ڒْحَارْضْ وِيسّْ ثْڒَاثَا ن إِلِيهُو: ثَاسڭْذَا ن بْنَاذمْ وَارْ ثْنفّعْ زَّاثْ إِ أَربِّي
35
1 يَارَّا-دّْفْ إِلِيهُو عَاوذْ أَوَاڒْ ؤُشَا إِنَّا: 2 مَا إِتّْغِيڒْ أَشْ أَيَا نِيشَانْ،
أَقَا ثقَّارذْ: ’ثَاسڭْذَا إِنُو كْثَارْ خْ ثنِّي ن أَربِّي!‘؟
3 مَاغَارْ ثنِّيذْ: ’مَانْ ڒفْضڒْ غَاركْ؟
مِينْ ذ أَيِي د غَا إِكَّارنْ أَقَا نشّْ وَارْ تّڭّغْ دّْنُوبْ؟‘ ▪
4 أَذْ خَاكْ د-أَرّغْ،
ؤُڒَا خْ إِمدُّوكَّاڒْ نّكْ أَكِيذكْ.
5 خْزَارْ أَجنَّا، ؤُ خْژَارْ،
حكَّارْ إِسيْنُوثنْ ثِيوَا نّكْ قَاعْ!
6 مَاڒَا ثخْضِيذْ، مِينْ إِ ذ أَسْ ثتّڭّذْ س مَانْ أَيَا؟
مَاڒَا إِعذِّيينْ نّكْ ذ أَطَّاسْ، مِينْ زَّايسْ غَا ثَاوْيذْ؟
7 مَاڒَا شكْ ذ أَمْسڭّذْ، مِينْ إِ ذ أَسْ ثتِّيشذْ س ؤُيَا،
نِيغْ مِينْ إِتّطّفْ نتَّا زڭْ ؤُفُوسْ نّكْ؟ ▪
8 أَقَا ثُوعفّْنَا نّكْ ثْڒقّفْ أَرْيَازْ أَمْ شكْ وَاهَا،
ؤُ ثَاسڭْذَا نّكْ ثتِّيڒِي ذِي طّْوعْ ن إِجّْ ن مِّيسْ ن بْنَاذمْ وَاهَا.
9 سْغُويُّونْ زڭْ وَاطَّاسْ ن ڒحْصَارَاثْ،
تّْڒَاغَانْ غَارْ ثْوِيزَا زِي سِّيبّثْ ن ؤُغِيڒْ ن أَيْثْ ن بُو-صُّولْطَا.
10 مَاشَا ؤُڒَا ذ إِجّنْ مَا إِقَّارْ: ’مَانِي إِدْجْ أَربِّي، ونِّي ذ أَيِي إِڭِّينْ،
ونِّي إِتِّيشنْ إِزْڒَانْ ن ؤُصبّحْ ذِي دْجِيڒثْ،
11 ونِّي ذ أَنغْ إِسّڒْمَاذنْ س ڒْمَاڒْ ن ثمُّورْثْ،
ذ ونِّي ذ أَنغْ إِتّڭّنْ ذ إِمِيغِيسنْ س إِجْضَاضْ ن ؤُجنَّا؟‘
12 ذِينِّي سْغُويُّونْ نِيثْنِي، مَاشَا نتَّا وَارْ د-إِتَّارِّي،
زِي سِّيبّثْ ن نّْفَاخثْ ن إِعفَّاننْ. ▪
13 س ثِيذتّْ، أَربِّي وَارْ إِتّسْڒِي غَارْ إِغُويَّانْ إِبطّْڒنْ،
أَمْزمَّارْ خْ كُوڒْشِي وَارْ كِيذسْ إِڒهِّي.
14 شكْ ثقَّارذْ، أَقَا شكْ وَارْ ث ثتّْوِيڒِيذْ،
وَاخَّا أَمنِّي ثَامسْڒَاشْثْ أَقَا-ت زَّاثْ إِ وُوذمْ نّسْ.
رَاجَا ث خنِّي.
15 مَاڒَا ڒخُّو أَخيّقْ نّسْ وَارْ إِشِّيثْ عَاذْ،
مَا خنِّي نتَّا وَارْ إِسِّينْ وَالُو خْ زّْعَامثْ؟ ▪
16 أَيُوبْ إِشَارّڭْ أَقمُّومْ نّسْ بَاطڒْ،
إِتّڭّْ أَوَاڒنْ إِمقّْرَاننْ نْهْڒَا ثُوسّْنَا.