39
1 مَا ثسّْنذْ مڒْمِي تَّارْونْثْ ثْغَايْذِينْ ن ثْصُوضَارْ؟ مَا ثْحطِّيذْ ثِيرْوَا ن ثُوذَاذِينْ؟ ▪
2 مَا ثْزمَّارذْ أَذْ ثْحسْبذْ إِيُورنْ ن ثْكسِّيثْ نْسنْثْ،
مَا ثسّْنذْ ڒْحَاڒْ ن ثِيرْوَا نْسنْثْ؟
3 نِيثنْثِي تّقْوِيسنْثْ، تَّارْونْثْ إِمژْيَاننْ نْسنْثْ،
ڒوْجعْ نْ ثَارُوثْ نْسنْثْ سُّوفُّوغنْ ثنْ.
4 محْضنْ إِمژْيَاننْ نْسنْثْ ، مقَّارنْ ذِي ڒخْڒَا،
تّفّْغنْ غَارْ بَارَّا ؤُ وَارْ غَارْسنْثْ تّْعِيقِّيبنْ.
5 مَانْ ونْ يَارْخُونْ إِ وغْيُوڒْ ن ڒخْڒَا،
ؤُ ثِيسَارِّيفِينْ ن وغْيُوڒْ ن ڒخْڒَا، مَانْ ونْ ثنْثْ إِفسْينْ؟
6 نشّْ وْشِيغْ أَسْ ثَانزْرُوفْثْ ذ ثَادَّارْثْ،
ڒوْضَا أَمدْجَاحْ ذ ثِيزذِّيغِينْ نّسْ. ▪
7 نتَّا إِضحّشْ خْ ڒْغَاشِي إِنْهوْڒنْ ن ثنْذِينْثْ،
وَارْ إِتّسْڒِي إِغُويَّانْ ن يِينِّي إِزيَّارنْ إِسمْغَانْ.
8 جّْوَايهْ ن إِذُورَارْ ذ دّْمَانِي نّسْ ن ثَاروْسَا،
يَارزُّو ذَايْسنْ خْ قَاعْ مِينْ إِدْجَانْ ذ أَزِيزَا.
9 مَا أَذْ إِخْسْ إِغَايْضْ أَكْ-ذ يِيجّْ-ن-يِيشّْ أَذْ خَاكْ إِسخَّارْ؟
مَا أَذْ إِسّنْسْ غَارْ ڒْمذْوذْ نّكْ؟
10 مَا ثْزمَّارذْ أَذْ ثْمنْعذْ إِغَايْضْ أَكْ-ذ يِيجّْ-ن-يِيشّْ س وسْغُونْ نّسْ غَارْ ؤُعيّذْ ن وشْرَازْ؟
مَا أَذْ إِشَارْزْ ثِييْسَارِينْ أَوَارْنِي أَشْ؟
11 مَا ثتّْشَاڒذْ خَاسْ، مِينْزِي نتَّا إِجْهذْ أَطَّاسْ،
مَا أَذْ أَسْ ثجِّيذْ ڒْخذْمثْ نّكْ؟
12 مَا أَذْ خَاسْ ثتّشْڒذْ أَذْ غَاركْ د-يَارّْ زَّارِيعثْ نّكْ نتَّا،
أَذْ ت يَاوِي غَارْ ؤُنذْرَارْ نّكْ؟
13 أَفْرِيونْ ن نّْعَامثْ شَّاثنْ س ڒْخَاضَارْ.
وَارْ ذِينْ أَهَاوَاڒْ س وَافْرِيونْ ذ وَارِّيشْ نّسْ، ▫
14 مَاشَا ثتّجَّا ثِيمدْجَاڒِينْ نّسْ ذڭْ ؤُشَاڒْ ن ثمُّورْثْ،
ثتّجَّا إِ-ثنْثْ تّحْمَانْثْ ذڭْ إِجْذِي.
15 ثتّتُّو أَقَا إِجّْ ن ؤُضَارْ إِزمَّارْ أَذْ ثنْثْ إِڒْبزْ،
أَقَا ڒوْحُوشْ ن ڒخْڒَا زمَّارنْ أَذْ خَاسنْثْ عفْسنْ.
16 نتَّاثْ ثْقسّحْ ذڭْ إِمژْيَاننْ نّسْ أَخْمِي وَارْ دْجِينْ نّسْ.
بَاطڒْ إِ ثتّڭّْ ثِيزمَّارْ نّسْ، مَاغَارْ نتَّاثْ وَارْ ثْكسِّي س ومْنُوسْ،
17 مَاغَارْ أَربِّي إِجَّا إِ-ت أَذْ ثتُّو ثِيغِيثْ،
وَارْ ذ أَسْ إِوْشِي بُو ثسْغَارْثْ ذِي ڒفْهَامثْ.
18 مَاشَا مَاڒَا ثكْسِي ذڭْ ؤُضَارْ نّسْ، ثسّْڭعَّاذْ إِخفْ نّسْ،
ثْضحّشْ خْ ؤُيِيسْ ذ ونِّي خَاسْ إِنْيِينْ.
19 مَا ثْزمَّارذْ أَذْ ثوْشذْ جّهْذْ إِ ؤُيِيسْ؟
مَا ثْزمَّارذْ أَذْ ثسّْيَارْضذْ إِجِيمَانْ نّسْ س سّْبِيبْ؟
20 مَا ثْزمَّارذْ أَذْ ث يَارّْ إِنطُّو أَمْ ؤُپُورْخسْ؟
ڒْعزّْ ن ؤُسْنحْنحْ نّسْ إِسَّاڭّْوَاذْ أَطَّاسْ.
21 خبّْشنْ إِيْسَانْ س إِضَارنْ نْسنْ أَمْ تّْرَاجَانْ ذِي ڒوْضَا ن ثغْزُورْثْ،
إِفَارْحْ ؤُيِيسْ س جّهْذْ نّسْ،
إِتّفّغْ مَاحنْذْ أَذْ إِمّڒْقَا أَكْ-ذ ڒْعسْكَارْ يَارْضنْ أَرُّوضْ ن وُوزَّاڒْ.
22 إِضحّشْ خْ مَارَّا مِينْ إِسَّاڭّْوَاذنْ، وَارْ إِتّْنخْڒِيعْ زِي وَالُو،
ؤُ وَارْ إِذِّيكّْوِيڒْ غَارْ ضفَّارْ زِي سِّيفْ.
23 إِتّْقَارْقُوبْ وقْرَابْ ن فْڒِيثْشَاثْ سنّجْ نّسْ،
لَانْسَا ذ فْڒِيثْشَا تِّيسِّيقنْ.
24 س دّْرِيزْ ن ثْشضْيِينْ ذ زّْعَامثْ إِصَارّضْ نتَّا ثَامُّورْثْ،
وَارْ إِزمَّارْ أَذْ إِتّْوَاسْبدّْ غَارْ ؤُصُوضِي ن ؤُيِيشّْ ن إِشَارِّي.
25 غَارْ ثْمِيجَّا ن ؤُصُوضِي ذڭْ ؤُيِيشّْ ن إِشَارِّي إِسّْنحْنِيحْ: ’هههْ!‘
إِتَّاشَا أَكْ-ذ ؤُمنْغِي زِي ڒَاڭّْوَاجْ،
زّْڭَا ن إِزدْجِيفنْ ن ڒْعسْكَارْ ذ إِغُويَّانْ ن ؤُمنْغِي.
26 مَا إِطَّاوْ ڒْبَازْ زِي ڒفْهَامثْ نّكْ،
أَقَا إِتّْبزَّاعْ أَفْرِيونْ نّسْ غَارْ لْجَانُوبْ؟
27 مَا إِسّْڭعَّاذْ ؤُڭِيذَارْ إِخفْ نّسْ أَمُّو سنّجْ قَاعْ س ڒُومُورْ نّكْ،
ؤُ إِتّڭّْ ڒْعُوشّْ نّسْ ذِي ڒُوعْڒَا؟ ▪
28 إِزدّغْ ؤُ إِسّْنُوسَا خْ جَّارْفْ،
خْ ؤُشنْقُوبْ ن جَّارْفْ، أَقَا-ث ذ لْپُورْجْ نّسْ.
29 سّنِّي إِحطَّا زَّارْذثْ،
ثِيطَّاوِينْ نّسْ خزَّارنْثْ-إِ-د زِي ڒَاڭّْوَاجْ.
30 إِمژْيَاننْ نّسْ سكّْفنْ إِذَامّنْ،
ؤُ مَانِي دْجَانْ إِنِّي إِتّْوَانْغنْ، أَقَا-ث ذِينْ إِ يدْجْ. ▪