ڒْحَارْضْ وِيسّْ أَربْعَا ن إِلِيهُو خْ ؤُجَارّبْ ذ وعْقَابْ غَارْ أَربِّي
36
1 يَارْنِي إِلِيهُو ذڭْ وَاوَاڒْ، إِنَّا: 2 صْبَارْ شْوَايْثْ أَكِيذِي، خنِّي نشّْ أَذْ أَشْ سّشْنغْ،
أَقَا ذِينْ عَاذْ ڒسْبَابْ كْثَارْ ذِي طّْوعْ ن ثْمسْڒَاشْثْ ن أَربِّي.
3 نشّْ أَذْ د-أَوْيغْ ثُوسّْنَا إِنُو زِي ڒَاڭّْوَاجْ،
أَذْ نعْمغْ ثَاسڭْذَا ن ونِّي ذ أَيِي د-إِخڒْقنْ.
4 مَاغَارْ س ثِيذتّْ، أَوَاڒنْ إِنُو وَارْ دْجِينْ ذ إِخَارِّيقنْ،
أَقَا زَّاثكْ ونِّي ذ بُو-ثُوسّْنَا ثَامقّْرَانْثْ.
5 خْزَارْ، أَربِّي إِمْغَارْ أَطَّاسْ، مَاشَا وَارْ إِسّحْقِيرِي حذْ،
إِمْغَارْ جّْهذْ ن ڒفْهَامثْ نّسْ. ▪
6 أَعفَّانْ وَارْ ث إِتّجِّي أَذْ إِدَّارْ،
مَاشَا إِ إِمزْڒَاضْ إِتَّاغْ أَسنْ ثَاسْغَارْثْ نْسنْ.
7 نتَّا وَارْ إِسّْحيِّيذْ ثِيطَّاوِينْ نّسْ خْ ؤُمْسڭّذْ،
مَاشَا إِسّْغِيمِي ثنْ إِ ڒبْذَا خْ ڒْعَارْشْ أَكْ-ذ إِجدْجِيذنْ،
ؤُشَا أَمُّو إِ غَا تّْوَاسُوعْڒَانْ. ▪
8 مَاڒَا تّْوَاوْثنْ نِيثْنِي ذِي ڒڭْيُوضْ،
تّْوَاحبّْسنْ ذِي سّْنَاسڒْ نْ ڒغْبنْ،
9 خنِّي إِسّْشنْ أَسنْ ثِيمڭَّا نْسنْ ثِيعفَّانِينْ ذ إِعذِّيينْ نْسنْ،
أَقَا مْغَارنْ أَطَّاسْ.
10 يَارزّمْ أَمزُّوغْ نْسنْ إِ ؤُوبّخْ،
إِقَّارْ أَسنْ أَذْ د-ذوْڒنْ زِي ڒْمُوعْصِييّثْ نْسنْ.
11 مَاڒَا سْڒِينْ ؤُ سخَّارنْ أَسْ،
خنِّي أَذْ سّْقفْڒنْ ذڭْ وفْڒَاحْ ؤُسَّانْ نْسنْ،
ؤُ ذِي زّْهَارْ إِسڭّْوُوسَا نْسنْ.
12 مَاشَا مَاڒَا وَارْ سْڒِينْ،
أَذْ تّْوَاهلّْكنْ س لَانْسَا،
أَذْ سُّوفّْغنْ بُوحْبڒْ أَمْ وَارْ غَارْسنْ ثدْجِي بُو ثُوسّْنَا.
13 نِيثْنِي إِنِّي إِسّْنِيعْمِيڒنْ ذڭْ وُوڒْ نْسنْ، تّْستَّافنْ أَغْضَابْ،
وَارْ ثتَّارنْ أَعَاونْ مَاڒَا نتَّا إِشَارْفْ إِ-ثنْ.
14 ڒعْمَارْ نْسنْ أَذْ إِمّثْ ؤُمِي نِيثْنِي عَاذْ ذ إِحُوذْرِييّنْ،
مَاغَارْ دَّارنْ جَارْ إِمِيثْليّنْ. ▪
15 أَذْ إِفكّْ أَمزْڒُوضْ ذِي ڒغْبنْ نّسْ،
ؤُ ذِي دّدْجْ أَذْ يَارْزمْ أَمزُّوغْ نْسنْ.
16 أَمُّو إِ شكْ إِعَارّنْ عَاوذْ زڭْ وُوضُوفْ ن ڒحْصَارثْ،
غَارْ تَّاسِيعْ مَانِي وَارْ إِتِّيڒِي عَاذْ ؤُنذْقفْ،
ؤُ مِينْ د غَا سَّارْسنْ خْ طَّابْڒَا نّكْ ذ مَاشَّا ثشُّورْ س ثْذُونْثْ. ▪
17 مَاشَا شكْ ثنُّوغذْ ذِي شّْرعْ أَكْ-ذ ؤُعفَّانْ،
مَاشَا دّعْوثْ ذ ثنْفُوتْشْ تَّاسنْثْ-إِ-د أَكْ-ذ وَايَاوَايَا.
18 حْضَا أَقَا أَسْعَارْ وَارْ شكْ إِتّْغَارِّي إِ ؤُسْثهْزِي،
ؤُ ڒْقدّْ ن تَّامَانْ ن وصْڒَاحْ وَارْ شكْ إِسُّوفُّوغْ زڭْ وبْرِيذْ.
19 مَا إِغُويَّانْ نّكْ أَذْ شكْ صَّارنْ زِي ڒحْصَارثْ،
نِيغْ مَارَّا مِينْ ثتّڭّذْ س مَارَّا ثِيزمَّارْ نّكْ؟
20 وَارْ تّْمژْرِي ذِي دْجِيڒثْ،
خْمِي إِ غَا تّْوَاكّْسنْ ڒڭْنُوسْ زڭْ ومْشَانْ نْسنْ.
21 حْضَا إِخفْ نّكْ، وَارْ ڭُّورْ خْ ؤُغزْذِيسْ مَانِي إِتّْوَافّْ ڒْغشّْ،
أَقَا شكْ أَذْ ثِيخْذَارذْ أَيَا خْ وَاضَارْ.
22 خْزَارْ، أَربِّي إِسّْعُودْجْ س جّهْذْ نّسْ،
مَانْ ونْ إِدْجَانْ ذ أَمْسڒْمَاذْ أَمْ نتَّا؟
23 مَانْ ونْ إِ ذ أَسْ إِسّْشَاننْ أَبْرِيذْ؟
نِيغْ مَانْ ونْ إِ ذ أَسْ إِنَّانْ: ’شكْ ثڭِّيذْ ڒْغشّْ!‘؟ ▪
24 عْقڒْ أَذْ ثسّْعُودْجِيذْ ڒْخذْمثْ ن إِفَاسّنْ نّسْ،
ڒْخذْمثْ نّسْ إِ زِي تّْغنَّاجنْ إِوْذَانْ.
25 كُوڒْ بْنَاذمْ إِتّْوَاڒَا ت،
زِي ڒَاڭّْوَاجْ تّْوَاڒَانْ ت إِوْذَانْ.
26 خْزَارْ، أَربِّي ذ أَمقّْرَانْ، وَارْ نْزمَّارْ أَذْ نفْهمْ أَيَا،
ڒْقدّْ ن إِسڭّْوُوسَا نّسْ وَارْ نْزمَّارْ أَذْ ذَايسْ نَارْزُو. ▪
27 مَاغَارْ نتَّا إِجبّذْ ثُوذِّيمِينْ ن وَامَانْ،
ثِينِّي د-إِتّْوَاكّْسنْ زِي ثَايُّوثْ خنِّي ذوْڒنْثْ ذ أَنْژَارْ،
28 أَنْژَارْ نِّي زِي تّْنسْنِيسِينْ إِسيْنُوثنْ،
أَنْژَارْ نِّي د إِوطَّانْ س ؤُفيّضْ خْ إِوْذَانْ.
29 مَانْ ونْ إِتّْحَاكَانْ عمَّارْصْ ذڭْ ؤُبزّعْ ن إِسيْنُوثنْ،
ؤُڒَا ذڭْ وَاجَّاجنْ زِي ثخْزَانْثْ نّسْ؟
30 خْزَارْ، إِتّْبزّعْ ثَافَاوْثْ نّسْ ثِيوَا ن يِيخفْ نّسْ،
إِتّْڒحَّافْ زَّايسْ طّْڒُوفَا يُودْجْغنْ قَاعْ ن ڒبْحَارْ.
31 مَاغَارْ س ؤُيَا إِتّْشَارّعْ ڒڭْنُوسْ.
إِتِّيشّْ مَاشَّا س وَاطَّاسْ. ▪
32 إِتّْشُورَّا إِفَاسّنْ نّسْ س ثْفَاوْثْ،
إِوصَّا ت أَذْ ثڒْقفْ ثَانْذَايْثْ.
33 أَضَارْضحْ ن وَاسَّامنْ إِتّْبَارّحْ زَّايسْ،
ؤُڒَا ذ ثَاحِيمَارْثْ، أَقَا نتَّا أَذْ د-يَاسْ.