4
1 إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ. أَزهّذْ ن ذَاوُوذْ. 2 أَرّْ-د خَافِي خْمِي د تّْڒَاغِيغْ، أَ أَربِّي ن ثْسڭْذَا إِنُو!
ذِي ڒحْصَارثْ أَقَا شكْ ثڭِّيذْ أَيِي تَّاسِيعْ.
حِينّْ خَافِي ؤُ سڒْ-د غَارْ ثْژَادْجِيثْ إِنُو!
3 ثَارْوَا ن يِيجّْ ن ورْيَازْ، أَڒْ مڒْمِي إِ غَا يِيڒِي ؤُعُودْجِي إِنُو ذ ڒْعَارْ؟
أَڒْ مڒْمِي إِ غَا ثخْسمْ ڒْبَاطڒْ،
أَذْ ثَارْزُومْ خْ إِخَارِّيقنْ؟ سِيلَاهْ.
4 سْنمْ خنِّي، أَقَا سِيذِي إِحُوزّْ إِجّْ ن ؤُمدُّوكّڒْ أَمْثِيقِّي إِ يِيخفْ نّسْ.
سِيذِي أَذْ أَيِي إِسڒْ خْمِي ذ أَسْ إِ غَا ڒَاغِيغْ.
5 أَرْجِيجّمْ، ؤُ وَارْ خطِّيمْ.
سِيوْڒمْ ذڭْ وُوڒْ نْومْ ذِي رشْثُو نْومْ ؤُشَا سُوسْممْ. سِيلَاهْ. ▪
6 قدّْممْ ثِيغَارْصَا ن ثْسڭْذَا،
تّشْڒمْ خْ سِيذِي. ▪
7 أَطَّاسْ قَّارنْ: ”وِي ذ أَنغْ إِ غَا إِسّشْننْ ڒْخَارْ؟“
أجّْ أَذْ خَانغْ د-ثنْقَارْ ثْفَاوْثْ ن وُوذمْ نّكْ، أَ سِيذِي!
8 شكْ ثسِّيذْفذْ ڒفْرَاحثْ غَارْ وُوڒْ إِنُو،
كْثَارْ خْ ڒفْرَاحثْ إِ ذِينْ إِدْجَانْ ذِي ڒْوقْثْ،
ؤُمِي ثُوغَا إِمنْذِي نْسنْ ذ بِينُو نْسنْ ن جْذِيذْ فيّْضنْ.
9 ذِي ڒهْنَا أَذْ زّْڒغْ ؤُ أَذْ طّْصغْ،
مِينْزِي مْغِيرْ شكْ، أَ سِيذِي، أَذْ أَيِي ثسّْزذْغذْ ذِي ڒَامَانْ. ▪