أَربِّي إِسِّيوڒْ أَكْ-ذ أَيُوبْ خْ وخْڒَاقْ ن مَارَّا مِينْ إِدْجَانْ
38
1 أَوَارْنِي أَسْ يَارَّا-د سِيذِي خْ أَيُوبْ زِي ثْحَارْيَاضْثْ، إِنَّا: 2 مَانْ ونْ إِسّْبَارّْشْننْ أَشَاوَارْ،
س وَاوَاڒنْ بْڒَا ثُوسّْنَا؟ ▪
3 بْيسْ خنِّي ثِيجْعِينَّاثِينْ نّكْ أَمْ ورْيَازْ.
نشّْ خْسغْ أَذْ شكْ سّقْسِيغْ ؤُ شكْ أَرّْ-د خَافِي!
4 مَانِي شكْ ثُوغَا ؤُمِي ڭِّيغْ نشّْ ذْسَاسْ ن ثَامُّورْثْ؟
إِنِي ث مَاڒَا غَاركْ ڒفْهَامثْ س ثِيذتّْ. ▪
5 مَانْ ونْ إِڭِّينْ ڒعْبَارْ نّسْ، وَاهْ شكْ ثسّْنذْ ت، مَا وَارْ إِدْجِي أَمنِّي؟
نِيغْ مَانْ ونْ خَاسْ إِمحْضنْ أَفِيڒُو ن ڒعْبَارْ؟
6 مِينْ خفْ هْوَانْ ذْسُوسَا نّسْ،
نِيغْ مَانْ ونْ إِسَّارْسنْ أَژْرُو ن ثغْمَارْثْ نّسْ،
7 ؤُمِي إِثْرَانْ ن ضّْبهْ غنّْجنْ جْمِيعْ س ڒفْرَاحثْ،
ؤُمِي سْڒِيوْڒونْ مَارَّا أَرَّاونْ ن أَربِّي؟
8 مَانْ ونْ إِبلّْعنْ ڒبْحَارْ س ثوُّورَا،
ؤُمِي د-إِدُّوقّزْ ؤُشَا إِفّغْ-د زڭْ ؤُعذِّيسْ ن يمَّاسْ، ▪
9 ؤُمِي ذ أَسْ ڭِّيغْ إِسيْنُوثنْ ذ أَرُّوضْ نّسْ،
ذ ؤُسيْنُو إِبُّومْبسْ ذ أَمنْذِيڒْ مَاحنْذْ أَذْ ذَايسْ ث سّهْنُونّْضغْ،
10 ؤُمِي ذ أَسْ أَرْژِيغْ أَفْرَايْ إِنُو أَمْ وحْفُورْ يُودْجْغنْ،
ؤُ ؤُمِي ذ أَسْ ڭِّيغْ زّكْرُونْ ذ ثوُّورَا،
11 ؤُشَا نِّيغْ: ’أَڒْ ذَا إِ د غَا ثَاسذْ، وَارْ عدُّو.
ذَانِيثَا أَذْ ثتّْوَاسْبدّْ نّْفَاخثْ ن ڒمْوَاجْ نّكْ.‘
12 مَا ثُومُورذْ شكْ أَثفُّو ن ضّْبحْ ذڭْ وُوسَّانْ نّكْ؟
مَا ثسّْشَانذْ إِ ثْفَاوْثْ ن ڒفْجَارْ أَمْشَانْ نّسْ
13 مَاحنْذْ أَذْ ثطّفْ أَفْرِيونْ ن ثمُّورْثْ،
ؤُ أَذْ زَّايسْ ثزّرْزْ إِعفَّاننْ؟
14 أَذْ ثذْوڒْ ثمُّورْثْ أَمْ ثَارِّيسْثْ سَاذُو طَّابعْ،
ؤُ أَذْ ثطّفْ أَدُّوذْ ن وَارُّوضْ.
15 إِعفَّاننْ أَذْ أَسنْ ثتّْوَاكّسْ ثْفَاوْثْ نْسنْ،
ؤُ أَغِيڒْ إِتّْوَاسْڭعّْذنْ أَذْ إِتّْوَارْژْ.
16 مَا ثِيوْضذْ غَارْ ڒْعُونْصَارَاثْ ن ڒبْحَارْ،
مَا ثُويُورذْ خْ وُوذمْ ن ثمُّورْثْ ن وَامَانْ يُودْجْغنْ؟
17 مَا تّْوَاعَارَّانْثْ ثوُّورَا ن ڒْموْثْ إِ شكْ،
مَا ثژْرِيذْ ثِيوُّورَا ن ثِيڒِي ن ڒْموْثْ؟
18 مَا ثتَّاوِي-د ثْمژْرَا نّكْ أَڒْ ؤُنڭَّارُو ن ثمُّورْثْ؟
إِنِي ث مَاڒَا ثسّْنذْ أَيَا مَارَّا.
19 مَانِي إِدْجْ وبْرِيذْ غَارْ ثْزذِّيغْثْ ن ثْفَاوْثْ؟
ؤُ ثَادْجسْثْ، مَانِي ثدْجْ ثْزذِّيغْثْ نّسْ،
20 حِيمَا أَذْ ثْزمَّارذْ أَذْ ت ثْنذْهذْ غَارْ ومْشَانْ نّسْ،
ؤُ خنِّي أَذْ ثسّْنذْ مْلِيحْ إِمسْرَاقْ غَارْ ثَادَّارْثْ نّسْ؟
21 شكْ أَقَا ثسّْنذْ مَانْ أَيَا نِيغْ، مِينْزِي شكْ ثُوغَا ثْخڒْقذْ، نِيغْ لَّا؟
ؤُ مَا وَارْ إِدْجِي ڒْقدّْ ن وُوسَّانْ نّكْ ذ أَطَّاسْ!؟
22 مَا ثُوذْفذْ غَارْ إِخَّامنْ ن ڒخْزنْ ن وذْفڒْ،
مَا ثژْرِيذْ ڒهْرِيثْ ن ثبْرُورِي،
23 نِّي خْ شطَّارغْ إِ ڒْوقْثْ ن ڒحْصَارثْ،
إِ وَاسّْ ن ڭَارَّا ذ ؤُمنْغِي؟
24 مَانِي إِدْجْ وبْرِيذْ إِتّْبطَّانْ ثِيفَاوْثْ،
ؤُڒَا ذ أَبْرِيذْ إِتّْبزّْعنْ أَصمِّيضْ ن شَّارْقْ خْ ثمُّورْثْ؟
25 مَانْ ونْ إِفدْجقْ ڒْمِيزَابْ إِ ڒْحمْڒثْ ن ونْژَارْ،
ؤُڒَا ذ أَبْرِيذْ إِ وَاسَّامْ ن وَاجَّاجنْ،
26 حِيمَا أَذْ إِسّكّْ أَنْژَارْ خْ ثمُّورْثْ نِّي ذِي وَارْ إِزْذِيغْ حذْ،
خْ ڒخْڒَا إِ وَارْ ذِي إِزْذِيغْ ؤُڒَا ذ إِجّْ،
27 حِيمَا أَذْ إِسَّارْوَا جّْوَايهْ إِخْڒَانْ ؤُ إِتّْوَاخْڒَانْ،
ؤُ حِيمَا أَذْ إِسّغْمِي أَرّْبِيعْ ذ طّْرِي؟ ▪
28 مَا أَنْژَارْ غَارسْ شَا ن بَابَاسْ،
نِيغْ مَانْ ونْ إِ د-إِتّجَّانْ ثُوذِّيمِينْ ن نّْذَا؟
29 زِي مَانْ أَعذِّيسْ إِ زِي د-إِفّغْ وجْرِيسْ،
ؤُ نّْذَا إِجرْسنْ ن ؤُجنَّا وِي إِ-ث-إِ-د-يُورْونْ؟
30 دَّاكّْوَاڒنْ وَامَانْ أَمْ وژْرُو،
ؤُشَا إِجَارْسْ وُوذمْ ن وَامَانْ يُودْجْغنْ.
31 مَا ثْزمَّارذْ أَذْ ثْشدّذْ أَڭْرَاوْ ن سبْعَا ن يثْرَانْ،
نِيغْ ثْفسّْيذْ سْنَاسڒْ ن يثْرَانْ ن ؤُرِييُونْ؟ ▪
32 مَا ثْزمَّارذْ أَذْ د-ثسُّوفّْغذْ إِثْرَانْ ن زُوذْيَاكْ غَارْ ڒْحَاڒْ نْسنْ،
ؤُڒَا ذ دُّوبْ أَمقّْرَانْ أَكْ-ذ ثَارْوَا نّسْ؟
33 مَا ثسّْنذْ إِزرْفَانْ ن ؤُجنَّا،
مَا ثْزمَّارذْ أَذْ ثْذبَّارذْ خْ ؤُقَارِّي نْسنْ ذِي ثمُّورْثْ؟ ▪
34 مَا ثْزمَّارذْ أَذْ ثسّْڭعّْذذْ غَارْ إِسيْنُوثنْ ثْمِيجَّا نّكْ،
أَڒَامِي شكْ إِ غَا ثْذڒْ إِشْثْ ن ڒْحمْڒثْ ن وَامَانْ؟
35 مَا ثْزمَّارذْ أَذْ ثسّكّذْ أَسَّامنْ مَاحنْذْ أَذْ قدْجْقنْ،
ؤُ أَذْ أَشْ إِنِينْ: ’أَقَا-نغْ ذَا!‘؟
36 مَانْ ونْ إِسَّارْسنْ ثِيغِيثْ ذِي ذَاخڒْ ن بْنَاذمْ؟
نِيغْ مَانْ ونْ إِوْشِينْ ڒفْهَامثْ إِ ڒعْقڒْ؟ ▪
37 مَانْ ونْ إِفَارّْزنْ إِسيْنُوثنْ س ڒعْقڒْ،
ؤُ إِغَارَّافنْ ن وَامَانْ ن ؤُجنَّا وِي ثنْ إِتّْزدْجَاعنْ،
38 أَڒَامِي إِتّْوَافْسِييْ ؤُشَاڒْ، إِذْوڒْ ذ أَبدْجَاعْ،
ؤُشَا ڒسْقنْ إِپُورْسَا ن ثمُّورْثْ؟
39 مَا ثْزمَّارذْ أَذْ ثطّْفذْ زَّارْذثْ إِ ثَايْرَاذْثْ،
نِيغْ أَذْ ثسّڒْهُوذْ ڒَاژْ ن وَايْرَاذنْ إِمژْيَاننْ، ▪
40 ڒَامِي نُوفَّارنْ ذڭْ إِفْرَانْ نْسنْ،
ؤُ تّْحَامَانْ زِي ڒمْرَاڭحْ نْسنْ؟
41 مَانْ ونْ إِسّوْجَاذنْ إِ ؤُبَاغڒْ مَاشَّا نّسْ،
خْمِي سْغُويُّونْ إِمژْيَاننْ نّسْ غَارْ أَربِّي،
خْمِي تّمْهَافَانْ نْهْڒَا مَاشَّا؟ ▪