ڒْحَارْذْ وِيسّْ ثْنَاينْ ن إِلِيهُو خْ مَامّشْ إِتّڭّْ أَربِّي ڒبْذَا س ڒْحقّْ
34
1 إِطّفْ إِلِيهُو عَاوذْ ذڭْ وَاوَاڒْ، إِنَّا: 2 سْڒمْ-د غَارْ وَاوَاڒنْ إِنُو، أَ إِمِيغِيسنْ،
وْشمْ أَيِي أَمزُّوغْ، أَ كنِّيوْ، أَيْثْ ن ثُوسّْنَا.
3 مَاغَارْ أَمزُّوغْ إِنبّشْ ذڭْ وَاوَاڒنْ،
أَمْ مَامّشْ إِتّْقَاسَا وَانغْ مَاشَّا. ▪
4 جّمْ أَنغْ أَذْ نِيخْضَارْ جَارْ أَنغْ مِينْ إِدْجَانْ نِيشَانْ،
جّمْ أَنغْ أَذْ نسّنْ جَارْ أَنغْ مِينْ إِدْجَانْ ذ أَصبْحَانْ.
5 مَاغَارْ أَيُوبْ إِنَّا: ’نشّْ ذ أَمْسڭّذْ،
أَربِّي إِكّسْ أَيِي ثَاسْغَارْثْ إِنُو! ▪
6 وَاخَّا غَارِي ڒْحقّْ، وَاخَّا أَمنِّي تّْبَانغْ أَمْ إِجّْ ن بُو-إِخَارِّيقنْ!
أَيزِّيمْ ن فْڒِيثْشَا إِ ذَايِي إِدْجْ،
وَارْ إِزمَّارْ أَذْ إِتّْوَاسْڭنْفَا أَمْ وَارْ ذِينْ إِدْجِي ؤُعذِّي.‘ ▪
7 مَانْ ونْ إِدْجَانْ ذ أَرْيَازْ أَمْ أَيُوبْ،
ونِّي إِسسّنْ أَسْثهْزِي أَمْ وَامَانْ؟
8 نتَّا إِڭُّورْ ذڭْ وبْرِيذْ أَمْ إِتّْعَاشَارْ إِنِّي إِتّڭّنْ ڒْمُوعْصِييّثْ،
إِڭُّورْ أَكْ-ذ إِرْيَازنْ إِعفَّاننْ.
9 مَاغَارْ إِنَّا: ’وَارْ إِنفّعْ وَالُو إِ بْنَاذمْ،
مَاڒَا نتَّا ذ أَمَارْضِي غَارْ أَربِّي.‘
10 س ؤُينِّي سْڒمْ-د غَارِي،
كنِّيوْ إِرْيَازنْ إِ ذِي ثدْجْ ڒفْهَامثْ:
’إِڭّْوجْ خْ أَربِّي مَاحنْذْ أَذْ يڭّْ ثُوعفّْنَا
ؤُڒَا خْ ؤُمْزمَّارْ خْ كُوڒْشِي مَاحنْذْ أَذْ يڭّْ مِينْ إِفَارْغنْ.‘ ▪
11 مَاغَارْ نتَّا إِخْڒفْ زِي بْنَاذمْ عْلَاحْسَابْ ثِيمڭَّا نّسْ،
ؤُ أَمْ مَامّشْ إِدْجْ وبْرِيذْ ن ورْيَازْ،
أَمُّو ث إِ غَا يَافْ. ▪
12 س ثِيذتّْ، عمَّارْصْ وَارْ إِتّڭّْ أَربِّي ثُوعفّْنَا،
أَمْزمَّارْ خْ كُوڒْشِي وَارْ إِسّْفَارِّيغْ شّْرعْ.
13 مَانْ ونْ ث إِوكّْڒنْ خْ ثمُّورْثْ،
مَانْ ونْ إِسَّارْسنْ مَارَّا دُّونشْثْ؟
14 مَاڒَا نتَّا أَذْ خَاسْ إِسّْنقْڒبْ ؤُڒْ نّسْ،
مَاڒَا أَذْ غَارسْ د-يَاوِي عَاوذْ بُوحْبڒْ نّسْ ذ نّفْسْ نّسْ، ▪
15 مَارَّا بْنَاذمْ ذ ڒْمَاڒْ أَذْ سُّوفّْغنْ بُوحْبڒْ،
ؤُ بْنَاذمْ أَذْ إِعْقبْ غَارْ ؤُشَاڒْ. ▪
16 مَاڒَا ذَايكْ ڒفْهَامثْ، سڒْ خنِّي إِ مَانْ أَيَا،
أوْشْ أَمزُّوغْ نّكْ إِ ڒْحسّْ ن وَاوَاڒنْ إِنُو.
17 مَا إِزمَّارْ ونِّي إِشَارّْهنْ ڒْحقّْ أَذْ إِحْكمْ،
نِيغْ ثخْسذْ شكْ أَذْ ثذْعِيذْ خْ ونِّي إِدْجَانْ ذ أَمْسڭّذْ أَمقّْرَانْ؟ ▪
18 مَا أَذْ إِنِينْ إِ ؤُجدْجِيذْ: ’شكْ وَارْ ثْسكّْوِيذْ وَالُو!‘
ؤُ إِ ثَارْوَا ن ثَاصِيڒثْ: ’كنِّيوْ ذ إِعفَّاننْ!‘؟
19 مَامّشْ خنِّي إِ ونِّي وَارْ إِسِّيزْوِيڒِينْ ڒْحُوكَّامْ،
ؤُ وَارْ إِتّْرِيحْ أَكْ-ذ بُو-وَاڭْڒَا خْ ؤُمزْڒُوضْ،
مَاغَارْ مَارَّا نِيثْنِي ذ ڒْخذْمثْ ن إِفَاسّنْ نّسْ. ▪
20 مُّوثنْ ذڭْ ورْمَاشْ ن وَابْڒِيونْ، ذڭْ وزْينْ ن دْجِيڒثْ.
تّْوَانْهزّنْ نِيثْنِي، ڒْڭنْسْ نِّي، ؤُشَا هلّْكنْ.
إِنِّي غَارْ ثدْجْ صُّولْطَا تّْوَاعَارّْننْ غَارْ ؤُغزْذِيسْ،
بْڒَا مَا إِحَاذَا ثنْ ؤُفُوسْ ن بْنَاذمْ.
21 مَاغَارْ ثِيطَّاوِينْ نّسْ خزَّارنْثْ غَارْ إِبْرِيذنْ ن مْكُوڒْ إِجّْ،
نتَّا إِتّْوَاڒَا مْلِيحْ مَارَّا إِصُورَافْ نْسنْ. ▪
22 وَارْ ثدْجِي ثُوبَّارْشنْثْ ؤُ وَارْ ثدْجِي ثِيڒِي ن ڒْموْثْ،
مَانِي زمَّارنْ أَذْ نُّوفَّارنْ إِنِّي إِتّڭّنْ ڒْغَارْ. ▪
23 وَارْ ذ أَسْ إِتّْخصِّي أَذْ إِخْزَارْ ذِي بْنَاذمْ أَطَّاسْ ن ڒْوقْثْ،
قْبڒْ مَا إِ د غَا يَاذفْ غَارْ دّعْوثْ زَّاثْ إِ ؤُغمْپُوبْ ن أَربِّي.
24 إِڒبّزْ جّْوَاحڒْ بْڒَا أَسقْسِي،
ؤُشَا إِڭَّا إِنّغْنِي ذڭْ ومْشَانْ نْسنْ.
25 مَاغَارْ نتَّا إِسّنْ ثِيمڭَّا نْسنْ،
إِسّْنقْڒَابْ إِ-ثنْ ذِي دْجِيڒثْ ؤُشَا تّْوَاڒبْزنْ.
26 إِشَّاثْ إِ-ثنْ جَارْ إِعفَّاننْ،
ذڭْ إِجّْ ومْشَانْ مَانِي تّْبدَّانْ إِوْذَانْ تّْوَاڒَانْ،
27 مِينْزِي نِيثْنِي حيّْذنْ خَاسْ،
وَارْ تّْحكِّيرنْ مَارَّا إِبْرِيذنْ نّسْ، ▪
28 مَاحنْذْ أَذْ خَاسْ إِسِّيوضْ ثْغُويِّيثْ ن إِمزْڒَاضْ،
ؤُ مَاحنْذْ أَذْ إِسْثَاجبْ إِ إِغُويَّانْ ن ڒْمُوسَاكِينْ.
29 مَاڒَا نتَّا يِيوِي-د ڒْهُوذْنثْ، مَانْ ونْ ذَايسْ إِ غَا إِڭّنْ ڒْعِيبْ؟
مَاڒَا إِسّْنُوفَّارْ أَغمْپُوبْ نّسْ، وِي ث غَا إِژَارنْ؟
إِحكّمْ ڒَا خْ ڒْڭنْسْ أَمْ خْ بْنَاذمْ،
30 حِيمَا وَارْ إِحكّمْ ؤُڒَا ذ إِجّْ ن بْنَاذمْ إِ إِتّڭّنْ س ثْنَاينْ ن وُوذْمَاونْ،
ؤُ حِيمَا وَارْ تِّيڒِينْثْ عَاذْ ثْخشْفِينْ إِ ڒْڭنْسْ.
31 مْڒِي إِنَّا بْنَاذمْ نِّي إِ أَربِّي
’سّْڭعّْذغْ إِخفْ إِنُو، وَارْ تّْعِيوِيذغْ أَذْ سّْفسْذغْ.
32 مِينْ وَارْ تّْوِيڒِيغْ، سْغَارْ أَيِي ث شكْ!
مَاڒَا ڭِّيغْ مِينْ وَارْ إِسڭّْذنْ، وَارْ ث تّڭّغْ عَاذْ.‘
33 مَا إِتّْخصَّا أَذْ إِخْڒفْ نتَّا أَمْ مَامّشْ ث ثخْسذْ شكْ؟
أَقَا ثسّحْقَارذْ ث!
مَاغَارْ ثخْسذْ أَذْ ثِيخْضَارذْ س يِيخفْ نّكْ، نشّْ مَاشَا لَّا!
مَاڒَا إِتّْغِيڒْ أَشْ أَقَا ثسّْنذْ ت، إِنِي ت!
34 إِرْيَازنْ س ڒفْهَامثْ أَذْ أَيِي إِنِينْ،
أَمْ قَاعْ أَرْيَازْ أَمِيغِيسْ إِتّسْڒَا-د غَارِي،
35 أَقَا أَيُوبْ وَارْ إِسِّيوڒْ س ثُوسّْنَا،
أَقَا أَوَاڒنْ نّسْ بْڒَا ڒفْهَامثْ إِ يدْجَانْ.
36 إِوَا، أجّْ أَيُوبْ أَذْ إِتّْوَاقدْجبْ أَڒْ أَنڭَّارْ،
مِينْزِي إِتَّارَّا-د أَمْ إِرْيَازنْ شُّورنْ س ڒْمُوعْصِييّثْ.
37 مَاغَارْ إِ دّنْبْ نّسْ يَارنِّي عَاذْ أَعذِّي،
جَارْ أَنغْ إِشَّاثْ شَامْخَا س إِفَاسّنْ،
ؤُ تّْمَارنْينْ وَاوَاڒنْ نّسْ ضِيدّْ إِ أَربِّي.