41
1 خْزَارْ، قَاعْ أَرَاجِي أَذْ إِفْشڒْ، مْغِيرْ ثَامُوغْڒِي نّسْ ثسّعْڭَازْ بْنَاذمْ.
2 وَارْ إِدْجِي ؤُڒَا ذ إِجّنْ أَمُّو ذ أَزعَّامْ أَڒَامِي ث إِ غَا إِهْوڒْ،
مَانْ ونْ خنِّي إِزمَّارنْ أَذْ إِقِّيمْ إِبدّْ زَّاثْ إِ ؤُغمْپُوبْ إِنُو؟
3 مَانْ ونْ إِ ذ أَيِي إِوْشِينْ شَا ذ أَمزْوَارُو،
أَڒَامِي ذ أَيِي إِتّْخصَّا أَذْ غَارسْ ث-إِ-د-أَرّغْ؟
مَارَّا مِينْ إِدْجَانْ سَاذُو إِجنْوَانْ إِنُو! ▪
4 نشّْ وَارْ تّسْقَارِيغْ خْ إِضَارنْ نّسْ،
خْ ڒمْغَارثْ ن جّهْذْ نّسْ ؤُ خْ ؤُشُووَّارْ ن وَادُّوذْ نّسْ.
5 مَانْ ونْ إِزعّْمنْ أَذْ إِقجّعْ ثَاقْشُورْثْ ن وَارُّوضْ نّسْ،
مَانْ ونْ إِزعّْمنْ أَذْ د-إِقَارّبْ غَارْ ثْيُويَا ن ڒسْذُوذْ ن ثغْمَاسْ ن إِغسْمَارْ نّسْ؟
6 مَانْ ونْ إِزمَّارنْ أَذْ يَارْزمْ ثِيوُّورَا غَارْ ؤُغمْپُوبْ نّسْ؟
مِينْ إِنّْضنْ إِ ثغْمَاسْ نّسْ مْغِيرْ ذ أَنخْڒِيعْ.
7 ڒسْذُوذْ ن ثْسدَّارِييِينْ خْ وعْرُورْ نّسْ شنّْعنْ،
كُوڒْ إِجّْ زَّايْسنْ إِتّْوَابلّعْ س طَّابعْ إِقّْننْ نِيشَانْ.
8 إِجّنْ إِقّْننْ نِيشَانْ غَارْ إِجّْ ن نّغْنِي،
وَارْ إِزمَّارْ أَذْ ذِينْ د-يَاذفْ أَرِّيحْ جَارْ أَسنْ.
9 ڒسّْقنْ ذڭْ وَايَاوْيَا،
ؤُذْفنْ ذڭْ إِخفْ نْسنْ مَاحنْذْ وَارْ ثمّْسبْضِينْ.
10 مَاڒَا إِعْضسْ، ثتّْشعْشِيعْ ثْفَاوْثْ،
ؤُ ثِيطَّاوِينْ نّسْ ڭِّينْثْ أَمْ وَابْڒِيونْ ن ثْفَاوْثْ نْ ڒفْجَارْ.
11 زڭْ ؤُجقْمِيمْ نّسْ تّفّْغنْ-د إِصفْضَاونْ،
ثِيفطُّوثِينْ ن ثْمسِّي دُّوقُّوزنْ-د زَّايسْ.
12 دّخَّانْ إِتّْفوَّارْ زڭْ إِخُوبَاشْ ن ونْزَارنْ نّسْ،
أَمْ زڭْ إِجّْ ن ؤُطنْجِيرْ إِتّْننَّانْ س ؤُغَانِيمْ إِدُّوخُّوننْ سَاذُو نّسْ.
13 ثْوَارِّيثْ ن نّفْسْ نّسْ ثسّكَّارَا ثِيمسِّي ذِي ڒفْحمْ إِتّحْذُوذُوقنْ،
ؤُ زڭْ ؤُحرْقُومْ نّسْ إِتّفّغْ-د ؤُحَاذُوقْ ن ثْمسِّي.
14 جّهْذْ إِزْذغْ ذڭْ إِجِيمَانْ نّسْ،
غَارْ زَّاثْ نّسْ إِنطُّو ؤُنخْڒِيعْ.
15 طّْرُوفَا ن ويْسُومْ ن ؤُعذِّيسْ نّسْ مّْڒسْقنْ،
أَمْ خَاسنْ فسْينْ، وَارْ زمَّارنْ أَذْ تّْوَانْهزّنْ.
16 ؤُڒْ نّسْ إِقْسحْ أَمْ وژْرُو،
إِقْسحْ أَمْ ثصْضَارْثْ ن سْوَادَّايْ ن ثْسِيرْثْ.
17 خْمِي إِسّْڭعَّاذْ إِخفْ نّسْ، تّْنخْڒَاعنْ إِنِّي إِجهْذنْ،
زڭْ ؤُقزّبْ خطَّانْ ذِي ثنْذَايْثْ.
18 مَاڒَا إِڒْقفْ إِ-ث شَا ن يِيجّنْ س سِّيفْ، وَارْ إِتِّيڒِي،
وَارْ إِدْجِي س ؤُحْرِيشْ، ڒَا س لَانْسَا ؤُڒَا س فْڒِيثْشَا.
19 ؤُزَّاڒْ غَارسْ أَمْ ؤُڒُومْ،
نّْحَاسْ أَمْ ؤُكشُّوضْ يَارْشَانْ.
20 فْڒِيثْشَا ن ڒْقوْسْ وَارْ ث ثسّْثوّجْ،
إِژْرَا ن إِدْجِييْ دَّاكّْوَاڒنْ زَّاثسْ ذ أَقشْقَاشْ.
21 إِذبُّوزنْ إِحسّبْ إِ-ثنْ أَمْ ؤُقشْقَاشْ،
إِضحّشْ خْ ؤُزبْزبْ ن ؤُحْرِيشْ.
22 غَارْ وَادَّايْ ن ؤُعذِّيسْ نّسْ أَقَا ذِينْ إِشقْفَانْ إِقضْعنْ،
إِتّْجَارَّا ڒمْوَاسْ إِقضْعنْ نِّي أَمْ ثڒْوِيحْثْ إِتّحْڒُودْجُوضنْ إِ ؤُسَارْوثْ ثِيوَا ن ؤُبدْجَاعْ.
23 إِڭَّا ڒَادْجَاغْ أَذْ إِسّْثخْثخْ أَمْ ثيْذَارْثْ،
إِتّڭّْ ڒبْحَارْ أَمْ ؤُمقْرَاجْ إِتّْهَاجَانْ.
24 إِتّجَّا أَوَارْنِي أَسْ جُّورّثْ ثَارقّْ ذ أَمسْرَاقْ،
أَمَانْ يُودْجْغنْ تّْبَاننْ أَمشْنَاوْ أَشوَّافْ ن ؤُمشَّايْپُو.
25 وَارْ ذِينْ إِدْجِي ؤُڒَا ذ إِجّْ خْ ثمُّورْثْ يَارْوسْ ذَايسْ،
إِتّْوَاڭّْ حِيمَا عمَّارْصْ وَارْ إِتّڭّْوذْ.
26 إِنْضَارْ ثِيطَّاوِينْ نّسْ خْ مَارَّا وِي يُوعْڒَانْ،
أَقَا-ث ذ أَجدْجِيذْ خْ مَارَّا ڒْمَاڒْ ن ڒْعزّْ.