5
1 إِ ؤُمقّْرَانْ ن إِمغْنَاجنْ، أَكْ-ذ ثمْجَا. أَزهّذْ ن ذَاوُوذْ. 2 أَ سِيذِي، سڒْ-د إِ مِينْ غَا إِنِيغْ،
فهْمثْ إِ ؤُنِيخْسسْ إِنُو.
3 حكَّارْ إِ ثْمِيجَّا ن ؤُزَاوڭْ إِنُو،
أَ أَجدْجِيذْ إِنُو ذ أَربِّي إِنُو،
أَقَا إِ شكْ ؤُمِي تّْژَادْجِيغْ.
4 غَارْ ثُوفُّوثْ، أَ سِيذِي، ثسْڒِيذْ شكْ إِ ثْمِيجَّا إِنُو،
غَارْ ثُوفُّوثْ نّْقڒْبغْ-د غَاركْ،
ؤُشَا قِّيمغْ تّْرَاجِيغْ شكْ.
5 شكْ وَارْ ثدْجِيذْ شَا ذ أَربِّي نِّي إِتّخْسنْ ثُوعفّْنَا،
بْنَاذمْ أَعفَّانْ وَارْ غَاركْ إِتِّيفّْ أَغِيمِي.
6 إِپُوحَاڒِييّنْ وَارْ تّْغِيمِينْ تّْبدَّانْ زَّاثْ إِ ثِيطَّاوِينْ نّكْ،
شكْ ثْشَارّْهذْ مَارَّا إِنِّي إِتّڭّنْ ڒْغَارْ.
7 أَذْ ثْهلّْكذْ أَيْثْ ن بُو-إِخَارِّيقنْ،
سِيذِي إِتّْعِيفَّا أَرْيَازْ ن إِذَامّنْ ذ ڒْغشّْ.
8 مَاشَا س ڒمْغَارثْ ن ثْمخْسِيوْثْ نّكْ إِشوَّارنْ أَذْ أَذْفغْ غَارْ ثَادَّارْثْ نّكْ،
أَذْ أَضَارغْ غَارْ زَّاوشْثْ نّكْ ثَامقّْرَانْثْ س ثِيڭّْوُوذِي زَّايكْ.
9 أَ سِيذِي، سُويُورْ أَيِي خْ وبْرِيذْ ن ثْسڭْذَا نّكْ،
ذِي طّْوعْ ن يِينِّي إِ ذ أَيِي إِڒبّْثنْ،
سڭّمْ أَبْرِيذْ نّكْ زَّاثْ إِ وُوذمْ إِنُو.
10 مِينْزِي ذڭْ ؤُقمُّومْ نْسنْ وَارْ ذِينْ بُو ڒَامَانْ،
جُّوفْ نْسنْ ذ أَخيّبْ،
ثْمِيجَّا نْسنْ ذ أَنْضڒْ يَارزْمنْ،
أَربُّونْ ثْخَانْشثْ س يِيڒسْ نْسنْ. ▪
11 ذْعَا ثنْ، أَ أَربِّي،
أجّْ إِ-ثنْ أَذْ وْضَانْ س ڒشْوَارْ نْسنْ،
أَژّڒْ خَاسنْ ذِي سِّيبّثْ ن وَاطَّاسْ ن إِخطَّانْ نْسنْ،
مِينْزِي نِيثْنِي غوّْغنْ خَاكْ.
12 جّمْ مَارَّا إِنِّي خَاكْ إِتّشْڒنْ أَذْ فَارْحنْ،
أجّْ إِ-ثنْ أَذْ سْڒِيوڒْونْ إِ ڒبْذَا.
شكْ ثْفَارْيذْ خَاسنْ،
أَقَا إِنِّي إِتّخْسنْ إِسمْ نّكْ أَذْ نڭْزنْ س ڒفْرَاحثْ إِ غَارْسنْ ذَايكْ.
13 مِينْزِي شكْ، أَ سِيذِي، أَذْ ثْبَارْكذْ أَمْسڭَّاذْ،
أَذْ أَسْ ثْقُووَّارذْ س ؤُحِينِّي أَمْ س ثْسدَّارْثْ ن ؤُسڒْقِي ثَامقّْرَانْثْ.