أَيُوبْ إِسِّيوڒْ خْ مَامّشْ ثُوغَا ثُوذَارْثْ نّسْ قْبڒْ
29
1 ؤُشَا يَارْنِي أَيُوبْ ذِي ڒْهَارْذْ ن لْمَاثَالْ نّسْ، إِنَّا: 2 مْڒِي دْجِيغْ أَمْ ذڭْ ؤُينِّي ن إِيُورنْ إِعْذُونْ أَطَّاسْ زڭْ وَامِي،
أَمْ ذڭْ وُوسَّانْ ؤُينِّي ڒَامِي ذ أَيِي ثُوغَا إِحطَّا أَربِّي،
3 ڒَامِي إِڭَّا ڒفْنَارْ نّسْ أَذْ يَارغْ خْ ؤُزدْجِيفْ إِنُو،
ؤُ ثُوغَا ڭُّورغْ ذِي ثَادْجسْثْ س ثْفَاوْثْ نّسْ.
4 مْڒِي دْجِيغْ أَمْ ذڭْ وُوسَّانْ ن ثمْژِي إِنُو،
ؤُمِي أَمُونِي ذِي ڒَامَانْ أَكْ-ذ أَربِّي ثُوغَا إِبدّْ خْ ثْقِيضُونْثْ إِنُو،
5 ؤُمِي أَمْزمَّارْ خْ كُوڒْشِي ثُوغَا-ث عَاذْ أَكِيذِي،
ؤُ إِحنْجِيرنْ إِنُو عَاذْ نّْضنْ أَيِي-د،
6 ؤُمِي إِصُورَافْ إِنُو ثُوغَا عُومّنْ ذِي ثْرُوسِّي،
ؤُ ثَاصْضَارْثْ ثُوغَا ثتّْزدْجَاعْ زَّاثِي ثِيغزْرَاثِينْ ن زّشْثْ!
7 ؤُمِي د-فّْغغْ غَارْ ثوَّارْثْ ن ثنْذِينْثْ،
جِّيغْ سّْبدّنْ أَيِي ڒْكُورْسِي إِنُو ذڭْ وَازَّايْ،
8 نُّوفَارنْ إِحُوذْرِييّنْ ڒَامِي ذ أَيِي ژْرِينْ،
ؤُ إِمشَّايْپُوثنْ كَّارنْ، قِّيمنْ بدّنْ.
9 إِمقّْرَاننْ منْعنْ أَوَاڒنْ نْسنْ،
ؤُشَا سَّارْسنْ أَفُوسْ خْ ؤُقمُّومْ نْسنْ،
10 ثْمِيجَّا ن ڒْحُوكَّامْ ثسْقَارْ،
إِڒْسقْ إِڒسْ نْسنْ غَارْ وَانغْ نْسنْ.
11 مَاڒَا إِسْڒَا أَيِي ؤُمزُّوغْ، إِسّمْغَارْ أَيِي،
مَاڒَا ثژْرَا أَيِي ثِيطّْ، ثشْهذْ خْ ڒْخَاضَارْ إِنُو.
12 مَاغَارْ سّْنجْمغْ ڒْمسْكِينْ نِّي إِسْغُويّنْ،
أَيُوجِيڒْ نِّي وَارْ غَارسْ ثُوغِي ونِّي ث إِ غَا إِعَاوْننْ. ▪
13 ڒْخَاضَارْ ن ونِّي إِهلّْكنْ، يُوسَا-د خَافِي،
ؤُڒْ نْ ثَاجَّاتْشْ ڭِّيغْ ث إِسْڒِيوْڒوْ س ڒفْرَاحثْ.
14 يَارْضغْ ثَاسڭْذَا ؤُ ثَاسڭْذَا ثسّْيَارْضْ أَيِي.
ثُوغَا شّْرعْ إِنُو أَمْ ؤُسڒْهَامْ ؤُ أَمْ أَرژّثْ. ▪
15 ثُوغَا أَيِي ذ ثِيطَّاوِينْ إِ إِذَارْغَاڒنْ،
ؤُڒَا ذ إِضَارنْ إِ إِقِيضَارنْ.
16 ثُوغَا أَيِي ذ بَابَاثْسنْ إِ إِمزْڒَاضْ،
ؤُشَا دّعْوثْ ن ونِّي وَارْ سِّينغْ، بقّْشغْ ت.
17 أَرْژِيغْ ثِيغْمَاسْ ن ثغْمَارْثْ ن ونِّي إِڭِّينْ مِينْ وَارْ إِسڭّْذنْ،
ؤُشَا كّْسغْ زَّارْذثْ إِ ثغْمَاسْ نّسْ.
18 نِّيغْ: ’أَذْ سُّوفّْغغْ بُوحْبڒْ إِنُو خْ ڒْعُوشّْ إِنُو،
أَذْ دَّارغْ ثُوذَارْثْ ثَازِيرَارْثْ أَمْ ؤُجْضِيذْ ن فُونِيكْسْ.‘
19 إِژوْرَانْ إِنُو بزّْعغْ ثنْ غَارسْ أَڒْ أَمَانْ،
ؤُ ذِي دْجِيڒثْ إِقِّيمْ نّْذَا خْ ڒفْرُوعْ إِنُو.
20 ثُوغَا ڒْعزّْ إِنُو إِتّْنعْنِيعْ ذَايِي ڒبْذَا،
ڒْقوْسْ إِنُو إِسْهڒْ ذڭْ ؤُفُوسْ إِنُو ڒبْذَا.
21 سْڒِينْ-د غَارِي، رَاجَانْ،
سْقَارنْ ذِي طّْوعْ ن شّْوَارْ إِنُو.
22 أَوَارْنِي إِ وَاوَاڒْ إِنُو وَارْ سِّيوْڒنْ ثْوَاڒَا نّغْنِي،
أَوَاڒنْ إِنُو ؤُذُومنْ خَاسنْ.
23 نِيثْنِي رَاجَانْ أَيِي أَمْ رَاجَانْ أَنْژَارْ،
أَرْزْمنْ أَقمُّومْ نْسنْ أَمْ ث أَرزْمنْ غَارْ ونْژَارْ ن ثفْسُوثْ.
24 مَاڒَا سْفَارْنِينغْ غَارْسنْ، وَارْ زمَّارنْ عَاذْ أَذْ تِّيقّنْ،
مَاشَا ثَافَاوْثْ ن ؤُغمْپُوبْ إِنُو وَارْ زْمِيرنْ أَذْ كِيذسْ مّْعَاڒَانْ.
25 إِخْضَارغْ أَسنْ أَبْرِيذْ ؤُشَا بدّغْ أَسنْ غَارْ ؤُزدْجِيفْ،
زذْغغْ أَمْ ؤُجدْجِيذْ جَارْ ڒْعسْكَارْ،
أَمْ ونِّي إِتّْعزَّانْ إِنِّي إِشضْننْ.