ڒْحَارْضْ ن أَيُوبْ خْ ثِيغِيثْ
28
1 س ثِيذتّْ، أَقَا ذِينْ أَمْشَانْ مَانِي ثتّْوَافْ نُّوقَارْثْ، ؤُڒَا ذِينْ أَمْشَانْ إِ وُورغْ مَانِي ث سِّيزْذِيڭنْ.
2 ؤُزَّاڒْ تَّاوْينْ ث-إِ-د زڭْ ؤُشَاڒْ،
ؤُ زڭْ وژْرُو سّْفسّْينْ نّْحَاسْ.
3 إِڭَّا بْنَاذمْ قطُّو إِ ثَادْجسْثْ،
نتَّا يَارزُّو ذِي مْكُوڒْ أَمْشَانْ مَانِي مَّا،
خْ وژْرُو إِ د-إِتّفّْغنْ زِي ثُوبَّارْشنْثْ ذ ثِيڒِي ن ڒْموْثْ.
4 يَارْزمْ إِجّْ ن وخْجِيضْ بْڒَا مَا أَذْ ذِينْ يِيڒِي حذْ أَكِيذسْ.
تّْوَاتُّونْ زڭْ إِضَارنْ ن يِينِّي سنّجْ نْسنْ،
ؤُيْڒنْ تّْرَاحنْ ثَاسنْ-د بْڒَا مَا يَارَّا أَسنْ-د حذْ ڒْبَاڒْ.
5 إِتّفّغْ-د وغْرُومْ زِي ثمُّورْثْ،
أَمْ سْوَادَّايْ نّسْ مَارَّا أَخْمِي س ثْمسِّي إِنّقْڒبْ.
6 إِژْرَا نّسْ ذ أَمْشَانْ مَانِي تَّافنْ صَافِّيرْ،
ؤُ ذَايسْ إِ ثدْجْ ؤُڒَا ذ ثَاعجَّاشْثْ ن وُورغْ.
7 أَجْضِيضْ إِتّْكشَّاضنْ وَارْ إِسِّينْ أَمسْرُوقْ إِ غَارسْ إِدْجَانْ،
ؤُ ثِيطّْ ن ؤُجْضِيذْ أَمسّْغُويْ أَمُوقْضِيعْ ن ثِيطَّاوِينْ عمَّارْصْ وَارْ ث ثحْضِي.
8 إِيْرَاذنْ إِمژْيَاننْ إِنفّْخنْ وَارْ ذَايسْ ؤُيُورنْ،
ؤُڒَا ذ أَيْرَاذْ إِزهَّارنْ وَارْ ث إِتّْشُوقِي.
9 مَاشَا بْنَاذمْ إِسَارّحْ أَفُوسْ نّسْ غَارْ سّدْجَاحْ إِقسْحنْ،
إِسّْنقْڒَابْ إِذُورَارْ كُوڒْشِي.
10 ذِي ڒجْرُوفْ إِقَّازْ إِغزْرَانْ،
ؤُ ثِيطّْ نّسْ ثتّْوَاڒَا مَارَّا مِينْ إِغْڒَانْ.
11 إِحوّقْ-د إِ إِغزْرَانْ أَڒَامِي أَمَانْ وَارْ قِّيمنْ تّفّْغنْ-د،
ؤُ مِينْ ذَايسْ إِنُوفَّارنْ إِتَّاوْيِي ث-إِ-د غَارْ ثْفَاوْثْ.
12 ثِيغِيثْ مَاشَا، مَانِي ثتّْوَافْ؟
ؤُ مَانِي ثدْجْ ثْزذِّيغْثْ نْ ڒفْهَامثْ؟
13 بْنَاذمْ وَارْ إِسِّينْ ڒْقِيمثْ نّسْ،
وَارْ ثتّْوِيفْ ثِيغِيثْ ذِي ثمُّورْثْ ن يِينِّي إِدَّارنْ.
14 أَمَانْ يُودْجْغنْ قَّارنْ: ’ذَايْنغْ وَارْ ثدْجِي شَا!‘،
ڒبْحَارْ إِقَّارْ: ’غَارِي وَارْ ذَا ثدْجِي شَا!‘ ▪
15 وَارْ إِزمَّارْ أَذْ إِمّوْشْ وُورغْ إِقُّورنْ ذڭْ ومْشَانْ نّسْ،
ؤُ سُّومْ نّسْ وَارْ زمَّارنْ أَذْ ث وزْننْ س نُّوقَارْثْ. ▪
16 وَارْ زمَّارنْ أَذْ وزْننْ سُّومْ نّسْ س وُورغْ إِغْڒَانْ زِي ؤُفِيرْ،
س وژْرُو ن بِيرِيلْ إِغْڒَانْ ذ صَافِّيرْ أَزِيزَا.
17 وَارْ زمَّارنْ أَذْ مّْقُودَّانْ ڒْقِيمثْ نّسْ أَكْ-ذ وُورغْ نِيغْ كْرِيسْثَالْ،
نِيغْ أَذْ ت بدّْڒنْ س إِشْثْ ن ڒْقشْعثْ ن وُورغْ إِتّْوَاصفَّانْ.
18 وَارْ تّعْقِيڒنْ عَاذْ خْ ثْيَاقُوثِينْ ذ وژْرُو ن ؤُكْرِيسْثَالْ،
مَاغَارْ ثْوَافِيثْ ن ثِيغِيثْ ثُوعّْڒَا خْ ثْوَافِيثْ ن ڒْمَارْجَانْ.
19 ڒعْقِيقْ أَزڭّْوَاغْ زِي كُوشْ وَارْ ذَايسْ يَارْوِيسْ،
ؤُ وَارْ إِزمَّارْ أَذْ ثتّْوَاوْزنْ ثِيغِيثْ س وُورغْ إِصْفَانْ إِغْڒَانْ.
20 مَانِيسْ د-ثُوسَا خنِّي ثِيغِيثْ،
ؤُ مَانِي ثدْجْ ثْزذِّيغْثْ ن ڒفْهَامثْ؟ ▪
21 أَقَا-ت ثْنُوفَّارْ خْ ثِيطَّاوِينْ ن مَارَّا مِينْ إِدَّارنْ،
ثتّْوَاڒحّفْ خْ إِجْضَاضْ ن ؤُجنَّا.
22 أَهلّكْ ذ ڒْموْثْ قَّارنْ:
’س إِمزُّوغنْ نّغْ نسْڒَا خَاسْ ڒخْبَارْ!‘ ▪
23 أَربِّي إِفهّمْ أَبْرِيذْ نّسْ،
نتَّا إِسّنْ ثَازذِّيغْثْ نّسْ،
24 مَاغَارْ إِتّْوَاڒَا غَارسْ أَڒْ ثِينڭُّورَا ن ثمُّورْثْ،
إِژَارّْ مَارَّا مِينْ إِدْجَانْ سَاذُو إِجنْوَانْ.
25 ؤُمِي إِڭَّا إِ ؤُصمِّيضْ جّهْذْ نّسْ،
ؤُمِي إِعْبَارْ ڒعْبَارْ ن وَامَانْ، ▪
26 ؤُمِي إِڭَّا إِ ونْژَارْ قطُّو،
إِجّْ ن وبْرِيذْ إِ وَاسَّامْ ن وَاجَّاجنْ،
27 خنِّي إِژْرَا إِ-ت، إِسَّارْڭبْ إِ-ت،
ؤُشَا إِسّْبدّْ إِ-ت ذڭْ ومْشَانْ نّسْ ؤُشَا إِبقّشْ ذَايسْ،
28 ؤُشَا إِنَّا إِ بْنَاذمْ:
’خْزَارْ، ثِيڭّْوُوذِي زِي سِيذِي ذ ثِيغِيثْ،
ؤُ أَبعّذْ خْ مِينْ إِدْجَانْ ذ أَعفَّانْ ذ ڒفْهَامثْ.‘ ▫ ▪