أَيُوبْ إِسِّيوڒْ خْ ڒمْحَايمْ نّسْ ن يِيضَا
30
1 ڒخُّو مَاشَا ثُوغَا ضحّْشنْ خَافِي إِحُوذْرِييّنْ نِّي إِدْجَانْ ذ إِمژْيَاننْ خَافِي ذڭْ وُوسَّانْ، إِنِّي بَابَاثْسنْ وَارْ غَارِي سكّْوِينْ
مَاحنْذْ أَذْ ثنْ ڭّغْ غَارْ يِيطَانْ إِ إِدْجَانْ خْ وُودْجِي إِنُو.
2 مِينْ غَا يڭّْ خنِّي س جّهْذْ ن إِفَاسّنْ نْسنْ؟
أَقَا إِفْنَا جّهْذْ نْسنْ زِي سِّيبّثْ ن ثوْسَارْ.
3 زِي ڒْقِيدْجثْ ؤُ زِي ڒَاژْ ذوْڒنْ إِسْرِيونْ،
تّْمغْزَازنْ ذِي ڒْوَاطَا يُوژْغنْ
ذِي ثُوبَّارْشنْثْ ثشُّورْ س ؤُردّدْجْ ذ ؤُربّجْ.
4 نِيثْنِي ڒقّْضنْ ڒبْزَارْ أَمدْجَاحْ جَارْ شْبَارْقْ،
إِژوْرَانْ ن ؤُززُّو ذ أَغْرُومْ نْسنْ.
5 ؤُژّْڒنْ خَاسنْ زِي ثْمُونثْ ن إِوْذَانْ،
كّْوَارنْ ثنْ أَمْ إِخوَّاننْ،
6 حِيمَا أَذْ زذْغنْ ذِي ثغْزُورِينْ إِسَّاڭّْوَاذنْ،
ذڭْ إِفْرَانْ ن ؤُشَاڒْ ؤُ ذِي ڒجْرُوفْ.
7 سْغُويُّونْ جَارْ شْبَارْقْ،
سَاذُو ثِيزڭّْوَارِينْ سّْمُونَانْ.
8 ثَارْوَا ن إِپُوهَاڒِييّنْ ذ ثَارْوَا بْڒَا إِسمْ،
إِنِّي ؤُژّْڒنْ خَاسنْ زِي ثمُّورْثْ س ؤُزدْجَاضْ.
9 ڒخُّو مَاشَا أَقَا أَيِي ذڭْ إِزْڒِي نْسنْ ن ثْژَاوَارْثْ،
ذوْڒغْ أَسنْ إِ ثخْبَارْجِيثْ. ▫ ▪
10 شَارّْهنْ أَيِي، تَّاڭّْوَاجنْ خَافِي،
وَارْ تّْسضْحِينْ شَا أَذْ سُّوسْفنْ خْ ؤُغمْپُوبْ إِنُو. ▪
11 مَاغَارْ نتَّا إِسّفْسِي أَسْغُونْ ن ثْقِيضُونْثْ إِنُو ؤُشَا إِسّهْوَا أَيِي.
نِيثْنِي نْضَارنْ سّْرِيمثْ نْسنْ زَّاثِي. ▫
12 غَارْ ؤُغزْذِيسْ أَفُوسِي إِنُو كَّارنْ-د خَافِي إِغذِّيونْ ن ثَارَّاوْثْ،
عَارّْننْ إِضَارنْ إِنُو،
سّْڭعَّاذنْ خَافِي إِمسْرَاقْ ن أَرْژِييّثْ نْسنْ.
13 أَبْرِيذْ إِنُو أَرْژِينْ ث،
أَرنّْينْ ثَامَارَا خْ ثَامَارَا إِنُو
إِنِّي سِيمَانْثْ نْسنْ وَارْ إِدْجِي وِي ذ أَسنْ غَا إِوْشنْ أَفُوسْ.
14 أَخْمِي د-تَّاسنْ زڭْ إِجّْ ن ؤُنُوقِّيبْ ذ مِيرِيوْ،
تَّاكّْوَاضنْ أَمْ ڒمْوَاجْ يَاردّْدْجنْ.
15 تّْوَاكبّنْ-د خَافِي إِنخْڒِيعنْ،
أَمْ ؤُسمِّيضْ ضفَّارنْ نِيثْنِي شَّانْ إِنُو،
إِضْوَا زّْهَارْ إِنُو أَمْ إِجّْ ن ؤُسيْنُو.
16 س ؤُيَا إِفسِّي ڒخُّو ڒعْمَارْ إِنُو ذَايِي،
ؤُسَّانْ ن ڒغْبنْ منّْعنْ أَيِي.
17 ذِي دْجِيڒثْ إِسّْنُوقُّوبْ أَيِي إِخْسَانْ إِنُو إِ ذَايِي إِدْجَانْ،
ڒحْرِيقْ إِ ذ أَيِي إِتّْغزَّانْ وَارْ يَارسِّي.
18 إِتّْوَابدّڒْ وَارُّوذْ إِنُو س جّهْذْ أَمقّْرَانْ
أَڒَامِي وَارْ خَافِي تّعْقِيڒنْ عَاذْ،
ؤُ نتَّا إِشَارْفْ أَيِي أَمْ ثْمَا إِ إِنّْضنْ
إِ وَارْزمْ ن يِيرِي ذڭْ وَارُّوضْ.
19 إِنْضَارْ أَيِي ذڭْ ؤُبدْجَاعْ،
ذوْڒغْ أَمْ ؤُشَاڒْ ذ يِيغّضْ.
20 سْغُويُّوغْ-د غَاركْ، مَاشَا شكْ وَارْ خَافِي ثتَّارِّيذْ،
نشّْ بدّغْ ذَا، مَاشَا وَارْ ذ أَيِي ثْحطِّيذْ.
21 شكْ ثْذوْڒذْ أَيِي أَمْ إِجّْ ن بُو-ڒخْشُونثْ،
ثتّْذَارَّاشذْ خَافِي س ؤُفُوسْ نّكْ إِجهْذنْ.
22 شكْ ثسّْڭعَّاذذْ أَيِي ؤُ ثْندّْهذْ أَيِي ذڭْ ؤُسمِّيضْ،
ثسّفْرَاغذْ قَاعْ أَدُّوذْ إِنُو.
23 مَاغَارْ نشّْ سّْنغْ أَقَا شكْ أَذْ أَيِي ثْنذْهذْ غَارْ ڒْموْثْ،
غَارْ ثَادَّارْثْ مَانِي تّْمُوننْ مَارَّا إِنِّي إِدَّارنْ. ▪
24 مَا وَارْ إِنطَّارْ بْنَاذمْ أَفُوسْ نّسْ مَاڒَا إِوْضَا،
مَا وَارْ إِسْغُويُّو وَالُو قَاعْ غَارْ أَرْژِييّثْ نّسْ؟
25 مَا وَارْ رُوغْ خْ ونِّي ثُوغَا غَارْ إِدْجْ وُوسَّانْ ن ثَامَارَا،
مَا وَارْ إِشْضِينْ بُوحْبڒْ إِنُو خْ ؤُمزْڒُوضْ؟ ▪
26 ؤُمِي سِّيثْمغْ غَارْ مِينْ إِصبْحنْ، أَقَا يُوسَا-د مِينْ إِدْجَانْ ذ أَعفَّانْ،
ؤُمِي رَاجِيغْ ثَافَاوْثْ، ثُوسَا-د ثَادْجسْثْ.
27 تّْننَّانْ أَذَاننْ إِنُو، وَارْ أَرْسِينْ،
إِوْضنْ-د وُوسَّانْ ن ثَامَارَا غَارِي.
28 ثُوغَا ؤُيُورغْ ذڭْ وشْضَانْ، بْڒَا ڒهْمُو ن ثْفُوشْثْ.
كَّارغْ-د ذڭْ وڭْرَاوْ ن ڒْڭنْسْ ؤُشَا قِّيمغْ سْغُويُّوغْ ذڭْ ؤُجنَّا.
29 إِ وُوشَّاننْ ن ڒخْڒَا ذوْڒغْ ذ ؤُمَاثْسنْ زَّايْسنْ،
إِ يسِّيسْ ن نّْعَامثْ ذ أَمْعَاشَارْ. ▪
30 ثِيڒْمشْثْ إِنُو ثذْوڒْ خَافِي ذ أَكَارْكُوشْ أَبَارْشَانْ،
زِي ثْمسِّي شمّْضنْ إِخْسَانْ إِنُو. ▪
31 ثذْوڒْ ثِيرَارْثْ ن ڒْڭَامْبْرِي إِنُو إِ وشْضَانْ،
ثَامْجَا إِنُو إِ ڒْحسّْ ن إِمطَّاونْ.