‏1 خنِّي سّْبدّنْ ثْڒَاثَا ن يرْيَازنْ نِّي مَاحنْذْ أَذْ د-أَرّنْ خْ أَيُوبْ، مِينْزِي ثُوغَا ذ أَمْسڭّذْ جَارْ ثِيطَّاوِينْ ن يِيخفْ نّسْ. ‏2 خَاسْ ؤُشَا يَارْغَا ؤُخيّقْ ن إِلِيهُو، مِّيسْ ن بَارَاخْيِيلْ، زِي ثمُّورْثْ ن بُوزْ، زِي ڒَادْجْ ن رَامْ. يَارْغَا ؤُخيّقْ نّسْ خْ أَيُوبْ مِينْزِي إِڭَّا وَانِيثَا إِخفْ نّسْ ذ أَمْسڭّذْ خْ أَربِّي. ‏3 يَارْغَا ؤُخيّقْ نّسْ ؤُڒَا خْ ثْڒَاثَا ن إِمدُّوكَّاڒْ نّسْ، مَاغَارْ نِيثْنِي، وَاخَّا وَارْ ؤُفِينْ مِينْ زِي خَاسْ إِ د غَا يَارّنْ، أَمنِّي أَرِّينْ ڒْعِيبْ ذِي أَيُوبْ.

‏4 إِلِيهُو مَاشَا ثُوغَا إِرَاجَا س وَاوَاڒنْ قِيبَاتْشْ إِ أَيُوبْ، مِينْزِي نِيثْنِي ثُوغَا مْغَارنْ خَاسْ. ‏5 ؤُمِي إِژْرَا إِلِيهُو، أَقَا ثْڒَاثَا ن يرْيَازنْ نِّي وَارْ ؤُفِينْ مِينْ زِي د غَا يَارّنْ عَاذْ، يَارْغَا ؤُخيّقْ نّسْ. ‏6 ؤُشَا إِطّفْ إِلِيهُو، مِّيسْ ن بَارَاخِيلْ، زِي بُوزْ، ذڭْ وَاوَاڒْ، إِنَّا:

نشّْ ذ أَمژْيَانْ ذڭْ إِسڭّْوُوسَا ؤُ كنِّيوْ ذ إِمشَّايْپُوثنْ.

س ؤُينِّي رَاجِيغْ ؤُ بُّورّْنغْ

مَاحنْذْ أَذْ أَومْ سّشْنغْ ثُوسّْنَا إِنُو. ^▪  

‏7 نشّْ نِّيغْ: ’أجّْ إِنِّي إِمْغَارنْ ذڭْ وُوسَّانْ أَذْ سِّيوْڒنْ،

أجّْ ڒْقدّْ أَمقّْرَانْ ن إِسڭّْوُوسَا ن ؤُمشَّايْپُو أَذْ إِسَّارْڭبْ ثِيغِيثْ.‘

‏8 س ثِيذتّْ، بُوحْبڒْ إِزْذغْ ذِي بْنَاذمْ،

أَصُوضِي ن نّفْسْ ن ؤُمْزمَّارْ خْ كُوڒْشِي إِتِّيشْ أَسنْ ڒفْهَامثْ. ^▪  

‏9 إِنِّي إِمْغَارنْ ذڭْ إِسڭّْوُوسَا وَارْ ذَايْسنْ ثدْجِي ثِيغِيثْ،

ؤُ إِوسُّورَا وَارْ فهّْمنْ إِ شّْرعْ. ^▪  

‏10 س ؤُينِّي قَّارغْ: ’سْڒمْ-د غَارِي،

خنِّي ؤُڒَا ذ نشّْ أَذْ سّشْنغْ ثُوسّْنَا إِنُو.‘

‏11 خْزَارْ، رَاجِيغْ أَوَاڒنْ نْومْ،

سّْحسّغْ غَارْ ڒفْهَامثْ نْومْ،

أَمْ ثُوغَا ثَارزُّومْ خْ وَاوَاڒنْ إِسڭّْمنْ.

‏12 نشّْ حْضِيغْ كنِّيوْ مْلِيحْ،

أَقَا ذَا، ؤُڒَا ذ إِجّنْ مَا ثُوغَا إِزمَّارْ أَذْ إِسّقْنعْ أَيُوبْ،

ؤُڒَا ذ إِجّنْ زَّايْومْ وَارْ إِزمَّارْ أَذْ د-يَارّْ خْ وَاوَاڒنْ نّسْ.

‏13 س ؤُيَا وَارْ قَّارمْ: ’نشِّينْ نُوفَا ثِيغِيثْ!

أَربِّي إِ إِزمَّارنْ أَذْ ث إِنْضَارْ، وَارْ إِدْجِي بْنَاذمْ.‘

‏14 وَارْ دْجِينْ وَاوَاڒنْ نّسْ خَافِي،

ؤُ س وَاوَاڒنْ نْومْ وَارْ خَاسْ د-أَرِّيغْ.

‏15 تّْوَارْنَانْ نِيثْنِي، وَارْ د-تَّارِّينْ عَاذْ،

أَوَاڒنْ تّْوَاكّْسنْ زَّايْسنْ.

‏16 ڒَاجِيغْ، مَاشَا وَارْ سِّيوْڒنْ،

مَاغَارْ سّْبدّنْ أَوَاڒْ، وَارْ د-تَّارِّينْ عَاذْ.

‏17 ؤُڒَا ذ نشّْ خْسغْ أَذْ سِّيوْڒغْ ذِي نُّوبثْ إِنُو،

ؤُڒَا ذ نشّْ أَذْ سّشْنغْ ثُوسّْنَا إِنُو.

‏18 مَاغَارْ شُّورغْ س وَاوَاڒنْ،

إِحسَّارْ أَيِي بُوحْبڒْ ذِي ذَاخڒْ إِنُو.

‏19 خْزَارْ، أَعذِّيسْ إِنُو إِتّڭّْ أَمْ ثْزِييَّاثْ ن بِينُو وَارْ يَارْزِيمنْ عَاذْ،

أَمْ ثْخُونْشَايْ ن يِيڒمْ ن جْذِيذْ أَقَا نتَّا إِتّڭّْ أَخْمِي ڭُّورْ أَذْ إِدُّوقّزْ.

‏20 أَذْ سِّيوْڒغْ حِيمَا أَذْ فْسُوسغْ،

أَذْ أَرْزْمغْ إِينْشِيشنْ إِنُو، أَذْ د-أَرّغْ.

‏21 وَارْ تّڭِّيغْ س وُوذْمَاونْ أَكْ-ذ ؤُڒَا ذ إِجّْ،

وَارْ سِّيوْڒغْ ؤُڒَا أَكْ-ذ إِجّْ ن بْنَاذمْ س وَاوَاڒنْ إِمِيژِيذنْ.

‏22 مَاغَارْ وَارْ زمَّارغْ أَذْ ڭّغْ س وَاوَاڒنْ إِمِيزِيضنْ،

مَاغَارْ خنِّي أَذْ أَيِي إِكّسْ ونِّي إِ ذ أَيِي إِڭِّينْ.