ڒْحَارْضْ وِيسّْ ثْنَاينْ ن صُوفَارْ خْ ڒفْڒحْ ذ ڒْحُوكْمْ
20
1 خنِّي يَارَّا-د صُوفَارْ، ونِّي د-يُوسِينْ زِي نَاعْمَا، إِنَّا: 2 إِخَارِّيصنْ إِنُو تّْغِيمَانْ ذكّْوَاڒنْ-د غَارِي،
زِي سِّيبّثْ ن ؤُقدْجقْ إِ وَارْ إِتّْبذِّينْ ذِي ڒْبَاڒْ إِنُو.
3 سْڒِيغْ إِجّْ ن ؤُوبّخْ إِ ذ أَيِي إِسّْبهْذَاڒنْ،
مَاشَا بُوحْبڒْ أَذْ خَافِي د-يَارّْ س ڒفْهَامثْ إِنُو.
4 إِوَا ثسّْنذْ أَيَا، أَقَا-ث ذِينْ زڭْ وشْحَاڒْ ؤُيَا،
زڭْ وَامِي إِتّْوَاسَّارْسْ بْنَاذمْ خْ ثمُّورْثْ،
5 أَقَا أَسْڒِيوْڒوْ ن إِعفَّاننْ إِتّكّْ ذْرُوسْ وَاهَا،
ڒفْرَاحثْ ن ؤُمْنَافقْ مْغِيرْ إِشْثْ ن ثْزحْزِيحْثْ. ▪
6 وَاخَّا ثتّْڭعَّاذْ نّْفَاخثْ نّسْ أَڒْ إِجنْوَانْ،
وَاخَّا إِتّْحَاذَا أَزدْجِيفْ نّسْ أَڒْ إِسيْنُوثنْ،
7 أَمْ إِسُوفْغَانْ نّسْ أَذْ قْضَانْ إِ ڒبْذَا.
إِنِّي ث إِژْرِينْ، أَذْ إِنِينْ: ’مَانِي إِدْجْ نتَّا؟‘
8 أَمْ إِشْثْ ن ثِيرْجَا أَذْ إِضُووْ، وَارْ إِتّْوِيفِي عَاذْ،
أَذْ إِتّْوَاسّثْلعْ أَمْ ثْمژْرِيوْثْ ن دْجِيڒثْ.
9 ثِيطّْ إِ ث إِژْرِينْ وَارْ ث ثْژَارّْ عَاوذْ،
ؤُ أَمْشَانْ نّسْ وَارْ ث إِژَارّْ عمَّارْصْ.
10 إِحنْجِيرنْ نّسْ أَذْ سّْجِيوْننْ إِمزْڒَاضْ،
أَمُّو إِ د غَا يَارّنْ إِفَاسّنْ نْسنْ أَڭْڒَا نّسْ.
11 إِخْسَانْ نّسْ إِشُّورنْ س ثمْژِي،
ڭُّورْ أَذْ زّْڒنْ أَكِيذسْ ذڭْ ؤُشَاڒْ.
12 مَاڒَا ڒْغَارْ ذڭْ ؤُقمُّومْ نّسْ ذ أَمِيژِيذْ،
مَاڒَا إِسّْنُوفَّارْ إِ-ث سَاذُو إِڒسْ نّسْ،
13 مَاڒَا إِحْضَا إِ-ث، وَارْ إِخْسْ أَذْ خَاسْ إِحيّضْ،
مَاشَا إِمنّعْ إِ-ث ذڭْ وَانغْ نّسْ،
14 خنِّي أَذْ ثْبدّڒْ مَاشَّا نّسْ ذڭْ ؤُعذِّيسْ نّسْ،
ذِي ذَاخڒْ نّسْ أَذْ ثذْوڒْ ذ أَرّْهَاجْ ن ثْرفْسِيوِينْ.
15 إِصَارْضْ أَڭْڒَا، مَاشَا أَذْ ث-إِ-د-إِعُوقّْ عَاوذْ.
أَذْ ث-إِ-د-إِنْضَارْ أَربِّي غَارْ بَارَّا زڭْ ؤُعذِّيسْ نّسْ.
16 أَرّْهَاجْ ن ثْرفْسِيوِينْ أَذْ ث إِطّضْ،
إِڒسْ ن ؤُفِيغَارْ أَذْ ث إِنغْ.
17 وَارْ إِژَارّْ إِغزْرَانْ،
ثِيغزْرَاثِينْ ذ ثَارْيَاوِينْ إِتَّازّْڒنْثْ س ثَامّنْثْ ذ ؤُغِي.
18 أَذْ د-يَارّْ ڒفْضڒْ ن ؤُمَارّثْ نّسْ، وَارْ ث إِسّغْڒَايْ،
وَارْ إِنڭّزْ س ڒفْرَاحثْ زِي سِّيبّثْ ن وَاڭْڒَا إِ د-إِكْسبْ،
19 مَاغَارْ إِذدْجْ إِمزْڒَاضْ، إِجَّا إِ-ثنْ بْڒَا ثْوِيزَا،
يُوشَارْ ثَادَّارْثْ نِّي وَارْ إِسّْبدّْ،
20 مَاغَارْ وَارْ إِسِّينْ ڒْهُوذْنثْ ذِي ذَاخڒْ نّسْ،
س ؤُيَا وَارْ إِنجّمْ س مَارَّا مِينْ ذِي ثُوغَا إِمّژْرِي أَمُّو.
21 وَارْ إِتّْشطِّي وَالُو إِ ؤُمرْعِيقْ نّسْ،
س ؤُينِّي وَارْ إِتّْغِيمِي زّْهَارْ نّسْ إِبدّْ.
22 مَاڒَا غَارسْ عَاذْ أَفيّضْ إِمُونْ، أَذْ إِتّْوَاحْسَارْ،
أَذْ خَاسْ يِيڒِي ؤُفُوسْ ن كُوڒْ ڒْمسْكِينْ.
23 أَيَا أَذْ يِيڒِي حِيمَا أَذْ إِشُّورْ أَعذِّيسْ نّسْ إِ ثْيَاوَانْثْ:
أَقَا نتَّا أَذْ خَاسْ إِسّكّْ ڒْحَاذُوقْ ن وغْضَابْ نّسْ،
أَذْ ث يَارّْ أَذْ خَاسْ إِوّثْ أَمْ ونْژَارْ خْمِي إِ غَا إِشُوقّْ ذِي أَرِّيمثْ نّسْ.
24 وَاخَّا أَذْ يَارْوڒْ زِي ڒسْنَاحْ ن وُوزَّاڒْ،
أَذْ ث إِسّْنُوقّبْ ڒْقوْسْ ن نّْحَاسْ.
25 إِجبّذْ إِجّنْ زَّايسْ فْڒِيثْشَا، أَقَا ثفّغْ-د زِي أَرِّيمثْ نّسْ،
ڒْمَاشَامْ يَارقّنْ إِتّفّغْ-د زڭْ إِژِي نّسْ،
وَاهْ إِنخْڒِيعنْ أَذْ خَاسْ كّنْ.
26 ثَادْجسْثْ ثكْمڒْ ثتّْحَامَا غَارْ ثْخُوبَايْ نّسْ،
ثِيمسِّي وَارْ ت إِسِّيغْ ؤُڒَا ذ إِجّْ، أَذْ ث ثشّْ،
أَذْ ثَارّْ مژْرِي أَكْ-ذ ينِّي إِشطّنْ ذِي ثْقِيضُونْثْ نّسْ.
27 أَجنَّا أَذْ إِعَارَّا ڒْمُوعْصِييّثْ نّسْ،
ؤُ ثَامُّورْثْ أَذْ خَاسْ ثْغوّغْ.
28 ڒْغِيدْجثْ ن ثَادَّارْثْ نّسْ أَذْ ثْرَاحْ،
أَذْ ثَازّڒْ ذڭْ وَاسّْ ن وغْضَابْ نّسْ.
29 وَا ذ مِينْ إِ د-إِكَّارنْ إِ إِعفَّاننْ زِي أَربِّي،
ثَاسْغَارْثْ إِ ذ أَسْ إِنَّا أَربِّي.