ثَامْوَارِّيثْ ن أَيُوبْ خْ صُوفَارْ: ڒفْڒحْ ن ورْيَازْ أَعفَّانْ
21
1 خنِّي يَارَّا-د أَيُوبْ، إِنَّا: 2 سْڒمْ مْلِيحْ إِ وَاوَاڒنْ إِنُو،
حِيمَا أَذْ أَومْ إِڒِينْ إِ ؤُسْفوّجْ.
3 كْسِيمْ أَيِي، خنِّي أَذْ سِّيوْڒغْ،
ؤُ أَوَارْنِي ڒَامِي سِّيوْڒغْ، خنِّي ثْزمَّارمْ أَذْ ثْعفَّارمْ.
4 خَافِي نشّْ، مَا أَشثْشِي إِنُو خْ إِجّْ ن بْنَاذمْ؟
نِيغْ مَايمِّي وَارْ ذ أَيِي د-إِكَّارْ أَذْ يِيڒِي بُوحْبڒْ إِنُو بْڒَا تَّاسِيعْ ن ڒْخَاضَارْ؟
5 قڒْبمْ-د غَارِي ؤُشَا جْعَارمْ،
سَارْسمْ أَفُوسْ خْ ؤُقمُّومْ.
6 مَاڒَا خمّغْ وَاهَا ذڭْ ؤُيَا، تّْنخْڒِيعغْ،
ؤُ ثْمنّعْ ثَارْجِيجِيثْ أَرِّيمثْ إِنُو.
7 مَايمِّي تّْغِيمَانْ إِعفَّاننْ دَّارنْ،
مَايمِّي دَّاكّْوَاڒنْ إِوسُّورَا، تّْمَارْنِينْ عَاذْ ذِي جّهْذْ نْسنْ؟ ▪
8 ثَارْوَا نْسنْ تّْغِيمَانْ بدّنْ زَّاثْ إِ ؤُغمْپُوبْ نْسنْ، أَقَا أَثنْ غَارْسنْ،
ؤُ إِحنْجِيرنْ إِغدُّوثنْ نْسنْ زَّاثْ إِ ثِيطَّاوِينْ نْسنْ. ▫
9 ثُوذْرِينْ نْسنْ أَقَا أَثنْثْ ذِي ڒهْنَا نْهْڒَا أَنخْڒِيعْ،
أَعْمُوذْ ن أَربِّي وَارْ ثنْ إِشِّيثْ.
10 أَفُونَاسْ نّسْ إِتَّارَّا ؤُ وَارْ إِخطِّي،
ثَاينْذُوزْثْ نّسْ ثتَّارُو ؤُ عمَّارْصْ وَارْ ثْغطّڒْ أَعذِّيسْ.
11 تّجَّانْ إِمژْيَاننْ نْسنْ ڭُّورنْ أَمْ إِشْثْ ن ثْحِيمَارْثْ،
إِحنْجِيرنْ نْسنْ تّجَّانْ ثنْ نڭّْزنْ.
12 نِيثْنِي سّْڭعَّاذنْ ثْمِيجَّا نْسنْ غَارْ ؤُبنْذِيرْ ذ ڒْڭَامْبْرِي،
ؤُشَا فَارّْحنْ غَارْ ثْمِيجَّا ن ثمْجَا.
13 سّْعدُّونْ ؤُسَّانْ نْسنْ ذِي زّْهَارْ،
مَاشَا هكّْوَانْ غَارْ ڒَاخَارْثْ ذڭْ ورْمَاشْ ن وَابْڒِيونْ.
14 قَّارنْ إِ أَربِّي: ’حيّذْ خَانغْ،
مَاغَارْ وَارْ ذ أَنغْ إِعْجِيبْ أَذْ نسّنْ إِبْرِيذنْ نّكْ. ▪
15 مَانْ ونْ إِدْجَانْ ذ أَمْزمَّارْ خْ كُوڒْشِي مَاحنْذْ نشِّينْ أَذْ أَسْ نْسخَّارْ؟
مَانْ لْفَايْذَا إِ غَارْنغْ مَاڒَا نْزِييَّارْ خَاسْ س ثْژَادْجِيثْ نّغْ؟‘ ▪
16 خْزَارْ، زّْهَارْ نْسنْ وَارْ إِدْجِي ذڭْ ؤُفُوسْ نْسنْ.
شّْوَارْ ن إِعفَّاننْ إِڭّْوجْ خَافِي. ▪
17 مشْحَاڒْ ن ثْوَاڒَاوِينْ ثْخسِّي إِ إِعفَّاننْ س ثِيذتّْ ثْفَاوْثْ نْسنْ،
ؤُشَا إِڒقّفْ إِ-ثنْ ؤُضيّعْ،
مشْحَاڒْ ن ثْوَاڒَاوِينْ إِبطَّا نتَّا خَاسنْ ڒحْڒِيقْ ذڭْ وغْضَابْ نّسْ، ▪
18 أَڒَامِي إِ غَا ذوْڒنْ أَمْ ؤُڒُومْ زَّاثْ إِ ؤُصمِّيضْ،
أَمْ إِغدْجْ ثخْضفْ إِ-ث ثْحَارْيَاضْثْ؟
19 مَا ثقَّارمْ: ’أَربِّي إِتّْخمّڒْ لْعِيقَابْ إِ ڒْمُوعْصِييّثْ نّسْ إِ إِحنْجِيرنْ نّسْ!‘ ؟
أجّْ إِ-ث أَذْ أَسْ ت إِخدْجصْ أَڒْ غَا يَاشَا نتَّا سِيمَانْثْ نّسْ!
20 أجّْ ثِيطَّاوِينْ نّسْ أَذْ ژَترنْثْ أَهلّكْ نّسْ،
أجّْ إِ-ث أَذْ إِسُو س يِيخفْ نّكْ زڭْ وسْعَارْ ن ؤُمْزمَّارْ خْ كُوڒْشِي.
21 مَاغَارْ مَامّشْ إِ غَا إِفَارْحْ عَاذْ ذِي أَيْثْبَابْ ن ثَادَّارْثْ نّسْ أَوَارْنِي إِ ڒْموْثْ نّسْ،
مَاڒَا ثتّْوَاڭّْ عَاذْ قدَّا ن إِيُورنْ نّسْ؟ ▫
22 مَا زمَّارنْ أَذْ سّْڒمْذنْ ثُوسّْنَا إِ أَربِّي،
ونِّي إِحكّْمنْ خْ ينِّي إِدْجَانْ ذڭْ ؤُجنَّا يُوعْڒَانْ؟ ▪
23 أَقَا ذِينْ إِجّنْ إِمُّوثْ ذِي زّْهَارْ إِمُونْ،
أَمْ إِدَّارْ عَاذْ قَاعْ نْهْڒَا أَمْنُوسْ ؤُ ذِي ڒْهُوذْنثْ.
24 أَمْ عمَّارنْ ڒمْذَاوذْ نّسْ س ؤُغِي،
ؤُ إِتّْوَابزّڭْ وَاذُوفْ ن يخْسَانْ نّسْ.
25 ونّغْنِي إِمُّوثْ س ڒعْمَارْ ذ أَمَارْزَاڭْ،
وَارْ د-يِيوِي ڒِيقِّي إِ وَالُو ن ڒْخَارْ.
26 مُوننْ زّْڒنْ نِيثْنِي ذڭْ ؤُشَاڒْ،
ؤُ إِكشَّاونْ ذْڒِينْ ثنْ. ▪
27 خْزَارْ، سّْنغْ إِخَارِّيصنْ نْومْ،
ؤُڒَا ذ ثِيمعْمَاتْشْ نِّي زِي ذ أَيِي ثْذڒْممْ،
28 خْمِي ثقَّارمْ: ’مَانِي ثدْجْ ثَادَّارْثْ ن بُو-صُّولْطَا،
ؤُ مَانِي ثدْجْ ثْقِيضُونْثْ ن ثْزذِّيغِينْ ن ؤُعفَّانْ؟‘
29 مَا عمَّارْصْ وَارْ ثسّقْسِيمْ إِمْسبْرِيذنْ؟
أَقَا إِشيَّارنْ نْسنْ إِتّْقَارَّانْ وَارْ ثْزمَّارمْ أَذْ ثنْ ثنْكَارمْ:
30 مَاغَارْ أَعفَّانْ أَذْ إِتّْوَاحْضَا ذڭْ وَاسّْ ن أَرْژِييّثْ،
ذڭْ وَاسّْ ن ؤُذُوقّزْ ن ؤُفُوڭمْ أَذْ تّْوَاوْينْ نِيثْنِي ذِي ڒَامَانْ. ▪
31 مَانْ ونْ إِ ث غَا إِسّشْننْ أَبْرِيذْ نّسْ ذڭْ ؤُغمْپُوبْ نّسْ؟
مَاڒَا إِڭَّا شَا ن ثُوعفّْنَا، وِي ث إِ غَا إِخدْجْصنْ؟
32 نتَّا مَاشَا أَذْ إِتّْوَاكْسِي غَارْ ونْضڒْ نّسْ ذ أَمقّْرَانْ،
ؤُ غَارْ ثوْرِيرْثْ ن ونْضڒْ نّسْ إِتّْعسّْ نتَّا س يِيخفْ نّسْ.
33 تّْعجِيبنْ أَسْ إِپُورْسَا ن ثغْزُورْثْ،
ؤُ ضفَّارنْ ث مَارَّا إِوْذَانْ،
ؤُ إِنِّي ذ أَسْ إِتِّيزْوَارنْ، وَارْ ڭُّورْ أَذْ تّْوَاحسْبنْ.
34 مَامّشْ ثخْسمْ أَذْ أَيِي ثْعزَّامْ س وَاوَاڒنْ إِخْوَانْ؟
زِي ثمْوَارِّيثْ نْومْ وَارْ إِتّْغِيمِي وَالُو مْغِيرْ ڒغْضَارْ وَاهَا.