‏1 أَيُوبْ يَارَّا-د خْ سِيذِي، إِنَّا:

‏2 ”نشّْ سّْنغْ أَقَا شكْ ثْزمَّارذْ إِ كُوڒْشِي

ؤُ وَارْ إِسّْبطِّيڒْ ؤُڒَا ذ إِجّْ ن ونْوَايْ نّكْ.

‏3 شكْ ثقَّارذْ: ’مَانْ ونْ إِسّْبَارّْشْننْ بْڒَا ثُوسّْنَا شّْوَارْ ن أَربِّي؟‘ س ؤُينِّي سِّيوْڒغْ خْ مِينْ وَارْ فْهِيمغْ، خْ ثْمسْڒَايِينْ نِّي ذِي تّْبهْثغْ أَطَّاسْ، وَارْ ثنْثْ سِّينغْ.“ ^▪  

‏4 ”سڒْ مَاشَا ؤُشَا أَذْ سِّيوْڒغْ، خْسغْ أَذْ شكْ سّقْسِيغْ ؤُشَا خنِّي شكْ أَذْ أَيِي خَاسْ ثسَّارْڭْبذْ.

‏5 س ؤُمزُّوغْ خَاكْ إِ سْڒِيغْ وَاهَا، مَاشَا ڒخُّو ثِيطّْ إِنُو ثژْرِي شكْ.

‏6 س ؤُينِّي تّْعِيفِّيغْ إِخفْ إِنُو ؤُشَا نْذمّغْ، قِّيمغْ ذِي ثْعجَّاجْثْ ذ يِيغّضْ.“

‏7 أَوَارْنِي ڒَامِي ثُوغَا إِسِّيوِيڒْ سِيذِي أَوَاڒنْ-أَ أَكْ-ذ أَيُوبْ، إِنَّا سِيذِي إِ إِلِيفَازْ زِي ثَايْمَانْ: ”لْغَاضَابْ إِنُو يَارْغَا خَاكْ ؤُ خْ ثْنَاينْ ن إِمدُّوكَّاڒْ نّكْ، مَاغَارْ كنِّيوْ وَارْ خَافِي ثسِّيوْڒمْ شَا نِيشَانْ أَمْ مَامّشْ خَافِي إِسِّيوڒْ ؤُمْسخَّارْ إِنُو أَيُوبْ.

‏8 خنِّي ڒخُّو، كْسِيمْ كنِّيوْ سبْعَا ن إِينْذُوزنْ ذ سبْعَا ن إِشَارِّييّنْ، ؤُشَا ؤُيُورمْ غَارْ ؤُمْسخَّارْ إِنُو أَيُوبْ ؤُشَا قدّْممْ ثنْ ذ ثَاغَارْصْثْ ن وشْمَاضْ إِ يِيخفْ نْومْ. جّمْ أَمْسخَّارْ إِنُو أَيُوبْ أَذْ خَاومْ إِژَّادْجْ. مَاغَارْ نشّْ أَذْ سّْڭعّْذغْ أَغمْپُوبْ نّسْ إِ وسْثَاجبْ، حِيمَا وَارْ تّڭّغْ أَكِيذْومْ أَمْ ثُوبُّوهڒْيَا نْومْ، مِينْزِي كنِّيوْ وَارْ خَافِي ثسِّيوِيڒمْ نِيشَانْ أَمْ مَامّشْ خَافِي إِسِّيوِيڒْ ؤُمْسخَّارْ إِنُو أَيُوبْ.“

‏9 خنِّي إِفّغْ إِلِيفَازْ زِي ثَايْمَانْ، ؤُ بِيلْذَاذْ زِي شُوحَا ذ صُوفَارْ زِي نَاعْمَاثْ ؤُشَا ڭِّينْ نِيثْنِي أَمْ مَامّشْ إِ ذ أَسنْ إِنَّا سِيذِي. سِيذِي إِسّْڭعّذْ أَغمْپُوبْ ن أَيُوبْ إِ ؤُسْثَاجبْ ن ثْژَادْجِيثْ نّسْ.

‏10 سِيذِي إِفْسِي إِشذِّييّنْ ن أَيُوبْ، أَوَارْنِي ڒَامِي ثُوغَا إِتّْژَادْجْ أَيُوبْ إِ إِمدُّوكَّاڒْ نّسْ، ؤُشَا يَارْنِي سِيذِي ذِي مَارَّا أَڭْڒَا ن أَيُوبْ ثْنَاينْ ن ثْسقَّارْ.

‏11 ؤُسِينْ-د غَارسْ مَارَّا أَيْثْمَاسْ ذ مَارَّا سُويثْمَاسْ ذ مَارَّا إِنِّي ث إِسّْننْ زِيشْ. نِيثْنِي شِّينْ أَكِيذسْ أَغْرُومْ ذِي ثَادَّارْثْ نّسْ ؤُشَا سّشْننْ أَسْ أَزِيدْجزْ نْسنْ ؤُشَا عزَّانْ ث خْ مَارَّا ڒْغَارْ خَاسْ د-إِغْضڒْ سِيذِي. إِوْشَا أَسْ كُوڒْ إِجّنْ زَّايْسنْ إِشْثْ ن ثبْيَاسْثْ ن نُّوقَارْثْ ؤُڒَا ذ إِشْثْ ن ثْخَاذنْثْ ن وُورغْ.

‏12 إِبَاركْ سِيذِي ثَانڭَّارُوثْ ن أَيُوبْ كْثَارْ زِي ثْمزْوَارُوثْ نّسْ، مَاغَارْ ثُوغَا غَارسْ أَربْعَا-أَڒَافْ ن وُودْجِي ذ ستَّا-أَڒَافْ ن إِڒغْمَانْ ذ وَاڒفْ ن إِفُونَاسنْ ن ثغْنَاشْثْ ذ وَاڒفْ ن ثغْيَاڒْ.

‏13 ثُوغَا غَارسْ سبْعَا ن إِحنْجِيرنْ ذ ثْڒَاثَا ن يسِّيسْ.

‏14 ثَامزْوَارُوثْ إِڭَّا أَسْ يَامِيمَا، وِيسّْ ثْنَاينْ قَّارنْ أَسْ قَاصِيعَا ذ وِيسّْ ثْڒَاثَا قَّارنْ أَسْ قَارْنْ-هَافُّوكْ.

‏15 وَارْ ؤُفِينْ، ذِي مَارَّا دُّونشْثْ، ثِيحْرَامِينْ شْنَانْثْ أَمشْنَاوْ يسِّيسْ ن أَيُوبْ. بَابَاثْسنْثْ إِوْشَا أَسنْثْ ثَاسْغَارْثْ جَارْ أَيْثْمَاثْسنْثْ.

‏16 أَيُوبْ إِدَّارْ أَوَارْنِي إِ ؤُيَا مْيَا ؤُ-ربْعِينْ ن إِسڭّْوُوسَا. نتَّا إِژْرَا إِحنْجِيرنْ نّسْ ذ إِحنْجِيرنْ ن إِحنْجِيرنْ نّسْ غَارسْ أَڒْ جِّيڒْ وِيسّْ أَربْعَا.

‏17 أَيُوبْ إِمُّوثْ أَوَارْنِي ڒَامِي إِوْسَارْ أَطَّاسْ ؤُ ثُوغَا إِجِّيونْ ؤُسَّانْ ن ثُوذَارْثْ نّسْ.