أَيُوبْ يَارَّا-د خْ بِيلْذَاذْ: ڒمْغَارثْ ن أَربِّي
26
1 خَاسْ ؤُشَا يَارَّا-د أَيُوبْ، إِنَّا: 2 مَامّشْ ثڭِّيذْ ثْوشِيذْ أَفُوسْ إِ ونِّي وَارْ غَارْ إِدْجِي جّهْذْ،
مَامّشْ ثْبدّذْ غَارْ ؤُغِيڒْ ن ونِّي وَارْ غَارْ ثدْجِي ثْزمَّارْ!
3 زعْمَا أَقَا ثوْشِيذْ أَوسِّي إِسبْحنْ إِ ونِّي وَارْ غَارْ ثدْجِي ثِيغِيثْ،
مَامّشْ إِ ثسَّارْڭْبذْ أَطَّاسْ ن ثْوَاڒَاوِينْ مُومُّو ن ثْمسْڒَاشْثْ!
4 إِ ؤُمِي ثْعَاوْذذْ ڒخُّو أَوَاڒنْ نّكْ؟
مَانْ نّفْسْ د-إِفّْغنْ زَّايكْ؟
5 ڒخْيَاڒَاثْ ن إِمتَّانْ فسّْينْ
سَاذُو وَامَانْ ذ إِمزْذَاغْ نْسنْ.
6 ذ أَعَارْيَانْ ثزّڒْ زَّاثسْ ڒَاخَارْثْ،
وَارْ ذِينْ ثدْجِي ثْقبَّارْثْ إِ ڒَادْجَاغْ ن ؤُهلّكْ. ▪
7 إِبزّعْ أَجنَّا ذِي شَّامَالْ ثِيوَا ڒْخَاوِي ن وُوذمْ ن وَامَانْ،
يُويڒْ ثَامُّورْثْ غَارْ وَالُو. ▪
8 نتَّا إِتّْشدَّا أَمَانْ ذڭْ إِسيْنُوثنْ نّسْ،
وَاخَّا أَمنِّي وَارْ إِتَّارژِّي أَسيْنُو سْوَادَّايْ.
9 إِسّْذُورُّويْ ؤُذمْ ن ڒْعَارْشْ نّسْ،
إِتّْبزَّاعْ خَاسْ أَسيْنُو نّسْ. ▪
10 يَارْشمْ ثَاقُورَاشْثْ خْ وُوذمْ ن وَامَانْ،
غَارسْ أَڒْ ثْمَا ن ثْفَاوْثْ أَكْ-ذ ثَادْجسْثْ. ▪
11 إِبِيلَارنْ ن ؤُجنَّا تَّارْجِيجِينْ،
تّْنخْڒَاعنْ زڭْ ؤُودّبْ نّسْ.
12 س جّهْذْ نّسْ إِسّْهَاجْ ڒبْحَارْ،
ؤُ س ڒفْهَامثْ نّسْ إِڒْبزْ رَاهَابْ. ▪
13 س أَرُّوحْ نّسْ إِتِّيسِّيقْ ؤُجنَّا أَمْ وُوذمْ ن ثنِّي وَارْ إِتّْڒحِّيفنْ،
أَفُوسْ نّسْ إِسّْنُوقّبْ أَفِيغَارْ إِتّحْڒُودْجُوضنْ س ثَازْڒَا. ▪
14 خْزَارْ، مَانْ أَيَا وَاهَا إِخفْ ن إِبْرِيذنْ نّسْ،
نسْڒَا مْغِيرْ ثَاحسّشْثْ ن شَا ن وَاوَاڒنْ زَّايسْ.
وِي إِزمَّارنْ خنِّي أَذْ إِسّنْ أَجَّاجْ ن جّْهذْ نّسْ؟