أَكمّڒْ ن ڒْهَارْذْ وِيسّْ أَربْعَا ن إِلِيهُو: ڒمْغَارثْ ن أَربِّي ذِي طَّابِيعَا
37
1 وَاهْ، س ؤُيَا إِتَّارْجِيجْ وُوڒْ إِنُو، إِنطُّو زڭْ ومْشَانْ نّسْ.
2 سْڒمْ مْلِيحْ إِ زّْهِيرْ ن ثْمِيجَّا نّسْ،
إِ وجْذَابْ ن وَاجَّاجْ إِ د-إِتّكّنْ زڭْ ؤُقمُّومْ نّسْ. ▪
3 إِسّكّْ إِ-ث سَاذُو مَارَّا أَجنَّا،
ؤُ ثَافَاوْثْ نّسْ أَڒْ إِنڭُّورَا ن ثمُّورْثْ.
4 أَوَارْنِي أَسْ إِزهَّارْ س ثْمِيجَّا إِجهْذنْ،
إِهمْهمْ س ثْمِيجَّا ن لْعَاضَامَا نّسْ،
ؤُ وَارْ إِمنّعْ أَسَّامنْ، مَاڒَا ثتّْوَاسڒْ ثْمِيجَّا نّسْ.
5 أَربِّي إِدَّارْذِيحْ س ثْمِيجَّا نّسْ س ثبْرِيذْثْ ن ڒعْجبْ،
إِتّڭّْ ڒحْوَايجْ ثِيمقّْرَانِينْ، نشِّينْ وَارْ أَسنْثْ نْفهّمْ. ▪
6 مَاغَارْ إِقَّارْ إِ وذْفڒْ: ’وْضَا غَارْ ثمُّورْثْ!‘،
ؤُ أَمنِّي إِ إِقَّارْ ؤُڒَا إِ ونْژَارْ.
خنِّي إِشَّاثْ ونْژَارْ ذ إِغزْرَانْ. ▪
7 نتَّا إِتّْشمّعْ أَفُوسْ ن مْكُوڒْ بْنَاذمْ،
حِيمَا مَارَّا إِوْذَانْ أَذْ سّْننْ ڒْخذْمثْ نّسْ.
8 ڒوْحُوشْ تّْنُوفَّارنْ ذِي ڒمْرَاڭحْ
ؤُ تّْغِيمَانْ ذڭْ إِفْرَانْ نْسنْ.
9 ثتَّاسْ-د ثْحَارْيَاضْثْ زڭْ وخَّامْ نّسْ ن ذَاخڒْ،
ؤُ أَكْ-ذ ؤُسمِّيضْ ن شَّامَالْ ثتَّاسْ-د ؤُڒَا ذ ثسْمضْ.
10 س ؤُصُوضِي ن نّفْسْ نّسْ إِتَّاوِي-د أَربِّي أَجْرِيسْ،
جمْذنْ وَاطَّاسْ ن وَامَانْ. ▪
11 وَاهْ، إِتّْعمَّارْ إِسيْنُوثنْ س ثُوفّثْ،
إِتّْبزّعْ أَسيْنُو ن ثْفَاوْثْ نّسْ.
12 وَانِيثَا إِتّْرَاحْ إِتَّاسْ-د،
مَامّشْ ث إِندّهْ نتَّا،
حِيمَا أَذْ ڭّنْ مَارَّا مِينْ إِ ذ أَسنْ يُومُورْ،
خْ وُوذمْ ن ثمُّورْثْ، خْ ثمُّورْثْ.
13 نِيغْ أَمْ وعْمُوذْ نِيغْ إِ ڒفْضڒْ ن ثمُّورْثْ،
نِيغْ أَمْ وسْشَانْ ن ثْمخْسَا إِشُووَّارنْ،
إِجَّا إِ-ث أَذْ إِهْوَا. ▪
14 أوْشْ أَمزُّوغْ إِ مَانْ أَيَا، أَ أَيُوبْ،
بدّْ، سْقَارْ، ؤُ حْضَا خْ ڒعْجَايبْ ن أَربِّي.
15 مَا ثسّْنذْ مَامّشْ إِ خَاسنْ إِذبَّارْ أَربِّي،
مَامّشْ إِسّْرُوغَا ثْفَاوْثْ ن ؤُسيْنُو نّسْ؟
16 مَا ثسّْنذْ مَامّشْ تّحْرَارَانْ إِسيْنُوثنْ،
مَا ثسّْنذْ ڒعْجَايبْ ن ونِّي غَارْ ثدْجْ ثُوسّْنَا ثْمُونْ.
17 شكْ، ونِّي ؤُمِي إِحمَّا وَارُّوضْ،
مَاڒَا نتَّا إِسَّارْسَا ثَامُّورْثْ س أَرِّيحْ ن لْجَانُوبْ،
18 مَا ثْبزّْعذْ أَكِيذسْ ڒْقُوبّثْ ن ؤُجنَّا،
ثنِّي ذِينْ إِبدّنْ أَمْ إِشْثْ ن ثِيسِيثْ إِفسْينْ؟ ▪
19 سَارْڭبْ أَنغْ شكْ مِينْ إِ ذ أَسْ غَا نِينِي، إِ أَربِّي،
مَاغَارْ نشِّينْ وَارْ نْزمَّارْ أَذْ نْفسَّارْ وَالُو مْلِيحْ زِي سِّيبّثْ ن ثَادْجسْثْ.
20 مَا أَذْ أَسْ هَاجَانْ، أَقَا سِّيوْڒغْ أَمُّو؟
مَاڒَا شَا ن يِيجّنْ أَذْ ت يِينِي، أَذْ إِتّْوَاصَارْضْ نِيشَانْ. ▫
21 ڒخُّو وَارْ إِتّْوِيڒِي بْنَاذمْ ثَافَاوْثْ،
ثنِّي يَارقّنْ ذڭْ إِسيْنُوثنْ،
مَاشَا مَاڒَا إِعْذُو ؤُسُوضِي ن ؤُسمِّيضْ، أَقَا إِفَارّضْ إِ-ثنْ.
22 زِي شَّامَالْ إِتَّاسْ-د وُورغْ،
ثِيسِّيقْثْ إِسَّاڭّْوَاذنْ ثَارْسَا خْ أَربِّي.
23 أَمْزمَّارْ خْ كُوڒْشِي إِ وَارْ نْزمَّارْ أَذْ ث نَافْ،
ونِّي ذ أَمقّْرَانْ ذِي جّهْذْ،
نتَّا وَارْ إِتّْذدْجِي ڒْحقّْ ذ ثْسڭْذَا ثَامقّْرَانْثْ. ▪
24 س ؤُيَا تّڭّْوذنْ زَّايسْ إِوْذَانْ،
نتَّا وَارْ إِخزَّارْ غَارْ ينِّي إِحسّْبنْ إِخفْ نْسنْ ذ إِمِيغِيسنْ ن وُوڒْ.