سِيذِي إِسِّيوڒْ أَكْ-ذ أَيُوبْ
40
1 يَارْنِي يَارَّا-د سِيذِي خْ أَيُوبْ، إِنَّا: 2 مَا إِخْسْ ونِّي إِتّمْشَارَّاعنْ أَكْ-ذ ؤُمْزمَّارْ خْ كُوڒْشِي أَذْ ث إِوبّخْ عَاذْ؟
أجّْ ونِّي إِخْسنْ أَذْ إِذْعَا أَربِّي، أَذْ د-يَارّْ!
3 خنِّي يَارَّا-د أَيُوبْ خْ سِيذِي، إِنَّا:
4 خْزَارْ، نشّْ ذْرُوسْ، مِينْ زمَّارغْ أَذْ خَاكْ د-أَرّغْ؟
نشّْ أَذْ ڭّغْ أَفُوسْ إِنُو خْ ؤُقمُّومْ إِنُو. ▪
5 أَقَا سِّيوْڒغْ إِشْثْ ن ثْوَاڒَا، مَاشَا وَارْ د-تَّارِّيغْ عَاذْ.
ثْوَاڒَا وِيسّْ ثْنَاينْ وَارْ ذ أَسْ أَرنِّيغْ!
أَربِّي إِكمّرْ أَوَاڒنْ نّسْ إِ أَيُوبْ
6 خَاسْ ؤُشَا يَارْنِي يَارَّا-د سِيذِي خْ أَيُوبْ زِي ثْحَارْيَاضْثْ، إِنَّا:
7 بْيسْ خنِّي ثِيجْعِينَّاثِينْ نّكْ أَمْ ورْيَازْ.
نشّْ خْسغْ أَذْ شكْ سّقْسِيغْ ؤُ شكْ أَرّْ-د خَافِي!
8 مَا ثخْسذْ س ثِيذتّْ أَذْ ثَارْژذْ ڒْحُوكْمْ إِنُو؟
مَا ثخْسذْ أَذْ غَارِي د-ثَارّذْ ڒْعِيبْ، مَاحنْذْ أَذْ ثْبَانذْ شكْ ذ أَمْسڭّذْ؟ ▪
9 مَا غَاركْ أَغِيڒْ أَمْ أَربِّي؟
مَا ثْزمَّارذْ أَذْ ثدَّارْذْحذْ أَمْ وَاجَّاجْ س ثْمِيجَّا نّكْ؟
10 قّنْ خنِّي إِخفْ نّكْ س لْعَاضَامَا ذ ؤُعُودْجِي،
أَرْضْ س ثِيسِّيقْثْ ذ ڒْعزّْ.
11 أجّْ أَذُوقّزْ ن ؤُفُوڭمْ نّكْ أَذْ إِزدْجعْ،
خْزَارْ غَارْ كُوڒْ بُو نّْفَاخثْ،
ؤُشَا سهْوَا إِ-ث!
12 خْزَارْ مْلِيحْ غَارْ مْكُوڒْ بُو-نّْفَاخثْ ؤُشَا سهْوَا إِ-ث،
ڒْبزْ إِعفَّاننْ ذڭْ ومْشَانْ نْسنْ.
13 فَّارْ إِ-ثنْ مَارَّا أَمْ مُوننْ ذڭْ ؤُشَاڒْ،
بلّعْ خْ إِغمْبَابْ نْسنْ ذڭْ ونْضڒْ.
14 خنِّي ؤُڒَا ذ نشّْ أَذْ شكْ سّمْغَارغْ،
مِينْزِي أَفُوسْ نّكْ أَفُوسِي إِسّنْجمْ إِ شكْ.
15 خْزَارْ مَاشَا ڒْوحْشْ، ’بْهِيمُوثْ‘،
ونِّي ڭِّيغْ أَمْ مَامّشْ شكْ ڭِّيغْ.
إِتّتّْ أَرّْبِيعْ أَمْ ؤُفُونَاسْ.
16 خْزَارْ مَاشَا جّهْذْ نّسْ ذِي ثجْعِينَّاثِينْ نّسْ،
ڒْعزّْ ن إِژوْرَانْ نّسْ ن ؤُعذِّيسْ!
17 مَاڒَا إِخْسْ، أَذْ إِڭّْ أَكنَّاسْ نّسْ أَمْ ثْشجَّارْثْ ن ثنْڭلْثْ،
إِژوْرَانْ ن ثْمصَّاضِينْ نّسْ محْضنْ مُّوذنْ.
18 إِخْسَانْ نّسْ تّڭّنْ أَمْ إِقُوذَاسْ ن نّْحَاسْ،
أَمْ بَارَّاثْ ن وُوزَّاڒْ إِضَارنْ ذ إِغَادْجنْ نّسْ.
19 نتَّا ذ أَمزْوَارُو ن إِبْرِيذنْ ن أَربِّي.
ونِّي ث يڭِّينْ، إِوْشَا أَسْ سِّيفْ نّسْ.
20 إِوَا، إِذُورَارْ تَّاوْينْ أَسْ-د أَرّْبِيعْ،
مَارَّا ڒوْحُوشْ ن ييَّارْ تِّيرَارنْ ذِينِّي.
21 إِبُّوزّڒْ سَاذُو إِ ثْشجِّيرَا إِتّڭّنْ ثِيڒِي،
ذڭْ ؤُذُورِّي ن ؤُغَانِيمْ، ذِي سّبْخثْ.
22 أَذْ خَاسْ دُّورْينْثْ ثْشجِّيرَا إِ إِتِّيشنْ ثِيڒِي، كُوڒْ إِشْثْ س ثِيڒِي نّسْ،
ثِينمْرَاتْشْ ن ثْغزْرَاثِينْ تّنّْضنْثْ أَسْ-د.
23 خْزَارْ، مَاڒَا إِهَاجْ يغْزَارْ، وَارْ إِتَّارْجِيجِي،
إِتّْغِيمَا يَارْسَا مَاڒَا ڒْحمْڒثْ ن لْ'ؤُرْذُونْ ثُوذفْ أَسْ-د غَارْ ؤُقمُّومْ.
24 مَا إِزمَّارْ بْنَاذمْ أَذْ ث إِطّفْ خنِّي زَّاثْ إِ ثِيطَّاوِينْ نّسْ،
أَذْ أَسْ إِسّْنُوقّبْ ثِينْزَارْثْ س ثسْغُونِينْ؟
25 مَا ثْزمَّارذْ أَذْ ثْجبْذذْ ’لِيبِييَاثَانْ‘ س ثْسنَّارْثْ ن ويْمَارْ،
نِيغْ أَذْ ثسّهْوِيذْ إِڒسْ نّسْ ذڭْ ؤُفِيڒُو ن ويْمَارْ؟
26 مَا ثْزمَّارذْ أَذْ أَسْ ثڭّذْ ثْخَاذنْثْ ن ؤُغَانِيمْ ذِي ثنْزَارْثْ نّسْ،
نِيغْ أَذْ ثسّْنُوقّْبذْ أَغسْمِيرْ نّسْ س ؤُغَانْتْشُو؟
27 مَا أَذْ زَّايكْ إِتَّارْ أَحِينِّي؟
مَا أَذْ إِسِّيوڒْ أَكِيذكْ س وَاوَاڒنْ إِمِيزِيضنْ؟
28 مَا أَذْ يڭّْ أَكِيذكْ ڒْعَاهْذْ؟
مَا ثْزمَّارذْ أَذْ ث ثكْسِيذْ ذ إِسْمغْ إِ ڒبْذَا؟
29 مَا ثْزمَّارذْ أَكِيذسْ ثتِّيرَارذْ أَمْ أَكْ-ذ إِجّْ ن ؤُجْضِيضْ،
نِيغْ أَذْ ث ثقّْنذْ إِ ثحْرَامِينْ نّكْ؟
30 مَا زمَّارنْ إِنيْمَارنْ أَذْ ذَايسْ سبّبنْ؟
مَا زمَّارنْ أَذْ ث بْضَانْ جَارْ إِكنْعَانِييّنْ؟
31 مَا ثْزمَّارذْ أَذْ ثجِّيذْ ثِيڒْمشْثْ نّسْ س فْڒِيثْشَاثْ،
نِيغْ س لَانْسَا ن إِسڒْمَانْ أَزدْجِيفْ نّسْ؟
32 سَارْسْ خَاسْ مَاشَا أَفُوسْ نّكْ،
خمّْ غَارْ ؤُمنْغِي، وَارْ ث تّڭِّيذْ عمَّارْصْ عَاذْ.