيِي، مَاشَا وَارْ ثُوفِيذْ وَالُو.
مَاڒَا خَارّْصغْ ذِي شَا وَارْ إِحْڒِي، وَارْ د-ثفِّيغْ شَا زڭْ إِينْشِيذنْ إِنُو.
4 خْ مِينْ تّڭّنْ إِوْذَانْ،
أَقَا حْضِيغْ إِخفْ إِنُو زِي ثبْرِيذِينْ ن أَيْثْ ن بُو-ڒخْشُونثْ،
عْلَاحْسَابْ أَوَاڒْ زڭْ إِينْشِيشنْ نّكْ.
5 أڭّْ إِصُورَافْ إِنُو ذِي جُّورَّاثْ ن إِضَارنْ نّكْ،
حِيمَا وَارْ فَارّْغنْ إِضَارنْ إِنُو.
6 نشّْ ڒَاغِيغْ خَاكْ، مِينْزِي شكْ أَذْ خَافِي د-ثَارّذْ، أَ أَربِّي،
أوْشْ أَيِي أَمزُّوغْ، سڒْ إِ مِينْ غَا إِنِيغْ.
7 سْشنْ ڒعْجبْ ن ثْمخْسِيوْثْ نّكْ إِشوَّارنْ،
شكْ ذ ونِّي إِسّنْجَامنْ إِنِّي يَارزُّونْ مَانِي إِ غَا يَاروْڒنْ
زڭْ ؤُفُوسْ ن ينِّي إِتّْغوّْغنْ خْ ؤُفُوسْ نّكْ أَفُوسِي.
8 حْضَا أَيِي أَمْ مُومُّو ن ثِيطّْ نّكْ،
سْنُوفَّارْ أَيِي ذِي ثِيڒِي ن وَافْرِيونْ نّكْ ▫
9 زڭْ إِعفَّاننْ إِنِّي ذ أَيِي إِحصَّارنْ،
إِنِّي ذ ڒْعذْيَانْ ن ڒعْمَارْ إِنُو، إِنِّي ذ أَيِي إِتّْقُووَّارنْ.
10 نِيثْنِي بلّْعنْ إِخفْ نْسنْ س ثْذُونْثْ نْسنْ،
س ؤُقمُّومْ نْسنْ سَّاوَاڒنْ س نّْفَاخثْ.
11 ڒخُّو قُووَّارنْ إِ إِصُورَافْ نّغْ،
ثِيطَّاوِينْ نْسنْ مُّوقّْڒنْثْ مَاحنْذْ أَذْ أَنغْ نْضَارنْ غَارْ ثمُّورْثْ.
12 نتَّا يَارْوسْ ذڭْ ويْرَاذْ نِّي إِمژّْرنْ أَذْ إِمزّقْ ثَايْمَارْثْ نّسْ،
خْ يِيجّْ ن ويْرَاذْ ذ أَمژْيَانْ إِزدّْغنْ ذڭْ إِمُوشَانْ إِنُّوفَّارنْ.
13 كَّارْ، أَ سِيذِي، رُوحْ مْسَاڭَارْ أَكِيذسْ، غْضڒْ-إِ-ث غَارْ ثمُّورْثْ.
فكّْ ڒعْمَارْ إِنُو س سِّيفْ نّكْ زڭْ ؤُعفَّانْ،
14 س ؤُفُوسْ نّكْ زڭْ إِرْيَازنْ، أَ سِيذِي،
زڭْ إِرْيَازنْ نِّي غَارْسنْ دُّونشْثْ ذ ثَاسْغَارْثْ مِينْ تّكّنْ دَّارنْ،
إِنِّي زِي ثتّْعمَّارذْ أَعذِّيسْ نْسنْ س ڒكْنُوزْ إِنُوفَّارنْ،
ؤُڒَا ذ إِحنْجِيرنْ نْسنْ تّْوَايَاوَاننْ،
تّجَّانْ مِينْ إِشطّنْ إِ ثَارْوَا نْسنْ.
15 نشّْ أَذْ ژَترغْ ؤُذمْ نّكْ ذِي ثْسڭْذَا،
أَذْ د-ذوْڒغْ جِّيوْنغْ س وَادُّوذْ نّكْ خْمِي د غَا فَاقغْ.