أَيُوبْ إِشفّعْ بلِّي وَارْ ذَايسْ بُو ڒْعِيبْ
31
1 نشّْ ڭِّيغْ ڒْعَاهْذْ أَكْ-ذ ثِيطَّاوِينْ إِنُو، مَامّشْ خنِّي إِ غَا خْزَارغْ ذِي ثعْزَارشْثْ؟
2 مَاغَارْ مِينْ إِدْجَانْ ثَاسْغَارْثْ ن أَربِّي زِي سنّجْ،
نِيغْ ثَاسْغَارْثْ ذِي ڒْوَارْثْ ن ؤُمْزمَّارْ خْ كُوڒْشِي زڭْ إِجنْوَانْ يُوعْڒَانْ؟
3 مَا وَارْ إِدْجِي أَضيّعْ إِكَّارْ-د إِ ؤُعفَّانْ،
أَرْژِييّثْ إِ ينِّي إِتّڭّنْ ڒْمُوعْصِييّثْ؟
4 مَا وَارْ إِتّْوِيڒِي نتَّا إِبْرِيذنْ إِنُو،
مَا وَارْ إِحسّبْ نتَّا ڒْقدّْ ن مَارَّا إِصُورَافْ إِنُو؟ ▪
5 مَاڒَا ثُوغَا ؤُيُورغْ ذِي ڒخْذعْ،
نِيغْ إِقدْجقْ ؤُضَارْ إِنُو غَارْ ڒْغشّْ،
6 أجّْ سِيذِي أَذْ أَيِي إِوْزنْ خنِّي ذِي ڒْمِيزَانَاثْ إِسڭّْذنْ،
أَڒَامِي إِ غَا إِسّنْ أَربِّي ڒصْفَايثْ إِنُو.
7 مَاڒَا إِصُورَافْ إِنُو فّْغنْ زڭْ وبْرِيذْ،
ؤُڒْ إِنُو إِضْفَارْ ثِيطَّاوِينْ إِنُو،
ؤُشَا خنِّي إِڒْصقْ ڒْعِيبْ ذڭْ إِفَاسّنْ إِنُو،
8 خنِّي أَذْ زَارْعغْ نشّْ، مَاشَا إِجّنْ نّغْنِي أَذْ إِشّْ،
ؤُ مِينْ غَارِي د-إِغمَّاينْ أَذْ إِتّْوَاقْڒعْ!
9 مَاڒَا ؤُڒْ إِنُو إِتّْوَاغْوَا غَارْ إِشْثْ ن ثمْغَارْثْ،
نِيغْ ثُوغَا تّْحَامِيغْ غَارْ ثوَّارْثْ ن وَاجَّارْ إِنُو، ▪
10 أجّْ خنِّي ثَامْغَارْثْ إِنُو أَذْ ثحْرِي إِمنْذِي إِ يِيجّنْ نّغْنِي،
ؤُ جّمْ إِنّغْنِي أَذْ خَاسْ أَضَارنْ.
11 مَاغَارْ أَيَا ذ ڒفْضِيحثْ،
ذ إِشْثْ ن لْجَارِيمَا إِ خَاسْ إِ غَا وْثنْ ڒْقُوضَاثْ.
12 مَاغَارْ أَيَا ذ ثِيمسِّي ثتّتّْ أَڒْ قطُّو،
ثْقدْجعْ مَارَّا ڒْغِيدْجثْ إِنُو.
13 مَاڒَا سّْحقَّارغْ ڒْحقّْ ن ؤُمْسخَّارْ إِنُو ذ ثَايَّا إِنُو،
ڒَامِي ثُوغَا تّمْشُوبُّوشنْ أَكِيذِي،
14 مِينْ إِ غَا ڭّغْ خنِّي، مَاڒَا سِيذِي إِكَّارْ،
مَاڒَا نتَّا إِقدْجبْ أَيِي،
مِينْ خَاسْ د غَا يَارّغْ خنِّي؟ ▪
15 ونِّي ذ أَيِي إِڭِّينْ ذڭْ ؤُعذِّيسْ ن يمَّا، مَا وَارْ ث إِڭِّي ؤُڒَا ذ نتَّا؟
مَا وَارْ إِدْجِي ذ إِجّْ ونِّي ذ أَنغْ د-إِخڒْقنْ ذڭْ ؤُعذِّيسْ ن يمَّاثْنغْ؟ ▪
16 مَاڒَا قمّْحغْ أَمژْرِي ن إِمزْڒَاضْ،
نِيغْ سّْرُوغْ ثِيطَّاوِينْ ن ثَاجَّاتْشْ،
17 مَاڒَا مْغِيرْ نشّْ وَاهَا شِّيغْ أَڒقُّوزْ ن وغْرُومْ إِنُو،
أَيُوجِيڒْ مَاشَا وَارْ زَّايسْ يشِّي،
18 - مَاغَارْ زِي ثمْژِي إِيْمَا نتَّا غَارِي أَمْ إِيْمَا غَارْ بَابَاسْ،
زڭْ ؤُعذِّيسْ ن يمَّا نذْهغْ ت -
19 مَاڒَا ژْرِيغْ إِجّنْ إِتّْوَاهلّكْ مِينْزِي وَارْ غَارسْ إِدْجِي وَارُّوضْ،
نِيغْ مِينْزِي وَارْ ذِينْ إِدْجِي دُّورِي إِ ؤُمزْڒُوضْ،
20 مَاڒَا عمَّارْصْ وَارْ ذ أَيِي بَارْكنْثْ ثجْعِينَّاثِينْ نّسْ،
مِينْزِي إِڭَّا أَذْ إِسِّيحْمَا إِخفْ نّسْ س ثْضُوفْثْ ن إِشَارِّيينْ إِنُو،
21 مَاڒَا أَفُوسْ إِنُو إِهُودّْ خْ ؤُيُوجِيڒْ،
مِينْزِي ژْرِيغْ أَقَا ذِينْ ثْوِيزَا إِ نشّْ غَارْ ثوَّارْثْ ن ثنْذِينْثْ، ▫
22 أجّْ خنِّي أَذْ أَيِي ثوْضَا ثغْرُوضْثْ إِنُو زڭْ إِجِيمَانْ،
ؤُ أَذْ أَيِي يَارْژْ ؤُغِيڒْ إِنُو زڭْ يِيغسْ!
23 مَاغَارْ إِوْضَا-د خَافِي ؤُنخْڒِيعْ أَمقّْرَانْ،
إِشْثْ ن ڒْمُوصِيبثْ زِي غَارْ أَربِّي،
وَارْ زمَّارغْ أَذْ ڭّغْ وَالُو زَّاثْ إِ ؤُعُودْجِي نّسْ.
24 مَاڒَا ڭِّيغْ نشّْ ؤُرغْ ذ أَثشْڒِي إِنُو،
نِيغْ نِّيغْ إِ وُورغْ إِغْڒَانْ أَطَّاصْ: ’شكْ ذ ڒَامَانْ إِنُو!‘، ▪
25 مَاڒَا فَارْحغْ، ؤُمِي إِمْغَارْ وَاڭْڒَا إِنُو،
ؤُمِي أَفُوسْ إِنُو إِطّفْ أَطَّاسْ ذ أَڭْڒَا، ▪
26 مَاڒَا ژْرِيغْ ثَافَاوْثْ ن ثْفُوشْثْ خْمِي ثتّْوسّڭْ،
نِيغْ ثَازِيرِي خْمِي ثڭُّورْ ذِي ثِيسِّيقْثْ نّسْ، ▪
27 ؤُشَا إِتّْوَاغْوَا وُوڒْ إِنُو ذِي ثْنُوفّْرَا،
ؤُشَا سُّوذْمغْ ثنْثْ س ؤُفُوسْ ذڭْ ؤُقمُّومْ إِنُو،
28 خنِّي إِڒِي ؤُڒَا ذ مَانْ أَيَا ذ ڒْمُوعْصِييّثْ أَذْ ت وْشنْ إِ ڒْقُوضَاثْ،
مَاغَارْ خنِّي ڭُّورغْ أَذْ نْكَارغْ أَربِّي نِّي إِدْجَانْ سنّجْ.
29 مَاڒَا فَارْحغْ إِ أَرْژِييّثْ ن ونِّي ذ أَيِي إِشَارّْهنْ،
فَارْحغْ ؤُمِي ث إِڒْقفْ ڒْغَارْ! ▪
30 نشّْ مَاشَا وَارْ جِّيغْ أَنغْ إِنُو أَذْ إِخْضَا،
ؤُمِي كّْوَارغْ ڒعْمَارْ نّسْ س نّعْڒثْ! ▪
31 مَاڒَا إِرْيَازنْ نِّي إِدْجَانْ ذڭْ ؤُقِيضُونْ إِنُو وَارْ قَّارنْ:
’مَانْ ونْ خنِّي زڭْ ينِّي إِكْسِينْ زڭْ ويْسُومْ إِنُو وَارْ تّْوَاسْجِيوْننْ؟!‘
32 ؤُڒَا ذ إِجّْ ن ڒْبَارَّانِي مَاشَا وَارْ إِسّنْسْ ذِي بَارَّا خْ وبْرِيذْ،
مَاغَارْ إِ ؤُمْسبْرِيذْ أَرْزْمغْ ثِيوُّورَا إِنُو.▪
33 مَاڒَا نشّْ، أَمْ أَذَامْ، ذْڒِيغْ أَخطُّو إِنُو،
ؤُمِي سّْنُوفَّارغْ ڒْمُوعْصِييّثْ إِنُو ذڭْ وحْسِينْ إِنُو، ▫
34 مِينْزِي ڭّْوذغْ زِي ڒْغَاشِي أَمقّْرَانْ،
نِيغْ إِسّْنخْڒعْ أَيِي ؤُسحْقَارْ ن ڒْوَاشُونْ إِنُو،
أَڒَامِي قِّيمغْ سّغْذغْ، وَارْ فِّيغغْ عَاذْ زِي ثوَّارْثْ غَارْ بَارَّا ...
35 مْڒِي غَارِي إِجّنْ ونِّي ذ أَيِي غَا إِسْڒنْ.
خْزَارْ، أَشمِّيعْ إِنُو - أَمْزمَّارْ خْ كُوڒْشِي أَذْ خَافِي د-يَارّْ -
ؤُڒَا ذ أَذْلِيسْ إِتّْوَانّْضنْ نِّي ث يُورَا ورْيَازْ نِّي كِيذِي إِتّمْشُوبُّوشنْ.
36 مَاعْلِيكْ ؤُفِيغْ مَا وَارْ ث أَربُّوغْ خْ ثْغَارْضْثْ إِنُو،
أَذْ ث قّْنغْ إِ ؤُزدْجِيفْ إِنُو أَمْ إِجّْ ن تَّاجْ.
37 إِوَا، أَذْ أَسْ إِنِيغْ ڒْقدّْ ن إِصُورَافْ إِنُو،
أَذْ غَارسْ د-قَارّْبغْ أَمْ إِجّْ ن ڒْحَاكمْ.
38 مَاڒَا ڒعْرَاصِي إِنُو إِسْغُويّْ خَافِي،
إِعيَّاذنْ نّسْ أَذْ رُونْ أَكْ-ذ وَايَاوْيَا مَارَّا،
39 مَاڒَا شِّيغْ صَّابثْ نّسْ نْهْڒَا أَخدْجصْ،
ؤُ ڭِّيغْ ڒعْمَارْ ن إِخمَّاسنْ نّسْ إِضْڒقْ إِ بُوحْبڒْ،
40 أجّْ خنِّي أَذْ إِغْمِي شْبَارْقْ أَكْ-ذ إِسنَّاننْ ذڭْ ومْشَانْ ن يِيرْذنْ،
ؤُڒَا ذ ڒعْشُوبْ يَارْصُوذنْ ذڭْ ومْشَانْ ن إِمنْذِي.
أَقَا ذَا إِ قْضَانْ وَاوَاڒنْ ن أَيُوبْ.